啟示錄 第 15 章 - 台語漢字羅馬本

1
我閣看見別個兆頭佇天裡,大閣奇怪,就是七個天使有掌七項災禍,就是路尾的,因為上帝的大受氣對諸個來盡。
2
我閣看見玻璃,及火相參的海。閣看見許個得勝來脫離獸及伊的相以及伊的名的數額者,徛佇玻璃海,攏提上帝的琴,
3
吟上帝奴僕摩西的詩及羊羔的詩,講:主上帝──全能者啊,你的所做大閣奇怪!歷世代的王啊,你的道路義閣真實!
4
主啊,是誰呣敬畏歸榮光你的名啊?因為獨獨你是聖。列邦欲攏來敬拜佇你的面前,因為你公義的所行已經顯明。
5
諸個代誌了後,我看見佇天裡彼個做證據的會幕的殿已經開。
6
許個七個天使有掌七項災禍的,對殿出來,身軀穿寶石清亮閣光明,胸坎縖金帶。
7
四個活物的一個將七個金碗互彼七個天使,內面貯滿彼個活到代代無盡的上帝的大受氣。
8
對上帝的榮光及伊的權能,就殿裡有煙滿滿。閣無人會入殿,聽候到七個天使七項的災禍行盡。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!