路加福音 第 9 章 - 台語漢字羅馬本

1
耶穌叫十二個學生攏來,互有能力、權柄,會制壓攏總的鬼,醫好病症,
2
就差去傳上帝的國,醫好破病人,
3
閣對講:「莫得帶路費,莫得枴仔,莫得褡褳,莫得乾糧,莫得銀,也莫得二領衫。
4
見所入的厝,著住佇遐,也著對遐起身。
5
凡若呣接納恁的,出的城的時,著拂去恁腳裡的土粉,來干證。」
6
學生就出去,遍行許個鄉社傳福音,逐所在醫病。
7
分封的人君希律聽見一切的事,就不止躊躇;因為有人講:「約翰對死人中復活」;
8
有的講:「以利亞出現」;也有的講:「古早的先知一人復活。」
9
若是希律講:「約翰我已經給伊頭,今我聽見伊此號事,這是甚麼人?」就尋機會愛看見伊。
10
使徒倒來,將所行的排列互耶穌聽,耶穌就導退開,到一個城,名伯賽大。
11
若是眾人知,就隨伊;伊接納,對講論上帝的國,凡若欠用醫病就給伊醫。
12
日欲落,十二個學生來給伊講:「請四散眾人,互去四圍的鄉社及山場投歇設法食,因為咱遮是曠野的所在。」
13
耶穌對講:「恁互食!」講:「阮若無去替諸個眾人買食,就不過有五個餅,二尾魚若定。」
14
因為許個人約略有五千。耶穌對學生講:「互眾人坐歸列,每列五十人。」
15
學生照按呢行,互眾人攏坐。
16
耶穌提五個餅,二尾魚,向天祝謝,來擘伊,互學生排佇眾人的面前。
17
攏食夠飽,拾所剩的屑仔十二筐。
18
耶穌家己祈禱,學生及伊佇遐。伊就問講:「眾人講我是是誰?」
19
應講:「是行洗禮的約翰;也有人講是以利亞;閣有人講是古早的先知一人復活。」
20
伊給講:「若是恁講我是是誰?」彼得應講;「是上帝的基督。」
21
伊就禁戒,莫得將這給人講,
22
續講:「人子的確著受多多艱苦,互諸個長老、祭司頭、經學士所棄拺,閣受害死,第三日復活。」
23
閣對眾人講:「若有人愛隨我,就著看無家己,日日夯伊的十字架來隨我。
24
因為見若愛救伊的生命的,欲失落伊;總是見若為著我來失落伊的生命的,欲救伊。
25
因為人若得著全世界,來失落家己,損壞家己,有甚麼利益啊?
26
見若掠我及我的話來做見誚的,人子用家己及父及聖天使的榮光來的時,也欲掠彼人做見誚。
27
我真實給恁講,徛佇遮的,有人猶未死,欲看見上帝的國。」
28
講諸個話了後差不多八日,耶穌帶彼得、約翰、雅各相及上山祈禱。
29
祈禱的時,伊的面貌有各樣,伊的衫白閣光爁爁。
30
忽然有二人及伊講話,就是摩西、以利亞;
31
佇榮光出現,談論伊的過世,就是伊佇耶路撒冷所欲歷過的。
32
彼得及同佇的人厭倦眠去,到精神,就看見耶穌的榮光,以及及伊徛彼二人。
33
當彼二人離別伊的時,彼得對耶穌講:「先生,咱佇遮真好!阮來搭三間寮仔,一間互你,一間互摩西,一間互以利亞。」是呣知伊所講的。
34
講諸個話的時,有雲罩;入佇雲內就驚。
35
有聲對雲裡出,講:「此個是我的子,我所揀的,恁著聽伊。」
36
彼個聲已經出,就看見耶穌家己佇。學生靜靜,彼時無將所看見的給人講。
37
隔日,落山的時,有歸陣人來接伊。
38
從中有一人大聲叫講:「先生啊!求你看我的子,伊是我孤生的。
39
有神掠伊就連鞭喉叫;互伊抽惙到流涎,閣重重傷伊,離開伊實在。
40
我曾求你的學生趕伊,也會。」
41
耶穌應講:「嗐啊!呣信閣悖逆的世代啊,我及恁住,吞恁欲到偌久啊?著導你的子來遮!」
42
來的時,鬼摔互伊倒,互伊大抽惙。耶穌就責備邪神,醫好彼個囝仔,交互伊的老父。
43
眾人攏卬愕上帝的大威嚴。眾人奇怪伊所做攏總的事,彼時,耶穌對伊的學生講:
44
「諸個話恁著聽去落耳,因為人子欲抵著解送佇人的手。」
45
學生曉悟此個話,是對隱密,互明白,也呣敢用此個話問伊。
46
學生中生起辯論,看是誰欲最大。
47
若是耶穌看出心內所辯論,就牽一個囝仔,互伊徛佇身邊,
48
才給講:「見若為著我的名接納此個囝仔的,就是接納我;見若接納我的,是接納差我的。因為恁眾人的中間第一微細的,伊是做大的。」
49
約翰應講:「先生,阮曾看見一人用你的名趕鬼,阮就禁止伊,因為伊無及阮隨你。」
50
耶穌對伊講:「莫得禁止伊;因為見若無攻擊恁的,就是為恁。」
51
耶穌受接接上天的日期欲到,就決意向耶路撒冷來行,
52
差使者做頭去。去入撒瑪利亞人一個鄉社,欲給伊備辦。
53
若是呣接納伊,因為伊向耶路撒冷行。
54
伊的學生雅各、約翰看見按呢,就講:「主啊,你愛阮叫火對天落來滅嗎?」
55
耶穌越轉身責備。
56
大家就去別個鄉社。
57
行路的時,有人對耶穌講:「你無論叨落去,我欲隨你。」
58
耶穌給伊講:「狐狸有孔,天中的飛鳥有巢,獨獨人子無靠頭殼的所在。」
59
閣對一人講:「隨我!」彼人講:「主啊,互我倒去先埋葬我的老父。」
60
耶穌給伊講:「出在死人埋葬的死人,若是你著去傳報上帝的國。」
61
閣一人講:「主啊,我欲隨你,總是准我先去及家內的人相辭。」
62
耶穌對伊講:「見若手按犁尾來看後面的,無合佇上帝的國。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!