耶利米書 第 14 章

1

(THR) Lūn-kàu khòng-hān ê sū, Iâ-hô-hoa ê ōe lîm-kàu Iâ-lī-bí.

(BCL) 論到亢旱的事，耶和華的話臨到耶利米：

2

(THR) Iû-tāi pi-ai, siâⁿ-mn̂g soe-pāi, lâng chhēng o͘-saⁿ chē tī thô͘-kha; Iâ-lō͘-sat-léng pi-ai ê siaⁿ thàu kàu téng-bīn.

(BCL) 猶大悲哀，城門衰敗。人穿黑衫坐佇土腳；耶路撒冷悲哀的聲透到頂面。

3

(THR) In ê sè-ka chhe gín-ná-kang khì chhiūⁿ-chúi; in kàu chíⁿ--nih, chhē bô chúi; chiū tòa khang ê khì-kū tò--lâi; kiàn-siàu, làu-khùi, tà thâu-khak.

(BCL) 的世家差囝仔工去汲水；到井裡，尋無水，就帶空的器具倒來，見誚漏氣，罩頭殼。

4

(THR) Choh-chhân lâng kiàn-siàu, tà thâu-khak; sī in-ūi bô lo̍h hō͘, thô͘(**thó͘)-tōe pit-lı̍h.

(BCL) 作田人見誚罩頭殼；是因為無落雨，土地　裂。

5

(THR) Chhân-iá ê lo̍k-bú siⁿ-kiáⁿ, chiū pàng hiat-ka̍k; in-ūi bô chháu.

(BCL) 田野的鹿母生子，就放擲，因為無草。

6

(THR) Iá-lû khiā tī kng-khō-khō kôaiⁿ ê só͘-chāi, chhóan-khùi chhin-chhiūⁿ iá-káu; in-ūi bô chháu, ba̍k-chiu sit-bêng.

(BCL) 野驢徛佇光裸裸高的所在，喘氣親像野狗；因為無草，目睭失明。

7

(THR) Iâ-hô-hoa ah, góan ê chōe-kòa sui-jiân chòe kan-chèng kò góan; iáu-kú kiû Lí ūi-tio̍h Lí ê miâ lâi chòe tāi-chì; góan ta̍uh-ta̍uh pōe-ge̍k, tek-chōe Lí.

(BCL) 耶和華啊，阮的罪過雖然做干證告阮，猶久求你為著你的名來做代誌。阮沓沓悖逆，得罪你。

8

(THR) Í-sek-lia̍t só͘ ǹg-bāng--ê, tī hōan-lān-tiong chòe Kiù-chú--ê ah, Lí siáⁿ-sū tī chit só͘-chāi chhin-chhiūⁿ kià-kha--ê, koh chhin-chhiūⁿ kè-lō͘ lâng o̍at--lâi hioh kè-mî ah?

(BCL) 以色列所向望者、佇患難中做救主者啊，你啥事佇此所在親像寄腳者，閣親像過路人越來歇過暝啊？

9

(THR) Lí siáⁿ-sū chhin-chhiūⁿ gông-ngia̍h ê lâng, chhin-chhiūⁿ bōe-ōe kiù lâng ê ióng-sū ah? Iâ-hô-hoa ah, Lí iû-gôan tī góan tiong-kan; góan ia̍h chheng-chòe sio̍k Lí ê miâ ê lâng; m̄-thang pàng-sak góan.

(BCL) 你啥事親像卬愕的人，親像會救人的勇士啊？耶和華啊，你猶原佇阮中間；阮亦稱做屬你的名的人，呣通放拺阮。

10

(THR) Iâ-hô-hoa tùi chit ê peh-sìⁿ án-ni kóng, In ài hòng-tōng, bô iok-sok in ê kha; só͘-í Iâ-hô-hoa m̄ chiap-la̍p in, taⁿ beh kì-tit in ê chōe-kòa, pān in ê chōe-ok.

(BCL) 耶和華對此個百姓按呢講：愛放蕩，無約束的腳，所以耶和華呣接納。今欲記得的罪過，辦的罪惡。

11

(THR) Iâ-hô-hoa koh tùi góa kóng, Bo̍h-tit ūi-tio̍h chit ê peh-sìⁿ kî-tó, kiû hok-khì.

(BCL) 耶和華閣對我講：「莫得為著此個百姓祈禱求福氣。

12

(THR) In kìm-chia̍h ê sî, Góa m̄-thiaⁿ in ê kiû-kiò; in hiàn sio-chè kap lé-mı̍h, Góa ia̍h m̄ chiap-la̍p. Góa hóan-tńg beh ēng to-kiàm, ēng ki-hng, ēng un-e̍k lâi bia̍t in.

(BCL) 禁食的時，我呣聽的求叫；獻燒祭及禮物，我亦呣接納；我反轉欲用刀劍、用飢荒、用瘟疫來滅。」

13

(THR) Góa chiū kóng, Hāi--ah, Chú Iâ-hô-hoa ah, khòaⁿ ah, hiah ê sian-ti tùi in kóng, Lín bōe khòaⁿ-kìⁿ to-kiàm, ia̍h bōe tú-tio̍h ki-hng; Iâ-hô-hoa beh tī chit ê tōe-hng siúⁿ-sù lín kú-tn̂g ê pêng-an.

