出埃及記 第 20 章

1

(THR) Siōng-tè hoan-hù chiah-ê it-chhè ê ōe kóng, Góa sī Iâ-hô-hoa, lí ê Siōng-tè, bat chhōa lí tùi Ai-kı̍p tōe, tùi chòe lô͘-châi ê ke, chhut-lâi ê.

(BCL) 上帝吩咐諸個一切的話講：

2

(THR)

(BCL) 「我是耶和華──你的上帝，曾導你對埃及地，對做奴才的家出來的。

3

(THR) Góa í-gōa, lí m̄-thang ū pa̍t ê Siōng-tè.

(BCL) 「我以外你呣通有別個上帝。

4

(THR) M̄-thang ūi-tio̍h ka-kī tiau-khek ngó͘-siōng, put-lūn thiⁿ-téng, tōe-chiūⁿ, kap tōe-ē chúi-lāi só͘-ū ê mı̍h, lóng m̄-thang chòe in ê siōng;

(BCL) 「呣通為著家己雕刻偶像，不論天頂、地上，及地下、水內所有的物攏呣通做的像。

5

(THR) m̄-thang kèng-pài in, iā m̄-thang ho̍k-sāi in; in-ūi Góa Iâ-hô-hoa, lí ê Siōng-tè, tòan-tòan m̄ iông-ún ēng pa̍t ê siōng-tè phit-phòe Góa; òan-hūn Góa-ê, Góa kui-kiū i ê chōe, tùi pē kàu kiáⁿ kàu saⁿ-sì tāi;

(BCL) 呣通敬拜，也呣通服事，因為我耶和華──你的上帝，斷斷呣容允用別個上帝匹配我。怨恨我者，我歸咎伊的罪，對父到子，到三四代；

6

(THR) thiàⁿ Góa, siú Góa kài-bēng-ê, Góa si-un hō͘ i, tı̍t-kàu chheng-tāi.

(BCL) 疼我、守我誡命者，我施恩互伊，直到千代。

7

(THR) M̄-thang lām-sám chheng Iâ-hô-hoa lí ê Siōng-tè ê miâ; in-ūi lām-sám chheng I ê miâ ê lâng, Iâ-hô-hoa tek-khak bô lia̍h i chòe bô-chōe.

(BCL) 「呣通濫糝稱耶和華──你的上帝的名；因為濫糝稱伊的名的人，耶和華的確無掠伊做無罪。

8

(THR) Tio̍h kì-tit an-hioh-jı̍t, siú i chòe-sèng;

(BCL) 「著記得安息日，守伊做聖。

9

(THR) la̍k-jı̍t-lāi eng-kai tio̍h-bôa, chòe lí it-chhè ê kang;

(BCL) 六日內應該著磨做你一切的工，

10

(THR) to̍k-to̍k tē-chhit-jı̍t, chiū-sī ǹg Iâ-hô-hoa lí ê Siōng-tè lâi siú ê an-hioh; chit-jı̍t lí kap lí ê kiáⁿ, cha-bó͘-kiáⁿ, lô͘-po̍k, lú-pī, cheng-siⁿ, í-kı̍p tiàm tī lí tiong-kan ê chhut-gōa lâng, it-chhè ê kang, lóng m̄-thang chòe;

(BCL) 獨獨第七日就是向耶和華──你的上帝來守的安息。此日你及你的子、查某子、奴僕、女婢、精牲，以及踮佇你中間的出外人，一切的工攏呣通做；

11

(THR) in-ūi la̍k-jı̍t-lāi, Iâ-hô-hoa chhòng-chō thiⁿ, tōe, hái, kap hit tiong-kan bān-mı̍h, tē-chhit jı̍t chiū hioh; só͘-í Iâ-hô-hoa sù-hok tī an-hioh-jı̍t, siat-lı̍p i chòe-sèng.

(BCL) 因為六日內，耶和華創造天、地、海，及彼中間萬物，第七日就息，所以耶和華賜福佇安息日，設立伊做聖。

12

(THR) Tio̍h hàu-kèng lí ê lāu-pē, lí ê lāu-bú, hō͘ lí ê jı̍t-chí tī Iâ-hô-hoa lí ê Siōng-tè só͘ siúⁿ-sù lí ê tōe, tit-tio̍h kú-tn̂g.

(BCL) 「著孝敬你的老父你的老母，互你的日子佇耶和華──你的上帝所賞賜你的地得著久長。

13

(THR) M̄-thang hāi-sí lâng.

(BCL) 「呣通害死人。

14

(THR) M̄-thang kiâⁿ kan-îm.

