創世記 第 32 章

1

(THR) Ngá-kok koh kiâⁿ i ê lō͘, Siōng-tè ê sù-chiá tú-tio̍h i.

(BCL) 雅各閣行伊的路，上帝的使者抵著伊。

2

(THR) Ngá-kok khòaⁿ-kìⁿ in, chiū kóng, Che sī Siōng-tè ê kun-tūi; só͘-í miâ hit só͘-chāi kiò Má-khap-liām.

(BCL) 雅各看見就講：「這是上帝的軍隊」，所以名彼所在叫瑪哈念。

3

(THR) Ngá-kok chhe lâng tāi-seng khì Se-jíⁿ ê tōe, Í-tong ê chhân, kìⁿ i ê hiaⁿ Í-sò.

(BCL) 雅各差人代先去西珥的地，以東的田，見伊的兄以掃，

4

(THR) Hoan-hù in kóng, Lín kā góa ê chú Í-sò kóng, Lí ê lô͘-po̍k Ngá-kok án-ni kóng, Góa tī La̍h-pan hia kià-ku, tòa kàu kin-á-jı̍t.

(BCL) 吩咐講：「恁給我的主以掃講：『你的奴僕雅各按呢講：我佇拉班遐寄居，住到今仔日。

5

(THR) góa ū gû, lû, iûⁿ-kûn, lô͘-po̍k, lú-pī; taⁿ chhe lâng lâi pò góa ê chú, ài tit tī lí ê bīn-chêng tit-tio̍h un-tián.

(BCL) 我有牛、驢、羊群、奴僕、女婢，今差人來報我的主，愛得佇你的面前得著恩典。』」

6

(THR) Só͘ chhe ê lâng tò-lâi Ngá-kok hia kóng, Góan kàu lí ê hiaⁿ Í-sò hia, i tú-tú teh lâi beh ngiâ-chih lí; koh ū sì-pah lâng kap i lâi.

(BCL) 所差的人倒來雅各遐，講：「阮到你的兄以掃遐，伊抵抵來欲迎接你，閣有四百人及伊來。」

7

(THR) Ngá-kok tōa kiaⁿ koh peh-pak; chiong hiah-ê kap i saⁿ-kap tī-teh ê lâng, kap iûⁿ-kûn, gû-kûn, lo̍k-tô, pun chòe nn̄g tūi;

(BCL) 雅各大驚閣迫腹，將許個及伊相及佇的人，及羊群、牛群、駱駝分做二隊，

8

(THR) kóng, Í-sò nā lâi kong-kek chit-tūi, chhun-ê hit-tūi iáu thang tô-cháu.

(BCL) 講：「以掃若來攻擊此隊，剩的彼隊猶通逃走。」

9

(THR) Ngá-kok koh kóng, Góa ê chó͘, A-pek-la̍h-hán ê Siōng-tè, góa ê pē Í-sat ê Siōng-tè, Iâ-hô-hoa ah, Lí bat tùi góa kóng, Tò-khì lí ê pún-tōe pún-cho̍k, Góa beh hó khóan-thāi lí.

(BCL) 雅各閣講：「我的祖亞伯拉罕的上帝，我的父以撒的上帝──耶和華啊，你曾對我講：『倒去你的本地本族，我欲好款待你。』

10

(THR) Lí tùi lí ê lô͘-po̍k só͘ si it-chhè ê chû-ài kap it-chhè ê sêng-sı̍t, chiū chì-bî-sòe ê, góa iā bōe kham-tit tit-tio̍h; góa chêng kia̍h góa ê kóaiⁿ-á, kè chit ê Iok-tàn hô; taⁿ góa í-keng chiâⁿ-chòe nn̄g-tūi.

(BCL) 你對你的奴僕所施一切的慈愛及一切的誠實，就至微細的我也堪得得著；我前抬我的拐仔過此個約但河，今我已經成做二隊。

11

(THR) Kiû Lí kiù góa thoat-lī góa ê hiaⁿ Í-sò ê chhiú; in-ūi góa kiaⁿ i, kiaⁿ-liáu i lâi thâi-sí góa kap in bú-kiáⁿ.

