以西結書 第 22 章 - 台語漢字羅馬本

1
耶和華的話閣臨到我講:
2
「人子啊,你欲審問,審問互人流血的城嗎?著互伊知伊一切可惡的事。
3
你著講,主耶和華按呢講:此個城有流人的血佇彼內面,互伊的日子到,閣妝偶像拍垃墋家己,陷害家己。
4
因為你互人流血,就有罪;你妝偶像,是拍垃墋家己,就你互你的日近,你已經到你的年。所以我互你受列國的凌辱,列邦的恥笑。
5
你此個臭名多多擾亂的城啊,許個離開你近、離開你遠者攏欲恥笑你。
6
「看啊,以色列的首領逐個逞伊氣力,佇你中間流人的血。
7
佇你中間有侮慢父母,佇你中間有壓制出外人,佇你中間有虧負孤兒寡婦者。
8
你看輕我的聖物,犯著我的安息日。
9
佇恁中間有誹謗人、欲互人流血者;佇恁中間有佇山頂食祭物,佇恁中間有行淫亂。
10
佇恁中間有露現老父的下體,佇恁中間有凌辱月經無清氣的婦仁人者。
11
有人及厝邊的某行可惡的事;也有人淫伊的媳婦來拍垃墋伊;佇恁中間亦有人凌辱伊的姊妹就是伊的老父的查某子。
12
佇恁中間有受賄賂來流人的血;你亦有提利錢討利息。你因為貪心,勒索厝邊得著財利,竟然記得我。這是主耶和華講的。
13
「看啊,我因為你所得不義的錢,及你中間所流的血,我就拍手。
14
到我辦你的日,你的心猶會忍受嗎?你的手猶會有力嗎?我──耶和華講此個話,就欲照按呢行。
15
我欲分散你佇列國,四散你佇列邦。我欲除你中間的污穢。
16
你欲佇列國人的面前,因為家己所行的受褻瀆,你就知我是耶和華。」
17
耶和華的話臨到我講:
18
「人子啊,以色列家在我看是渣滓。攏是火爐中的銅、錫、鐵、鉛,是銀的渣滓。
19
所以主耶和華按呢講:因為恁攏成做渣滓,看啊,我欲聚集恁佇耶路撒冷的中間。
20
人怎樣將銀、銅、鐵、鉛、錫,聚集佇火爐中,牽火互伊鎔;按呢,我亦欲用我的受氣及大受氣,聚集恁下恁佇遐,來鎔化恁。
21
我欲聚集恁,用我大受氣的火歕恁,恁就佇彼中間鎔化。
22
銀怎樣鎔佇火爐中,恁亦欲按呢鎔佇彼中間,恁就知我──耶和華傾出我的大受氣佇恁的頂面。」
23
耶和華的話臨到我講:
24
「人子啊,你著對此個地講:你是未得著清氣的地,佇大受氣的日亦無落雨佇你遐。
25
伊中間的先知攏結黨,親像噤噤哮的獅抓著所搶的物。吞食人的神魂,搶人的貨財寶物,互的中間的守寡人閣卡多。
26
伊的祭司改斜我的律法,褻瀆我的聖所,無分別聖的及粗俗的,亦無互人分別無清氣的及清氣的,閣掩目睭呣看我諸個安息日;我亦佇中間受褻瀆。
27
伊的貴族親像豺狼抓著所搶的物,人流血,傷害人的生命,愛得著不義的錢。
28
伊的先知親像用灰水給筅白,看虛假的異像,用白賊給占卜,講:『主耶和華按呢講』,其實耶和華無影講。
29
國內的百姓一味行壓制,慣練搶人,虧負喪鄉困苦者,無情理欺壓出外人。
30
我佇中間尋看有一人通來圍牆,佇我的面前為著此個國徛佇破隙的所在,互我無剿滅伊,總是尋無一個。
31
所以我用我的痛恨傾佇的頂面,用我大受氣的火滅,照所行的報應佇的頭殼頂。這是主耶和華講的。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!