(BCL) 「呣通行姦淫。

15

(THR) M̄-thang thau-the̍h.

(BCL) 「呣通偷提。

16

(THR) M̄-thang chòe ké ê kan-chèng, hām-hāi lí ê chhù-piⁿ.

(BCL) 「呣通做假的干證陷害你的厝邊。

17

(THR) M̄-thang tham lí ê chhù-piⁿ ê chhù, iā m̄-thang tham lí ê chhù-piⁿ ê bó͘, lô͘-po̍k, lú-pī, gû, lû, í-kı̍p lí ê chhù-piⁿ it-chhè só͘-ū-ê.

(BCL) 「呣通貪你的厝邊的厝；也呣通貪你的厝邊的某、奴僕、女婢、牛、驢，以及你的厝邊一切所有的。」

18

(THR) Chèng peh-sìⁿ khòaⁿ-kìⁿ lûi-tân, sih-nà, sàu-kak ê siaⁿ, koh soaⁿ-téng chhut-ian, peh-sìⁿ chı̍t-ē khòaⁿ-kìⁿ, chiū ngia̍uh-ngia̍uh-chhoah, hn̄g-hn̄g khiā-teh;

(BCL) 眾百姓看見雷鳴，閃爁、哨角的聲、閣山頂出煙，百姓一下看見就愕愕惙，遠遠徛，

19

(THR) tùi Mô͘-se kóng, Kiû lí kap góan kóng, góan beh thiaⁿ; m̄-thang Siōng-tè kap góan kóng, kiaⁿ-liáu góan ōe sí.

(BCL) 對摩西講：「求你及阮講，阮欲聽；呣通上帝及阮講，驚了阮會死。」

20

(THR) Mô͘-se tùi peh-sìⁿ kóng, M̄-bián kiaⁿ; in-ūi Siōng-tè kàng-lîm sī beh chhì-giām lín koh hō͘ lín sî-siông kèng-ùi I, bián-tit lín hōan-chōe.

(BCL) 摩西對百姓講：「呣免驚；因為上帝降臨是欲試驗恁，閣互恁時常敬畏伊，免得恁犯罪。」

21

(THR) Tùi án-ni peh-sìⁿ hn̄g-hn̄g khiā-teh; Mô͘-se chiū kiâⁿ-kūn ba̍t-hûn, kàu Siōng-tè ê só͘-chāi.

(BCL) 對按呢百姓遠遠徛；摩西就行近密雲到上帝的所在。

22

(THR) Iâ-hô-hoa tùi Mô͘-se kóng, Lí tio̍h án-ni kā Í-sek-lia̍t lâng kóng, Lín í-keng ka-kī khòaⁿ-kìⁿ Góa tùi thiⁿ-téng kap lín kóng-ōe.

(BCL) 耶和華對摩西講：「你著按呢給以色列人講：『恁已經家己看見我對天頂及恁講話。

23

(THR) Lín m̄-thang chòe pa̍t ê siōng-tè phit-phòe Góa; m̄-thang ūi ka-kī chòe gûn ê siōng-tè, kim ê siōng-tè.

(BCL) 恁呣通做別個上帝匹配我，呣通為家己做銀的上帝、金的上帝。

24

(THR) Lí tio̍h kā Góa khí thô͘-tôaⁿ, tī hit téng-bīn hiàn lí ê sio-chè, kap pêng-an-chè, kap lí ê gû, lí ê iûⁿ; kìⁿ-nā Góa hō͘ lâng kì-liām Góa ê miâ ê só͘-chāi, Góa beh kàu lí hia sù-hok lí.

(BCL) 你著給我起土壇，佇彼頂面獻你的燒祭及平安祭、及你的牛、你的羊。見若我互人記念我的名的所在，我欲到你遐賜福你。

25

(THR) Lí nā ēng chio̍h-thâu kā Góa khí-tôaⁿ, m̄-thang ēng keh-phah ê chio̍h lâi khí; in-ūi nā ti7hit téng-bīn tāng lí ê ke-si, chiū phah lâ-sâm-i.

(BCL) 你若用石頭給我起壇，呣通用過拍的石來起，因為若佇彼頂面動你的家私，就拍垃墋伊。

26

(THR) Iā m̄-thang ēng kiā-á-chàn chiūⁿ Góa ê tôaⁿ, bián-tit lō͘-hiān lí ê ē-thé.

(BCL) 也呣通用崎仔層上我的壇，免得露現你的下體。』」

Bible Color Mark

• 台語漢字羅馬本
• 巴克禮全羅