(BCL) 求你救我脫離我的兄以掃的手；因為我驚伊，驚了伊來死我及母子。

12

(THR) Lí iā bat kóng, Góa tek-khak beh hó khóan-thāi lí; hō͘ lí ê hō͘-è chhin-chhiūⁿ hái-piⁿ ê soa, chōe kàu bōe-sǹg-tit.

(BCL) 你也曾講：『我的確欲好款待你，互你的後裔親像海邊的沙，多到算得。』」

13

(THR) Hit-mî Ngá-kok hioh tī-hia; chiū tī i só͘ ū ê mı̍h ê lāi-bīn, kéng-chhut lé-mı̍h, beh sàng i ê hiaⁿ Í-sò;

(BCL) 彼暝，雅各歇佇遐，就佇伊所有的物的內面揀出禮物欲送伊的兄以掃：

14

(THR) soaⁿ-iûⁿ-bú nn̄g-pah chiah, soaⁿ-iûⁿ-kang jī-cha̍p chiah, mî-iûⁿ-bú nn̄g-pah chiah, mî-iûⁿ-kang jī-cha̍p chiah;

(BCL) 山羊母二百隻，山羊二十隻，綿羊母二百隻，綿羊二十隻，

15

(THR) lo̍k-tô-bú kap chia̍h-ni ê kiáⁿ saⁿ-cha̍p chiah, gû-bú sì-cha̍p chiah, gû-káng cha̍p chiah, lû-bú jī-cha̍p chiah, lû-kiáⁿ cha̍p-chiah.

(BCL) 駱駝母及食奶的子三十隻，牛母四十隻，牛十隻，驢母二十隻，驢子十隻；

16

(THR) Kok-iūⁿ lēng-gōa chı̍t-kûn, kau-tài lô͘-po̍k; kā lô͘-po̍k kóng, Lín tāi-seng góa khì, hō͘ ta̍k-kûn ū saⁿ-lī.

(BCL) 各樣另外一群，交代奴僕，給奴僕講：「恁代先我去，互逐群有相離」；

17

(THR) Koh hoan-hù chòe-thâu-ê, kóng, Góa ê hiaⁿ Í-sò tú-tio̍h lí ê sî, nā mn̄g lí kóng, Lí sī sím-mı̍h lâng ê? beh khì tah-lo̍h? lí thâu-chêng hiah-ê chī-chūi ê?

(BCL) 閣吩咐做頭的講：「我的兄以掃抵著你的時，若問你講：『你是甚麼人的？欲去叨落？你頭前許個是誰的？』

18

(THR) lí tio̍h kóng, Sī lí ê lô͘-po̍k Ngá-kok ê; sī beh sàng góa ê chú Í-sò ê lé-mı̍h; hiān-chāi i pún-sin ia̍h tī góan ê āu-bīn.

(BCL) 你著講：『是你的奴僕雅各的，是欲送我的主以掃的禮物；現在伊本身亦佇阮的後面。』」

19

(THR) Koh hoan-hù tē-jī tē-saⁿ, kap it-chhè kóaⁿ kui-kûn cheng-siⁿ ê lâng, kóng, Lín tú-tio̍h Í-sò ê sî, ia̍h tio̍h chiàu án-ni kā i kóng.

(BCL) 閣吩咐第二、第三，及一切趕歸群精牲的人講：「恁抵著以掃的時亦著照按呢給伊講；

20

(THR) Koh lín ia̍h tio̍h kóng, Lí ê lô͘-po̍k Ngá-kok tī góan ê āu-bīn. In-ūi Ngá-kok ka-kī phah-sǹg kóng, Góa ēng tī góa thâu-chêng khì ê lé-mı̍h lâi kóe i ê hūn; jiân-āu góa kìⁿ-tio̍h i ê bīn, kiám-chhái i chiap-la̍p góa.

