詩篇 第 4 章 - 台語漢字羅馬本

1

〔大衛的詩交互樂官；用絲弦的樂器。〕顯明我的義的上帝呀，我求叫的時，求你應我！我佇困苦的中間，你曾互我寬闊；今求你憐憫我，來聽我的祈禱！

2

恁諸個上等人啊，將我的榮光變做凌辱欲到底時？恁意愛空虛，搜尋無影跡，欲到底時？（細拉）

3

恁著知，耶和華已經分別敬虔的人做伊家己的；我求叫耶和華，伊欲聽我。

4

恁著驚惶，呣通犯罪；佇眠床裡，心著三思，亦著肅靜。（細拉）

5

著獻義的祭，亦著倚靠耶和華。

6

多多人講：是誰會指示阮甚麼好處？耶和華啊，求你用你的面的光，來照阮。

7

你互我心內有歡喜，贏過人得著多多五穀及新酒的時。

8

我欲安然倒睏，因為只有耶和華──你互我安穩徛起。