以賽亞書 第 42 章 - 台語漢字羅馬本

1
看啊,我的奴僕──我所扶持的,我所揀選的、我的心所歡喜者!我有將我的神互伊;伊欲將公理傳互外邦。
2
伊無喧嘩,無出聲,亦無互街路裡聽見伊的聲。
3
受傷的蘆葦,伊無遏折;欲熄的燈火,伊無拍熄。伊照真實將公理傳報。
4
伊無凊心,亦無失膽,致到伊佇地上設立公理;海嶼攏聽候伊的教示。
5
耶和華上帝,創造諸個天來展開伊,開闊地及伊所出的,用活氣互地上的眾百姓,用神魂互行佇彼頂面的人的,講:
6
我──耶和華用公義召你,欲牽你的手,保守你,互你做百姓的約的中保,做外邦人的光,
7
來開睛暝的目睭,導受關者出監,互踮佇黑暗者出監牢。
8
我是耶和華,這是我的名;我無將我的榮光歸互別個神,亦無將我的名聲歸互雕刻的偶像。
9
看啊,前的事已經成,今我亦欲將新的事講明,諸個事未發起以前,我就講互恁聽。
10
過海的及海內所有的,海嶼及其中徛起的百姓,攏著向耶和華唱新的歌,對地極謳咾伊。
11
曠野及其中的城,及基達人徛起的鄉社攏著出聲;西拉徛起的百姓著唱歌,佇山頂的著出大聲。
12
著將榮光歸互耶和華,佇海嶼中報揚伊的名聲。
13
耶和華欲親像勇猛的人出去,欲親像交戰的人激動熱心,欲喉叫,大聲喝,欲用大氣力攻擊伊的對敵。
14
我久久無開嘴,靜靜家己遏止;今我欲喉叫,親像欲生的婦仁人;我欲哈哈喘接氣。
15
我欲互大山小山變做拋荒,互彼頂面的花草攏枯焦;我欲互江河變做洲嶼,互水池攏乾去。
16
我欲導睛暝者行呣識的道路,導行呣識的路徑;佇的面前互黑暗變做光明,互彎曲變做平直。諸個事我攏欲行,亦無放拺。
17
倚靠雕刻的偶像,對鑄造的偶像講:你是阮的上帝;此號人受趕走,大見誚。
18
恁臭耳聾者,著聽!恁睛暝者,著看!互恁會看見。
19
我的奴僕以外是誰睛暝啊?是誰臭耳聾親像我所差的使者啊?是誰睛暝親像彼個及我和好者?抑是睛暝親像耶和華的奴僕啊?
20
你看見多多代誌亦無注意,開耳孔也無聽見。
21
耶和華因為家己的公義,歡喜互律法做大,做尊貴。
22
總是此個百姓是受搶奪者,佇山穴受當著,關密佇監裡;互人掠著,無人拯救,互人搶掠去,無人講放伊倒去。
23
恁中間是誰肯俯耳孔聽這,是誰肯留心,後來聽趁伊啊?
24
是誰將雅各交伊互人搶,將以色列交賊啊?豈呣是耶和華,咱所得罪的嗎?呣肯行伊的道路,亦呣肯聽趁伊的律法。
25
所以,伊將猛烈的受氣及爭戰的兇猛傾佇伊的身上。佇伊的四圍親像火,伊猶呣知,火燒著伊,伊亦無掛意。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!