啟示錄 第 3 章 - 台語漢字羅馬本

1
「你著寫批互佇撒狄的教會的使者,講:『有上帝的七個神及七粒星的,伊的話講:我知你的所做,你名是活,實是死。
2
你著警醒,堅固許個其餘欲死的事;因為我看見你的行做,佇我上帝的面前,無一項完全。
3
所以你著記得你有怎樣受、怎樣聽,閣著執守,亦著反悔。設使呣警醒,我欲親像賊來,你呣知我甚麼時欲來到佇你。
4
總是佇撒狄,你猶有幾若名未曾拍垃墋的衫,欲穿白衫及我四界行,因為是會堪得的。
5
得勝的人亦欲按呢穿白衫,伊的名佇活命的冊,我決斷無擦起來;是欲認伊的名佇我的父的面前,以及伊許個天使的面前。
6
有耳孔的,著聽聖神給諸個教會所講的。』」
7
「你著寫批互佇非拉鐵非的教會的使者,講:『是聖、是真、有大衛的鎖匙、開就無人會關、關就無人會開的,伊的話講:
8
我知你的所做,你看,我佇你的面前已經有給你開門,是無人會關的。因為你有淡薄氣力,已經守我的道理,未曾呣認我的名。
9
撒但的會,家己講是猶太人,其實呣是,是講白賊的,我欲賞賜你互來仆佇你的腳前,閣互知我已經疼你。
10
因為你已經守我吞的道理,我亦欲守你脫離彼個試煉的時,此個時欲到佇天下,來試煉攏總徛起佇地上的人。
11
我緊緊到,你所有的著持守伊,免得有人搶你的冕旒。
12
得勝的人,我欲互伊做柱佇我上帝的殿內,決斷無閣出去外面。我亦欲將我上帝的名以及我上帝的城(新的耶路撒冷對天、對我的上帝降落者的名),閣用我新的名,攏寫佇伊的頂面。
13
有耳孔的,著聽聖神給諸個教會所講的。』」
14
「你著寫批互佇老底嘉的教會的使者,講:『做阿們,做忠信真實的干證,做上帝造化的源頭的,伊的話講:
15
我知你的所做,你是無冷無熱;我願你或是冷或是熱。
16
你既然是略溫燒,呣成熱呣成冷,我欲吐你出我的嘴。
17
因為你家己講:我是好額,已經發財,攏無欠缺;也呣知你是困苦、可憐、喪鄉、睛暝、褪裼。
18
我替你想著對我買過火鍛煉的金,通得著好額;閣買白衫通穿,互你無露現褪裼的見誚;閣買藥膏來抹你的目睭,互你會看見。
19
見若我所疼的人,我責備來警戒伊;所以著奮志來反悔。
20
我徛佇門外拍門,聽見我的聲來開的人,我欲入去就近伊,來及伊食,伊亦及我食。
21
得勝的人,我欲互伊及我同坐佇我的座位,親像我得勝,來及我的父同坐佇伊的座位一樣。
22
有耳孔的,著聽聖神給諸個教會所講的。』」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!