羅馬書 第 6 章 - 台語漢字羅馬本

1
按呢,咱欲怎樣講?總無長長佇罪惡、互恩典加添多多嗎?
2
斷斷呣通!咱向罪彼面已經死的,豈欲猶原佇罪中來活嗎?
3
豈呣知咱見若曾受洗禮來入佇基督耶穌的,是受洗禮來入伊的死。
4
所以,咱既然對洗禮來入佇死,及伊同埋葬,是親像基督對父的榮光對死人中復活,也欲互咱按呢行佇活命的新款。
5
因為咱若聯合佇伊死的款式,也欲聯合佇伊復活的款式;
6
是知咱舊的人及伊同釘,互罪的體會廢去,致到咱無閣做罪惡的奴才;
7
因為已經死的是得著稱做義,來脫離罪。
8
今咱信若及基督同死,就欲及伊同活。
9
知基督已經對死人中復活無閣死,死無閣管轄伊。
10
因為伊的死,是向罪做一擺死;伊的活是向上帝來活。
11
按呢,恁佇基督耶穌著看家己向罪是死,向上帝是活。
12
所以,莫得容允罪惡做王佇恁會死的身軀,致到恁順趁伊的私慾。
13
也莫得將恁的百體獻互罪惡做不義的器具;是著將本身獻互上帝,親像對死人中來活者,也獻恁的百體互上帝做義的器具。
14
因為罪惡無閣管轄恁,因為恁呣是佇律法下,是佇恩典下。
15
按呢就怎樣?咱既然呣是佇律法下,是恩典下,通犯罪嗎?斷斷呣通!
16
豈呣知恁獻本身做奴僕來順趁伊,就是做所順趁者的奴僕?或是做罪惡的奴僕,致到死;抑是做順趁的奴僕,致到義?
17
感謝上帝!因為恁前做罪惡的奴僕,今曾甘心順趁恁所入彼個教訓的規模。
18
已經得著解放脫離罪,就做義的奴僕。
19
我因為恁肉體的軟弱,就照人的事來講。因為親像恁曾用恁的百體獻互污穢不法做奴僕,致到不法;今著照按呢用恁的百體獻互義做奴僕,致到成聖。
20
因為恁前做罪惡的奴僕,彼時恁無互義管轄。
21
當彼時恁得著甚麼果子,佇現今所見誚的啊?因為的結局是死。
22
今恁已經得著解放脫離罪惡,來做上帝的奴僕,得著果子,致到成聖,彼個結局是永活。
23
因為罪惡的工錢是死;若是上帝的恩賜是永活,在佇咱的主基督耶穌。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!