馬可福音 第 11 章

1

(THR) In kiâⁿ kūn Iâ-lō͘-sat-léng, kàu Kaⁿ-ná soaⁿ-piⁿ ê Pek-hoat-kî kap Pek-tāi-nî ê sî,

(BCL) 行近耶路撒冷，到橄欖山邊的伯法其及伯大尼的時；耶穌差二個學生，

2

(THR) . Iâ-so͘ chhe nn̄g ê ha̍k-seng, kā in kóng, Lín khì tùi-bīn ê hiuⁿ-siā, í-keng jı̍p-khì chiū beh tú-tio̍h chı̍t chiah lû-á pa̍k tī hia, iáu-bē bat ū lâng khiâ ê; tháu-khui kā i khan lâi.

(BCL) 給講：「恁去對面的鄉社，已經入去就欲抵著一隻驢仔縛佇遐，猶未曾有人騎的；解開，給伊牽來。

3

(THR) . Nā ū lâng mn̄g lín kóng, Siáⁿ-sū chòe án-ni? lín chiū tio̍h kóng, Chú khiàm-ēng i; liâm-piⁿ beh hō͘ i tò-lâi chia.

(BCL) 若有人問恁講：『啥事做按呢？』恁就著講：『主欠用伊。』連鞭欲互伊倒來遮。」

4

(THR) . Nn̄g lâng chiū khì, tú-tio̍h chı̍t chiah lû-á, tī lō͘-nı̍h ê oat-kak, pa̍k tī mn̂g-gōa, chiū tháu i.

(BCL) 二人就去，抵著一隻驢仔佇路裡的越角，縛佇門外，就解伊。

5

(THR) . Piⁿ-thâu khiā ê lâng ū-ê kóng, Lín tháu lû-á beh siáⁿ-sū?

(BCL) 邊頭徛的人，有的講：「恁解驢仔欲啥事？」

6

(THR) . In chiàu Iâ-so͘ só͘ kóng ê kā in kóng; hiah ê lâng chiū pàng hō͘ i khì.

(BCL) 照耶穌所講的給講，許個人就放互伊去。

7

(THR) . In chiū khan lû-á chiū-kūn Iâ-so͘, sòa ēng ka-kī ê saⁿ pho̍ah tī hit téng-bīn; Iâ-so͘ chiū khiâ i.

(BCL) 就牽驢仔就近耶穌，續用家己的衫披佇彼頂面，耶穌就騎伊。

8

(THR) . Ū chōe-chōe lâng ēng in ê saⁿ pho͘ tī lō͘-nı̍h; iā ū-ê ēng chhiū-ki, chiū-sī tùi hn̂g-nı̍h só͘ chhò lâi ê.

(BCL) 有多多人用的衫舖佇路裡，也有的用樹枝就是對園裡所剉來的。

9

(THR) . Chêng kiâⁿ āu tè ê kiò kóng, Hô-sàn-ná, tī Chú ê miâ lâi ê, eng-kai tit-tio̍h o-ló;

(BCL) 前行後隨的叫講：和散那！佇主的名來的應該得著謳咾！

10

(THR) . hit-ê teh-beh lâi ê kok, chiū-sī lán ê chó͘-kong Tāi-pı̍t ê kok, eng-kai tit-tio̍h o-ló ah; tī chì-kôaiⁿ ê ūi ah, Hô-sàn-ná.

(BCL) 彼個欲來的國，就是咱的祖公大衛的國，應該得著謳咾啊！佇至高的位啊，和散那！

11

(THR) . Iâ-so͘ jı̍p Iâ-lō͘-sat-léng, jı̍p tiān-tn̂g; sì-kòe khòaⁿ ta̍k hāng ê mı̍h; jı̍t í-keng àm, chiū kap cha̍p-jī ê ha̍k-seng chhut-khì kàu Pek-tāi-nî.

(BCL) 耶穌入耶路撒冷，入殿堂，四界看逐項的物。日已經暗，就及十二個學生出去，到伯大尼。

12

(THR) . Keh jı̍t, in tùi Pek-tāi-nî chhut-lâi, Iâ-so͘ iau.

(BCL) 隔日，對伯大尼出來，耶穌枵。

13

(THR) . Hn̄g-hn̄g khòaⁿ-kìⁿ chı̍t châng bû-hoa-kó chhiū ū hio̍h, chiū khì khòaⁿ tī hit téng-bīn ū só͘ tit-tio̍h bô; í-keng kàu, kèng-jiân bô só͘ tit-tio̍h, chí ū hio̍h nā-tiāⁿ; in-ūi m̄ sī bû-hoa-kó ê sî;

(BCL) 遠遠看見一欉無花果樹有葉，就去看佇彼頂面有所得著無。已經到，竟然無所得著，只有葉若定，因為呣是無花果的時。

14

(THR) . chiū tùi hit châng chhiū kóng, Taⁿ liáu-āu éng-éng bô lâng chia̍h-tio̍h lí ê ké-chí. I ê ha̍k-seng iā thiaⁿ-kìⁿ.

(BCL) 就對彼欉樹講：「今了後，永永無人食著你的果子。」伊的學生也聽見。

15

(THR) . In kàu Iâ-lō͘-sat-léng, Iâ-so͘ jı̍p tiān; chiū kóaⁿ-chhut tiān-lāi bóe-bōe ê lâng, chhia-tó ōaⁿ chîⁿ ê lâng ê toh, kap bōe chíⁿ-á ê lâng ê í;

(BCL) 到耶路撒冷。耶穌入殿，就趕出殿內買賣的人，捙倒換錢的人的桌及賣鴿仔的人的椅；

16

(THR) . sòa m̄ chún lâng tòa khì-kū tùi tiān-nı̍h keng-kè.