(BCL) 閣恁亦著講：『你的奴僕雅各佇阮的後面。』」因為雅各家己拍算講：「我用佇我頭前去的禮物來解伊的恨，然後我見著伊的面，豈採伊接納我。」

21

(THR) Tùi án-ni, lé-mı̍h seng kiâⁿ; hit-mî Ngá-kok hioh tī tūi-tiong.

(BCL) 對按呢禮物先行；彼暝，雅各歇佇隊中。

22

(THR) I mî-sî khí-lâi, chhōa i nn̄g ê bó͘, nn̄g ê lú-pī, kap cha̍p-it ê kiáⁿ, lóng kè Ngá-po̍k ê tō͘-thâu.

(BCL) 伊暝時起來，導伊二個某，二個女婢，及十一個子，攏過雅博的渡頭，

23

(THR) Tāi-seng hō͘ in kè-khoe; hōan só͘-ū-ê ia̍h hō͘ in kè.

(BCL) 代先互過溪，凡所有的亦互過，

24

(THR) Chí-ū chhun Ngá-kok ka-kī tī-teh; ū chı̍t-lâng lâi kap i saⁿ-ián, kàu tī thiⁿ-phú-kng.

(BCL) 只有剩雅各家己佇。有一人來及伊相偃，到佇天昲光。

25

(THR) Hit-lâng khòaⁿ bōe iâⁿ-i; chiū siàn Ngá-kok ê tōa-thúi-khū; saⁿ-ián ê sî, Ngá-kok ê tōa-thúi-khū cho̍ah-tio̍h.

(BCL) 彼人看贏伊，就搧雅各的大腿臼，相偃的時雅各的大腿臼差著。

26

(THR) Hit-lâng kóng, Thiⁿ beh kng lah, tio̍h pàng góa khì. Ngá-kok kóng, Lí nā bô kā góa chiok-hok, m̄ pàng lí khì.

(BCL) 彼人講：「天欲光啦，著放我去！」雅各講：「你若無給我祝福，呣放你去。」

27

(THR) Hit-lâng kóng, Lí miâ chòe sím-mı̍h? i kóng, Góa miâ chòe Ngá-kok.

(BCL) 彼人講：「你名做甚麼？」伊講：「我名做雅各。」

28

(THR) Hit-lâng kóng, Lí ê miâ bô beh koh kiò Ngá-kok, beh kiò-chòe Í-sek-lia̍t; in-ūi lí kap Siōng-tè kap lâng tàu su-iâⁿ, lóng tit-tio̍h khah-iâⁿ.

(BCL) 彼人講：「你的名無欲閣叫雅各，欲叫做以色列；因為你及上帝及人鬥輸贏，攏得著卡贏。」

29

(THR) Ngá-kok mn̄g i kóng, Chhiáⁿ chiong lí ê miâ kā góa kóng. Hit lâng ìn kóng, Mih-sái mn̄g góa ê miâ? chiū tī-hia kā i chiok-hok.

(BCL) 雅各問伊講：「請將你的名給我講。」彼人應講：「乜使問我的名？」就佇遐給伊祝福。

30

(THR) Ngá-kok miâ Hit só͘-chāi kiò Piān-í-lī, in-ūi kóng, Góa tng-thâu tùi-bīn kìⁿ-tio̍h Siōng-tè, góa ê sìⁿ-miā iáu tit-tio̍h pó-chôan.

(BCL) 雅各名彼所在叫便以利，因為講：「我當頭對面見著上帝，我的生命猶得著保全。」

31

(THR) Jı̍t tú-á chhut, Ngá-kok keng-kè Piān-í-lī; i ê tōa-thúi í-keng pái.

(BCL) 日抵仔出，雅各經過便以利，伊的大腿已經跛。

32

(THR) Só͘-í chiah ê Í-sek-lia̍t lâng bô chia̍h tōa-thúi-thâu ê kun, kàu tī kin-á-jı̍t; in-ūi hit-lâng siàn Ngá-kok thúi-khū ê tōa-kun.

(BCL) 所以，諸個以色列人無食大腿頭的筋，到佇今仔日，因為彼人搧雅各腿臼的大筋。

Bible Color Mark

• 台語漢字羅馬本
• 巴克禮全羅