(BCL) 我就講：「嗐啊！主耶和華啊，看啊，許個先知對講：『恁看見刀劍，亦抵著飢荒；耶和華欲佇此個地方賞賜恁久長的平安。』」

14

(THR) Iâ-hô-hoa tùi góa kóng, Hiah ê sian-ti thok Góa ê miâ thôan pe̍h-chha̍t; Góa bô chhe in, bô hoan-hù in, ia̍h bô tùi in kóng; in thôan hō͘ lín--ê, sī hu-ké ê khé-sī, kap chiam-pok, kap bô-iáⁿ ê sū, í-kı̍p in ê sim ê khúi-chà.

(BCL) 耶和華對我講：「許個先知託我的名傳白賊，我無差，無吩咐，亦無對講；傳互恁的，是虛假的啟示及占卜，及無影的事，以及的心的詭詐。

15

(THR) Só͘-í Iâ-hô-hoa án-ni kóng, Lūn-kàu thok Góa ê miâ lâi thôan-pò͘ ê hiah ê sian-ti, Góa pēng-bô chhe in, in iáu-kú kóng, Chit ê tōe bōe-ōe tú-tio̍h to-kiàm, ki-hng; kî-sı̍t hiah ê sian-ti beh tùi to-kiàm ki-hng lâi bia̍t-bô.

(BCL) 所以耶和華按呢講：論到託我的名來傳報的許個先知，我並無差；猶久講此個地會抵著刀劍飢荒，其實許個先知欲對刀劍飢荒來滅無。

16

(THR) Koh thiaⁿ in thôan-pò͘ ê peh-sìⁿ, beh in-ūi ki-hng to-kiàm siū hiat-ka̍k tī Iâ-lō͘-sat-léng ê koe-lō͘; in kap bó͘ kap kiáⁿ cha-bó͘-kiáⁿ, lóng bô lâng bâi-chòng; Góa beh chiong in ê pháiⁿ piàⁿ tī in ê sin-chiūⁿ.

(BCL) 閣聽傳報的百姓欲因為飢荒刀劍受擲佇耶路撒冷的街路，及某及子查某子，攏無人埋葬。我欲將的歹傾佇的身上。」

17

(THR) Lí tio̍h chiong chit ê ōe kā in kóng, Gōan góa ê ba̍k-sái jı̍t-mî lâu bô soah; in-ūi góa ê peh-sìⁿ tú-tio̍h tōa húi-siong, phah kàu chin-thiám.

(BCL) 你著將此個話給講：願我的目屎日暝流無息，因為我的百姓抵著大毀傷拍到真殄。

18

(THR) Góa nā chhut-khì chhân--nih, chiū khòaⁿ-kìⁿ ū hō͘ to thâi--ê; góa nā jı̍p siâⁿ, chiū khòaⁿ-kìⁿ ū tùi ki-hng lâi phòa-pīⁿ--ê; sian-ti kap chè-si tī kok-lāi sì-kòe kiâⁿ, ia̍h lóng bōe hiáu-tit.

(BCL) 我若出去田裡，就看見有互刀者；我若入城，就看見有對飢荒來破病者；先知及祭司佇國內四界行，亦攏曉得。

19

(THR) Lí it-chīn khì-sak Iû-tāi mah? Lí ê sim iàm-ò͘ⁿ Sek-an mah? siáⁿ-sū phah góan, ia̍h bô thang tit-tio̍h i-hó? Góan ǹg-bāng pêng-an, ia̍h bô ū hok-khì; ǹg-bāng i-tī ê ki-hōe, bô phah-sǹg tú-tio̍h kiaⁿ-hiâⁿ.

(BCL) 你一盡棄拺猶大嗎？你的心厭惡錫安嗎？啥事拍阮，亦無通得著醫好？阮向望平安，亦無有福氣；向望醫治的機會，無拍算抵著驚惶。

20

(THR) Iâ-hô-hoa ah, góan jīn ka-kī ê chōe-ok, kap góan ê lia̍t-chó͘ ê chōe-kòa; in-ūi góan tek-chōe Lí.

(BCL) 耶和華啊，阮認家己的罪惡，及阮的列祖的罪過，因為阮得罪你。

21

(THR) Kiû Lí in-ūi Lí ê miâ ê iân-kò͘, bo̍h-tit iàm-ò͘ⁿ góan; bo̍h-tit lêng-jio̍k Lí êng-kng ê pó-chō; kiû Lí tui-liām, bo̍h-tit pōe Lí kap góan só͘ lı̍p ê iok.

(BCL) 求你因為你的名的緣故，莫得厭惡阮，莫得凌辱你榮光的寶座。求你追念，莫得背你及阮所立的約。

22

(THR) Gōa-pang bô-iáⁿ-chiah ê sîn-bêng, ū chı̍t-ê ōe lo̍h-hō͘ mah? thiⁿ ōe ka-kī lo̍h tōa-hō͘ mah? Iâ-hô-hoa góan ê Siōng-tè ah, ōe án-ni--ê, kiám m̄-sī Lí mah? só͘-í góan iû-gôan beh thèng-hāu Lí; in-ūi che lóng sī Lí só͘ chòe--ê.

(BCL) 外邦無影跡的神明，有一個會落雨嗎？天會家己落大雨嗎？耶和華──阮的上帝啊，會按呢者豈呣是你嗎？所以阮猶原欲聽候你，因為這攏是你所做的。

Bible Color Mark

• 台語漢字羅馬本
• 巴克禮全羅