彼得前書 第 2 章 - 台語漢字羅馬本

1
所以,恁除去攏總的惡毒,以及攏總的詭譎、及假好、及怨妒,及攏總誹謗的話,
2
就著親像抵仔生的嬰仔欣慕神靈專的奶,互恁對長大到得著救。
3
恁若試著知主是慈善,就著按呢。
4
伊是活石,互人棄拺,若是互上帝揀選、珍重。
5
恁就近伊,也親像活石,起做神靈的厝,做聖的祭司班,來獻神靈的祭,對耶穌基督會互上帝歡喜接納的。
6
因為聖經有記載講:看啊!我用所揀選、所珍重的厝角頭要緊的石下佇郇城;信伊的人不致見誚。
7
按呢,彼個寶貝是歸佇恁信的人,若是佇許個呣信的人就:起厝的師傅所棄拺的石,成做厝角的頭塊石。
8
又閣:做跋倒人的石,礙著人的石磐。呣順趁道理,來跋倒;會到按呢是本定著。
9
獨獨恁是揀選的族,是王也是祭司,是聖的邦國,是上帝家己的百姓,互恁傳報彼個召恁出黑暗入伊美妙的光者的好德。
10
恁前呣是百姓,今是上帝的百姓;前無受憐憫,今有得著憐憫。
11
所疼的兄弟啊,恁做寄腳,出外的人。我勸恁著禁戒肉體的私慾;就是攻擊靈魂的。
12
恁佇外邦中,行做著端正,互看見恁端正的品行,就佇所誹謗恁做行歹的事,通佇鑑察的日歸榮光上帝。
13
恁為著主,著降服見若人所設的,或是王,是上大的,
14
或是官府是伊所差來刑罰歹人謳咾好人的。
15
因為上帝的旨意是按呢,就是恁行好,來塞密戇人的呣知影。
16
做自由的,也呣是用自由做惡毒的遮蓋,就是做上帝的奴僕。
17
著尊敬眾人,疼眾兄弟,驚畏上帝,尊敬君王。
18
做奴僕的,凡事著驚惶順服主人;呣若佇善良溫純的,連佇乖僻的也著按呢。
19
因為人受冤枉,若是為著天良向上帝來擔憂,這是通謳咾。
20
因為恁若犯罪受拍來忍受,有甚麼可取?恁若行好受苦來忍受,這佇上帝的面前是通謳咾。
21
因為恁受召本是欲按呢;因為基督也替恁受苦,留模樣互恁,欲互恁隨伊的腳步。
22
伊無犯罪,嘴內無詭譎。
23
互人罵無倒罵人;受苦無放刁,獨獨將本身交託彼個照公義審判者。
24
伊佇柴裡,親身擔當咱的罪佇伊的身軀,互咱向罪彼面死的人會向義此面來活。對伊的傷痕,恁得著醫好。
25
因為恁前親像羊迷路,若是今歸佇恁靈魂的牧者,也是監督。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!