但以理書 第 7 章 - 台語漢字羅馬本

1

當巴比倫王伯沙撒元年，但以理佇床裡有夢見，心內看見異象，伊就寫彼個夢，講起其中的大意。

2

但以理講：我暝時看見異象，看啊，天裡四面的風忽然起，吹佇大海的頂面。

3

有四隻獸真大隻對海裡起來，款式各無相同：

4

頭一隻親像獅，有鷹鳥的翅；我看見到伊的翅受拔起來，閣佇地上得著扶起來，互伊二支腳徛起來，親像人一樣，也互伊有人的心。

5

看啊，閣一隻獸是第二隻，親像熊，挺起伊身體的一旁，伊的嘴內有三支脅骨含佇嘴齒中。給伊講：「起來，吞食多多肉。」

6

後來我閣看，看啊，閣有一隻獸款式親像豹，尻脊有四個翅親像鳥；此隻獸有四個頭殼，閣有權柄互伊。

7

後來我佇暝時的異象中看，看啊，有第四隻的獸，通驚通，也是不止強，有大支的鐵齒，伊吞咬拆碎，所剩的用腳踏伊。及以前許個獸各樣，閣發十支角。

8

我看許個角，看啊，彼中間有另外發一支細支角；從前許個角的中間有三支角，含根拔起來佇細支角的頭前。看啊，此支角有目睭，親像人的目睭，閣有嘴講大話。

9

我閣看到許個座位排列，有一個對古早就有的坐。伊的衣服白親像雪，伊的頭毛親像真清氣的羊毛。伊的寶座就是火焰，伊的輪親像火。

10

有火親像溪發出，流佇伊的面前；服事伊的有千千，跟隨佇伊的面前的有萬萬；審判的事攏便，冊攏掀開。

11

彼時我因為彼支角所講大話的聲就看伊，看到彼隻獸受，伊的身體受毀壞，佇火裡燒。

12

論到其餘諸個獸，伊的權攏失落，總是的生命猶留，到佇定著的時定著的日期。

13

我佇暝時的異象中看，看啊，有一個親像人的款，坐天頂的雲來到佇彼個對古早就有者，就導伊到伊的面前。

14

就賞賜伊有權柄、榮光、國位，互萬百姓、萬國、萬腔口的人攏服事伊。伊的權柄是永遠的權柄，會無去；伊的國位的確無廢無。

15

我──但以理，心神佇我的內面憂悶，心內的異象互我迫腹，

16

我就去尋許個徛佇邊仔的一個，問伊諸個事的實在。伊就對我講，也解明許個事互我知：

17

彼四隻大獸是四個王欲對地上興起。

18

總是，至高者聖的百姓欲得著國位，長長掌理國權永遠無息。

19

彼時我愛知第四隻獸的實在，伊及許個獸各樣，不止通驚，伊的嘴齒是鐵的，伊的爪是銅的，伊吞咬拆碎，所剩的用腳踏伊；

20

閣愛知伊頭殼所發十支角的實在及彼支另外發的角，互三支角落落佇伊的頭前。就是有目睭，有嘴講大話的角，伊的款式卡強猛伊的同類。

21

我看見此支角及聖的百姓交戰，來卡贏。

22

直到彼個對古早就有者來給至高者聖的百姓判斷，到聖徒得著國位的日期到。

23

伊按呢講：第四隻獸欲做地上的第四國，伊及攏總的國無同，閣欲吞咬全地，欲睭踏伊、拆碎伊。

24

論到彼十支角，就是對彼個國內欲興起十個王，後來另外有一個王興起，及前許個無同；伊欲互三個王降服伊。

25

伊欲講話忤逆至高者，也欲苦楚至高者聖的百姓，也想欲改換節期律法。欲交代伊的手歷過一時、閣二時、閣半時。

26

審判司欲坐位；欲搶奪王的權，毀壞伊、滅無伊，到徹底。

27

普天下的國位、權柄、及列國的威權攏交互至高者聖的百姓。伊的國是永遠的國；見若有權者攏欲服事，順趁伊。

28

此個代誌到遮結局。我──但以理，心內想了迫腹，面也變色，總是我用此個事囥佇心內。