詩篇 第 90 章 - 台語漢字羅馬本

1
〔上帝的人摩西的祈禱。〕主啊,你逐世代做阮徛起的所在。
2
諸個山猶未生出,地及世界你猶未造成,對永遠到永遠,你是上帝。
3
你互人歸土,講:恁世間人著越倒轉。
4
因為在你看,一千年親像已經過去的昨日,閣親像暝間的一更。
5
你親像用大水給流去;親像睏一醒。早起時,親像發生的草,
6
早起時發生茂盛,下昏時收割就枯焦。
7
因為阮對你的受氣就消滅,閣阮對你的發性來驚惶。
8
你將阮的罪惡排佇你的面前,將阮隱密的歹排佇你的面的光明中。
9
阮的日子攏經過佇你的大受氣;阮的年歲過了親像吐一個氣。
10
阮一生的年日是七十歲,若是勇壯通到八十歲;總是其中所誇口的不過是勞苦憂愁,伊緊緊過,阮就飛去。
11
是誰知你受氣的權勢?亦照你應該受的敬畏知你的受氣啊?
12
求你教示阮怎樣算家己的日子,互阮得著智慧的心。
13
耶和華啊,欲到底時呢?求你倒轉,為著你的奴僕來回心。
14
求你早起時用你的慈愛互阮滿足,互阮一世人歡喜快樂。
15
求你照你苦楚阮的日,照阮抵著患難的年,互阮歡喜。
16
願你的所做對你的奴僕顯現;你的榮光對的子孫顯明。
17
願主──阮的上帝的美妙踮佇阮的頂面。願你堅固阮的手所做的工;阮的手所做的工,願你堅固伊。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!