以賽亞書 第 64 章 - 台語漢字羅馬本

1
願你離開天來降臨;互諸個山振動佇你的面前──
2
親像火燒乾柴,親像火互水滾,互你的對敵知你的名,互列國佇你的面前愕愕惙!
3
你曾行通驚的事阮所無拍算。彼時你降臨,諸個山振動佇你的面前。
4
對古早以來,人未曾聽見、耳孔未曾聽見、目睭未曾看見,佇你以外有甚麼上帝為著聽候伊的人行代誌。
5
你迎接彼個歡喜行義、及記念你的道路的人;看啊,你曾受氣,阮曾犯罪;親像按呢已經久,阮猶會得著救嗎?
6
阮攏親像無清氣的人;所有的義攏親像污穢的衫。阮攏親像樹葉漸漸乾去;阮的罪過親像風給阮吹去。
7
閣無人求叫你的名;無人出力擒住你。因為你掩面呣看阮,互阮因為阮的罪過致到消無。
8
耶和華啊,今你猶原是阮的父!阮是土,你是燒磁師傅;阮攏是你的手所造者。
9
耶和華啊,你呣通大受氣,亦呣通永遠記念罪過。求你俯落來看,阮攏是你的百姓。
10
你諸個聖城變做曠野。錫安變做曠野;耶路撒冷成做拋荒。
11
阮聖閣娞的厝──就是阮的列祖謳咾你的所在互火燒燎去;阮所欣慕的攏荒廢。
12
耶和華啊,有諸個事,你猶忍會住嗎?你猶靜靜,互阮深深受苦難嗎?

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!