撒迦利亞 第 6 章 - 台語漢字羅馬本

1
我閣抬目看,看啊,有四張車對二個山縫出來;許個山是銅的山。
2
頭一張車掛赤馬,第二張車掛黑馬。
3
第三張車掛白馬,第四張車掛花斑勇的馬。
4
我就應對及我講話的使者講:「我的主啊,諸個是甚麼?」
5
使者應我講:「諸個就是天四面的風,徛佇全地的主的面前,今對遐出來。」
6
掛黑馬的車出去北方,白馬隨伊的後面;花斑的馬出去南方。
7
勇的馬出來,愛欲佇全地行來行去。伊講:「做恁去佇全地行來行去。」就佇全地行來行去。
8
伊叫我,給我講:「看啊,去北方的已經佇北方安我的心。」
9
耶和華的話臨到我講:
10
「你著對許個受掠的人的中間就是對黑玳,對多比雅、對耶大雅領受金銀。閣佇彼日你著入去西番雅的子約西亞的厝,就是對巴比倫倒轉來所到的厝,
11
領受金銀做冕旒,戴佇約撒答的子祭司頭約書亞的頭殼,
12
對伊講,萬軍的耶和華按呢講:看啊,彼個稱做樹枝的人,伊欲對伊的根頭發起來,也欲起耶和華的殿。
13
伊欲起耶和華的殿,伊也欲得著榮光,坐伊的寶座來治理;也欲佇伊的寶座做祭司,佇二個的中間有和平的計劃。
14
冕旒欲歸佇希連、多比雅、耶大雅、及西番雅的子賢,下佇耶和華的殿做紀念。」
15
遠的人也欲來,有份佇起耶和華的殿,恁就知萬軍的耶和華差我到恁遮。恁若注意聽趁耶和華──恁的上帝的話,就欲有此個代誌。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!