詩篇 第 66 章

1

(THR) Chit phiⁿ si-koa, kau hō͘ Ga̍k-koaⁿ.1) Chôan-tōe lóng tio̍h tùi Siōng-tè lâi chhut hoaⁿ-hí ê siaⁿ;

(BCL) 〔一篇詩歌，交互樂官。〕全地攏著對上帝來出歡喜的聲！

2

(THR) Chhiùⁿ-koa o-ló I ê miâ ê êng-kng; Ēng o-ló ê ōe lâi hián-bêng I ê êng-kng.

(BCL) 唱歌謳咾伊的名的榮光！用謳咾的話來顯明伊的榮光！

3

(THR) Tio̍h tùi Siōng-tè kóng, Lí ê só͘-chòe kàu hiah thang kiaⁿ! In-ūi Lí ê tōa kôan-lêng, Lí ê tùi-te̍k beh hâng-ho̍k Lí.

(BCL) 著對上帝講：你的所做到許通驚！因為你的大權能，你的對敵欲降服你。

4

(THR) Chôan-tōe beh kèng-pài Lí, Gîm-si o-ló Lí; Beh gîm-si o-ló Lí ê miâ. [Sè-la̍h

(BCL) 全地欲敬拜你，吟詩謳咾你，欲吟詩謳咾你的名。（細拉）

5

(THR) Lín tio̍h lâi, lâi khòaⁿ Siōng-tè só͘-kiâⁿ ê sū, I tùi sè-kan-lâng só͘-chòe--ê, put-chí thang kiaⁿ.

(BCL) 恁著來，來看上帝所行的事，伊對世間人所做的不止通驚。

6

(THR) I chiong hái piàn-chòe ta-tōe; In pō͘-kiâⁿ kè-hô; Tī-hia góan in-ūi I lâi hoaⁿ-hí.

(BCL) 伊將海變做乾地，步行過河；佇遐阮因為伊來歡喜。

7

(THR) I ēng I ê kôan tī-lí, tı̍t kàu éng-óan; I ê ba̍k-chiu kàm-chhat lia̍t-pang; Pōe-ge̍k ê lâng m̄ thang chū-ko. [Sè-la̍h

(BCL) 伊用伊的權治理，直到永遠。伊的目睭鑑察列邦；悖逆的人呣通自高。（細拉）

8

(THR) Bān peh-sìⁿ ah, lín tio̍h o-ló góan ê Siōng-tè; Hō͘ lâng thiaⁿ-kìⁿ o-ló I ê siaⁿ.

(BCL) 萬百姓啊，恁著謳咾阮的上帝，互人聽見謳咾伊的聲。

9

(THR) I hō͘ góan ê sìⁿ-miā o̍ah-teh; Ia̍h bô hō͘ góan ê kha iô-tāng.

(BCL) 伊互阮的生命活，亦無互阮的腳搖動。

10

(THR) Siōng-tè ah, Lí bat chhì-giām góan; Thòan-liān góan chhin-chhiūⁿ thòan-liān gûn chı̍t-iūⁿ.

(BCL) 上帝啊，你曾試驗阮，鍛煉阮，親像鍛煉銀一樣。

11

(THR) Lí hō͘ góan jı̍p lô-bāng; Ēng tāng-tàⁿ hē tī góan ê sin-chiūⁿ.

(BCL) 你互阮入羅網，用重擔下佇阮的身上。

12

(THR) Lí hō͘ lâng chē-chhia, pôaⁿ-kè góan ê thâu-khak; Góan keng-kè chúi-hé. Chóng-sī Lí hō͘ góan kàu pù-ū ê só͘-chāi.

(BCL) 你互人坐車過阮的頭殼；阮經過水火，總是你互阮到富有的所在。

13

(THR) Góa beh ēng sio-chè chìn-jı̍p Lí ê chhù; Góa beh tùi Lí siā góa ê gōan,

(BCL) 我欲用燒祭進入你的厝，我欲對你謝我的願，

14

(THR) Chiū-sī tī góa hōan-lān ê sî, góa ê chhùi-tûn só͘ kóng--ê, Góa ê chhùi só͘ hē ê gōan.

(BCL) 就是佇我患難的時我的嘴唇所講的，我的嘴所下的願。

15

(THR) Góa beh ēng pûi ê cheng-siⁿ ê sio-chè, Kap kang-iûⁿ ê phang-bī, hiàn hō͘ Lí; Koh ēng kang ê gû, kang ê soaⁿ-iûⁿ, lâi hiàn. [Sè-la̍h

(BCL) 我欲用肥的精牲的燒祭，及公羊的芳味獻互你，閣用公的牛，公的山羊來獻。（細拉）

16

(THR) Hōan-nā kèng-ùi Siōng-tè ê lâng, lín lóng tio̍h lâi thiaⁿ; Góa beh kóng-khí I ūi góa só͘ kiâⁿ ê sū.

(BCL) 凡若敬畏上帝的人，恁攏著來聽！我欲講起伊為我所行的事。

17

(THR) Góa bat ēng góa ê chhùi kiû-kiò I; Ēng góa ê chı̍h o-ló I chòe kôaiⁿ.

(BCL) 我曾用我的嘴求叫伊；用我的舌謳咾伊做高。

18

(THR) Góa nā sim-lāi chù-tiōng chōe-ok, Chú tek-khak bô beh thiaⁿ;

(BCL) 我若心內注重罪惡，主的確無欲聽。

19

(THR) Chóng-sī Siōng-tè sı̍t-chāi ū thiaⁿ-kìⁿ; Í-keng àⁿ-lo̍h thiaⁿ góa kî-tó ê siaⁿ.

(BCL) 總是上帝實在有聽見；已經俯落聽我祈禱的聲。

20

(THR) Siōng-tè sī eng-kai o-ló--ê, I bē-bat the-sî góa ê kî-tó, ia̍h bē-bat hō͘ I ê chû-ài lī-khui góa.

(BCL) 上帝是應該謳咾者！伊未曾推辭我的祈禱，亦未曾互伊的慈愛離開我。

Bible Color Mark

• 台語漢字羅馬本
• 巴克禮全羅