列王記上 第 2 章 - 台語漢字羅馬本

1
大衛欲死的期近啦,就吩咐伊的子所羅門講:
2
「我欲行世間眾人所著行的路。所以,你著勇敢,做大丈夫,
3
守耶和華──你上帝所交代你守的,行伊的道路,守伊的律例、伊的誡命、伊的法度、伊干證的話,照所寫佇摩西律法的冊裡的。按呢,你無論做甚麼,無論對叨落去,攏會亨通。
4
也互耶和華應驗伊所應允我的話講:『你的子孫若謹慎伊的路,盡心盡意誠實行佇我的面前,就你的後裔坐以色列的國位永無斷。』
5
你也知洗魯雅的子約押對我所行的,伊對以色列二個軍長所行的:就是尼珥的子押尼珥及益帖的子亞瑪撒,伊死。伊佇太平的時流的血,親像佇交戰的時一樣,將此個交戰的血染著伊的腰所縖的帶及伊的腳所穿的鞋。
6
所以你著照你的智慧來行,呣通容允伊白頭毛安然落陰間。
7
你著好款待基列人巴西萊許個子,互常常佇你的桌食;因為我閃避你的兄押沙龍的時,按呢款待我。
8
看啊,及你佇的有巴戶琳的便雅憫人,基拉的子示每;我去瑪哈念的日,伊用重的咒詛咒詛我,總是伊有落約但迎接我,我就指耶和華對伊咒誓講:『我無欲用刀你。』
9
今你莫得算伊無罪。因為你是聰明的人,也會知著怎樣款待伊,著互伊白頭毛,流血落陰間。」
10
大衛及伊的列祖相及睏,埋葬佇大衛的城。
11
大衛做以色列王共四十年;佇希伯崙做王七年,佇耶路撒冷做王三十三年。
12
所羅門坐伊的老父大衛的位,伊的國堅固到極。
13
哈及的子亞多尼雅去見所羅門的老母拔示巴,伊問伊講:「你來是平安嗎?」應講:「平安」;
14
閣講:「我有代誌欲對你講。」伊講:「做你講。」
15
亞多尼雅講:「你知國本是我的,以色列眾人也攏意向我,愛我做王,總是,國反轉歸我的小弟,因為是對耶和華互伊。
16
今我有一件事求你,向望你莫得推辭我。」伊講:「做你講。」
17
伊講:「求你對所羅門王講,互伊將書念的查某子亞比煞賞賜我做某,因為王的確無推辭你。」
18
拔示巴講:「好,我替你給王講。」
19
對按呢,拔示巴去見所羅門王,欲為著亞多尼雅給伊講;王起來迎接伊,對伊鞠躬,閣坐伊的位,吩咐人為王的老母設座位,伊就坐佇王的正旁。
20
伊就講:「我有一件小可事求你,請你莫得推辭我。」王給伊講:「我的老母啊,做你講,我無欲推辭你。」
21
伊講:「願用書念的查某囝仔亞比煞互你的兄亞多尼雅做某。」
22
所羅門王應伊的老母講:「你啥事為著亞多尼雅求書念的查某囝仔亞比煞啊?也著替伊求國,因為伊是我的兄,就是著為伊及祭司亞比亞他及洗魯雅的子約押來求。」
23
所羅門王就指耶和華來咒誓講:「亞多尼雅講這話是害家己的生命,若無,願上帝加倍責罰我。
24
耶和華堅固我,互我坐我的父大衛的位,照伊所應允的話給我建立家;我指伊的永活來咒誓,亞多尼雅今仔日的確死。」
25
所羅門王就差耶何耶大的子比拿雅去,伊就拍伊互伊死。
26
王給祭司亞比亞他講:「你著倒去亞拿突你的田園遐!你應該著死,總是今仔日我呣互你死,因為你佇我的父大衛的面前有扛主耶和華的櫃,閣我的老父所受一切的患難,你也及伊受患難。」
27
所羅門就革逐亞比亞他,呣准伊做耶和華的祭司。按呢,就應驗耶和華佇示羅論以利的家所講的話。
28
此個消息傳到約押,約押就走入耶和華的布棚,擒壇角。因為約押雖然無隨押沙龍,總是隨亞多尼雅。
29
有人給所羅門王講:「約押走到耶和華的布棚,今佇壇邊。」所羅門就差耶何耶大的子比拿雅,講:「你去拍伊。」
30
比拿雅到耶和華的布棚,給約押講:「王按呢講,你著出來!」伊應講:「呣啊,我欲死佇遮。」比拿雅去回覆王,講約押按呢講按呢應我。
31
王給伊講:「你通照伊的話行,拍死來埋葬伊,通互約押無因端流人的血彼個罪無歸佇我及我老父的家。
32
耶和華欲用伊的血歸佇伊家己的頭殼;因為伊拍比伊卡義比伊卡好的二人,用刀死伊,就是以色列的軍長尼珥的子押尼珥及猶大的軍長益帖的子亞瑪撒,也我的老父大衛呣知。
33
對按呢,的血欲歸佇約押的頭殼及伊的後裔的頭殼,到永遠;獨獨大衛及伊的後裔,伊的家,伊的位,欲對耶和華得著平安,到永遠。」
34
耶何耶大的子比拿雅就上去,拍死伊,就埋葬伊佇曠野佇伊家己的厝。
35
王就設立耶何耶大的子比拿雅,替約押做軍長,閣設立祭司撒督來替亞比亞他。
36
王差人叫示每來,就給伊講:「你著為家己起厝佇耶路撒冷,徛起佇遐,呣通出遐去別位。
37
因為你著確實知,你出去過汲淪溪,彼日著死!你的血欲歸你家己的頭殼。」
38
示每應王講:「此個話真好!我的主我的王所講的,你的奴僕欲按呢行。」對按呢示每踮佇耶路撒冷多多日。
39
過三年,示每二個奴僕走到迦特王瑪迦的子亞吉遐。有人給示每講:「你看,你的奴僕佇迦特。」
40
示每起來,備辦驢,去迦特到亞吉王遐尋伊的奴僕,示每就去迦特帶伊的奴僕倒來。
41
有人給所羅門講:「示每出耶路撒冷去迦特倒來。」
42
王就差人叫示每來,對伊講:「我豈呣是叫你指耶和華咒誓,閣警戒你講『你著確實知,你出來去外面無論去叨落,彼日你著死』嗎?你應我講:『我聽此個話真好。』
43
今你啥事無執守指耶和華所咒誓的及我所警戒你的命令啊?」
44
王閣給示每講:「你的心所存的歹就是你對阮老父大衛所行的,你家己攏知,所以耶和華欲將你的歹歸你家己的頭殼;
45
總是所羅門王欲得著福氣,閣大衛的國位欲佇耶和華的面前堅固,到永遠。」
46
王就命令耶何耶大的子比拿雅。伊就出去拍互伊死。對按呢,國位堅固佇所羅門的手。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!