詩篇 第 51 章 - 台語漢字羅馬本

1
〔大衛及拔示巴同房以後,先知拿單來見伊;伊做此個詩,交互樂官。〕上帝啊,照你的慈愛憐憫我!照你豐盛的慈悲擦消我的過失!
2
將我的罪惡一盡洗除,亦洗清我到無罪!
3
因為,我家己知我的過失;我的罪常常佇我的面前。
4
我所犯著的,就是得罪你若定;佇你的目睭前行此號歹,致到你講話的時顯明做義,判斷的時顯明公道。
5
我是佇罪惡中生者,佇罪的中間我的老母懷孕我。
6
你所愛的是心內誠實;佇我的腹內,你欲互我得著智慧。
7
求你用牛膝草洗我,我就清氣;求你洗我,我就比雪卡白。
8
求你互我得著聽見歡喜快樂的聲,互你所遏折的骨通歡喜。
9
求你掩你的面無看我的罪,擦消我一切的罪惡。
10
上帝啊,求你給我創造清氣的心,互我的內面有換新正直的神。
11
呣通趕我,互我離開你的面;呣通對我收回你聖的神。
12
求你互我猶原得著你救恩的快樂,賞賜我有自由的神來扶持我,
13
我就將你的道路指示有過失的人,有罪的人就欲歸順你。
14
上帝啊,你是救我的上帝;求你救我脫離人的罪!我的舌欲大聲吟詩謳咾你的義。
15
主啊,求你開我的嘴唇,我的嘴就欲報揚你的好名聲!
16
因為你無愛祭物,若愛,我就欲獻;燒祭,你亦無歡喜。
17
上帝所愛的祭就是憂傷的神;上帝啊,憂傷痛悔的心,你無欲看輕伊。
18
求你照你的好意思好款待錫安,起造耶路撒冷的城牆。
19
彼時,你欲歡喜義的祭及燒祭以及加隆隻精牲的燒祭;彼時,人欲將公的牛獻佇你的壇。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!