(BCL) 續呣准人帶器具對殿裡經過；

17

(THR) . Koh kà-sī in kóng, Kiám bô kì-chài kóng, Góa ê chhù beh chheng chòe bān pang kî-tó ê chhù mah? nā-sī lín hō͘ i chòe chha̍t-siū.

(BCL) 閣教示講：「豈無記載講：我的厝欲稱做萬邦祈禱的厝嗎？若是恁互伊做賊巢。」

18

(THR) . Chiah ê chè-si-thâu kap keng-ha̍k-sū thiaⁿ-kìⁿ, chiū chhē-khòaⁿ thang cháiⁿ-iūⁿ lâi bia̍t I, in-ūi kiaⁿ I; sī chèng lâng lóng kî-kòai I ê kà-sī.

(BCL) 諸個祭司頭及經學士聽見，就尋看通怎樣來滅伊，因為驚伊，是眾人攏奇怪伊的教示。

19

(THR) . Ta̍k ê-hng Iâ-so͘ chhut siâⁿ khì.

(BCL) 逐下昏，耶穌出城去。

20

(THR) . Chá-khí sî in tùi hia keng-kè, chiū khòaⁿ-kìⁿ hit châng bû-hoa-kó chhiū kun-ki lóng ko͘-tâ-khì.

(BCL) 早起時，對遐經過，就看見彼欉無花果樹根枝攏枯焦去。

21

(THR) . Pí-tek kì-tit chiū kā I kóng, Lia̍p-pí, lí khòaⁿ, lí só͘ chiù-chó͘ ê bû-hoa-kó chhiū í-keng ta-khì.

(BCL) 彼得記得，就給伊講：「拉比，你看！你所咒詛的無花果樹已經乾去。」

22

(THR) . Iâ-so͘ ìn kóng, Lín tio̍h sìn Siōng-tè.

(BCL) 耶穌應講：「恁著信上帝。

23

(THR) . Góa sı̍t-chāi kā lín kóng, Hōan-nā kā chit ê soaⁿ kóng, Sóa-khì, hiat tī hái-nı̍h, sim-lāi bô giâu-gî, to̍k-to̍k sìn i só͘ kóng ê tek-khak chiâⁿ, chiū beh kā i chiâⁿ.

(BCL) 我實在給恁講，凡若給此個山講：『徙去，佇海裡！』心內無僥疑，獨獨信伊所講的的確成，就欲給伊成。

24

(THR) . Só͘-í góa kā lín kóng, Kìⁿ-nā lín só͘ kî-tó lâi kiû ê, tio̍h sìn sī í-keng tit-tio̍h, chiū beh kā lín chiâⁿ.

(BCL) 所以我給恁講，見若恁所祈禱來求的，著信是已經得著，就欲給恁成。

25

(THR) . Kìⁿ-nā lín khiā-teh kî-tó ê sî siūⁿ-tio̍h ū lâng tek-chōe lí sím-mı̍h, chiū tio̍h sià-bián i; hō͘ lín tī thiⁿ-nı̍h ê Pē iā siá-bián lín ê kè-sit.

(BCL) 見若恁徛祈禱的時，想著有人得罪你甚麼，就著赦免伊，互恁佇天裡的父也赦免恁的過失。」

26

(THR) .

(BCL) ｛恁若不饒恕人，恁佇天裡的父也不饒恕恁的過犯。〔台語羅馬譯本無此節！〕｝

27

(THR) . In koh kàu Iâ-lō͘-sat-léng; Iâ-so͘ tī tiān-lāi teh kiâⁿ ê sî, hiah ê chè-si-thâu keng-ha̍k-sū kap tiúⁿ-ló chiū-kūn I kóng,

(BCL) 閣到耶路撒冷。耶穌佇殿內行的時，許個祭司頭經學士及長老就近伊，講：

28

(THR) . Lí ēng sím-mı̍h kôan kiâⁿ chiah ê sū? koh chī-chūi hō͘ lí chit ê kôan thang kiâⁿ i ah?

(BCL) 「你用甚麼權行諸個事？閣是誰互你此個權通行伊啊？」

29

(THR) . Iâ-so͘ chiū kā in kóng, Góa iā mn̄g lín chı̍t kù ōe; lín nā ìn góa, góa chiah beh kā lín kóng góa ēng sím-mı̍h kôan kiâⁿ chiah ê sū.

(BCL) 耶穌就給講：「我也問恁一句話，恁若應我，我才欲給恁講我用甚麼權行諸個事。

30

(THR) . Iok-hān ê sóe-lé sī tùi thiⁿ á-sī tùi lâng ah? lín tio̍h ìn góa.

(BCL) 約翰的洗禮是對天？抑是對人啊？恁著應我。」

31

(THR) . In saⁿ-kap gī-lūn kóng, Nā kóng, Tùi thiⁿ, I beh kóng, Án-ni lín siáⁿ-sū m̄ sìn i?

(BCL) 相及議論講：「若講『對天』，伊欲講：『按呢，恁啥事呣信伊？』

32

(THR) . Nā kóng, Tùi lâng,—in chiū kiaⁿ peh-sìⁿ, in-ūi chèng lâng sı̍t-chāi lia̍h Iok-hān chòe sian-ti.

(BCL) 若講『對人』，就驚百姓，因為眾人實在掠約翰做先知。」

33

(THR) . Chiū ìn Iâ-so͘ kóng, Góan m̄ chai. Iâ-so͘ chiū kā in kóng, Góa iā bô beh kā lín kóng góa sī ēng sím-mı̍h kôan kiâⁿ chiah ê sū.

(BCL) 就應耶穌講：「阮呣知。」耶穌就給講：「我也無欲給恁講我是用甚麼權行諸個事。」

Bible Color Mark

• 台語漢字羅馬本
• 巴克禮全羅