羅馬書 第 14 章 - 台語漢字羅馬本

1
信軟茈的人,恁著接納伊,呣是欲辯論所僥疑的。
2
有人信百項物攏通食;獨獨信軟茈的,是食菜蔬。
3
食者莫得看輕無食者;無食者莫得擬議食者;因為上帝已經接納伊。
4
你是是誰擬議別人的奴僕啊?伊徛在,抑是跋倒,自然有伊的主人佇;若是伊欲徛在,因為主會互伊徛在。
5
有人擬斷此日贏彼日;有人擬斷日日攏相同。逐人心內著認 真。
6
守日者是為著主來守;食者為著主來食,因為伊感謝上帝;無食者也為著主來無食,也感謝上帝。
7
因為咱無人為著家己來活,也無人為著家己來死。
8
因為咱若活,是為著主來活;死,也是為著主來死。所以,咱或是活或是死攏屬佇主。
9
因為基督所以死來復活,是欲做活者死者的主。
10
今你啥事擬議你的兄弟?也你啥事看輕你的兄弟?因為咱眾人攏欲徛佇上帝公座前。
11
因為有記載講:主講:我既然是活者:萬腳頭窩欲跪我;萬嘴舌欲謳咾上帝。
12
按呢,咱逐人欲排列家己的事佇上帝的面前。
13
所以,咱莫得閣相擬議,恁寧可著定著意思莫得用互人跋倒抑是塞礙的物下佇兄弟的面前。
14
我知,也佇主耶穌深信,物本無一項是粗俗;獨獨人若掠甚麼做粗俗,就彼項物佇彼人是做粗俗。
15
總是若為著食物的事互你的兄弟憂悶,就你呣是照仁愛來行。基督替伊死的,你呣通用你的所食來敗壞伊。
16
莫得致到你的好互人誹謗;
17
因為上帝的國不在飲食,是義,及平安,及佇聖神的歡喜。
18
用按呢來服事基督的,互上帝所歡喜,互人所謳咾。
19
所以,見若致到和平大家相建立的事,咱著專務。
20
莫得因為食的緣故毀壞上帝的工。逐項物卻是清氣,若是對食致到跋倒的,就是歹。
21
無食肉,無飲酒,無做甚麼互兄弟跋倒,才是好。
22
你所有的信,著家己存佇上帝的面前。人無家己擬議佇伊所認做著的,就有福氣。
23
獨獨人若僥疑也來食,就受定罪,因為呣是出佇信。見若呣是對信出的就是罪。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!