申命記 第 6 章 - 台語漢字羅馬本

1
「這是耶和華──恁的上帝所命令教示恁的誡命、律例、法度,互恁佇恁所欲過去得著做業的地來行伊,
2
通互你及你的子子孫孫一生敬畏耶和華──你的上帝,執守伊一切的律例、誡命。就是我所命令你的,互你的日子得著久長。
3
以色列啊,你著聽,著執守來行伊,互你通佇彼個流奶及蜜的地得著享福,人額加添極其多,親像耶和華──你列祖的上帝所應允你的。
4
「以色列啊,你著聽!耶和華──咱的上帝是獨一的耶和華。
5
你著盡心、盡性、盡力疼耶和華──你的上帝。
6
我今仔日所命令你諸個話著記佇你的心,
7
也著用這勤勤教示你的子兒。無論你坐佇厝內,行佇路裡,睏抑是起來,攏著講論。
8
也著縛佇你的手做記號,戴佇你二蕊目睭的中央做紀念;
9
閣著寫佇你的厝的門豎,以及你的門。」
10
「耶和華──你的上帝導你入伊對你的列祖亞伯拉罕、以撒、雅各咒誓欲互你的地。佇遐有城,大閣娞,呣是你所起造的;
11
也有厝,積聚滿滿的好物,呣是你所積聚的;也有開便的水井,呣是你所開的;也有葡萄園、橄欖樹,呣是你所栽種的;你食到飽。
12
彼時你著謹慎,免得你記得耶和華,就是導你對埃及地、做奴才的家出來的。
13
你著敬畏耶和華──你的上帝,服事伊,指伊的名咒誓。
14
呣通趁別個上帝,就是恁四圍的百姓許個上帝;
15
因為佇恁中間的耶和華──你的上帝,斷斷無容允用別個上帝匹配伊,是驚了耶和華──你的上帝大受氣你,對地上除滅你。
16
「恁呣通試耶和華──恁的上帝,親像恁佇瑪撒試伊一樣。
17
著致意守耶和華──恁上帝的誡命,及伊所命令恁的證據、律例。
18
耶和華所看做正直、做好的,你著行伊,互你通享福,閣通入去得著耶和華對你的列祖所咒誓的好地,
19
欲對你的面前趕出你攏總的對敵,照耶和華所講的。
20
「將來,你的子問你講:『耶和華──咱的上帝所命令恁諸個證據、律例、法度是甚麼意思啊?』
21
你著給你的子講:『前阮佇埃及做法老的奴才;耶和華用大權能的手導阮出埃及,
22
耶和華佇阮的目睭前,用大閣利害的神蹟奇事行佇埃及及法老以及伊的全家,
23
對遐導阮出來,欲導阮入去將伊對咱列祖所咒誓的地,賞賜咱。
24
耶和華命令咱行諸個一切的律例,來敬畏耶和華──咱的上帝,互咱常常得著福氣,得著伊保全咱的生命,親像今仔日的款。
25
咱若照耶和華──咱的上帝所命令的,佇伊的面前照伊一切的誡命來行,這就是咱的義。』」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!