列王紀下 第 22 章

1

(THR) Iok-se-a chē-ūi ê sî poeh-hè, tī Iâ-lō͘-sat-léng chòe-ông kiōng saⁿ-cha̍p-it nî. I ê lāu-bú miâ kiò Iâ-tí-tāi, sī Pho-su-ka lâng A-tāi-ngá ê cha-bó͘-kiáⁿ.

(BCL) 約西亞坐位的時八歲，佇耶路撒冷做王共三十一年。伊的老母名叫耶底大，是波斯加人亞大雅的查某子。

2

(THR) I kiâⁿ Iâ-hô-hoa só͘ khòaⁿ-chòe hó ê sū, kiâⁿ i ê chó͘ Tāi-pı̍t it-chhè ê lō͘, bô phian chó-iū.

(BCL) 伊行耶和華所看做好的事，行伊的祖大衛一切的路，無偏左右。

3

(THR) Iok-se-a cha̍p-poeh nî, ông chhe Bí-su-lân ê sun, A-sat-lī ê kiáⁿ, su-kì Sa-hoan, kàu Iâ-hô-hoa ê tiān, hoan-hù i kóng,

(BCL) 約西亞十八年，王差米書蘭的孫、亞薩利的子──書記沙番到耶和華的殿，吩咐伊講：

4

(THR) Lí chiūⁿ-khì kìⁿ chè-si-thâu Hi-le̍k-ka, kah i sǹg hiah ê tòa jı̍p Iâ-hô-hoa tiān ê gûn, chiū-sī kóan-mn̂g--ê tùi peh-sìⁿ só͘ siu--ê;

(BCL) 「你上去見祭司頭希勒家，教伊算許個帶入耶和華殿的銀，就是管門者對百姓所收的，

5

(THR) hō͘ in kau-hō͘ chòe-kang lâng, chiū-sī kóan-lí Iâ-hô-hoa tiān ê, hō͘ in chóan-kau Iâ-hô-hoa tiān-lāi chòe-kang ê lâng, thang siu-lí tiān phòa-hōai ê só͘-chāi;

(BCL) 互交互做工人，就是管理耶和華殿的，互轉交耶和華殿內做工的人，通修理殿破壞的所在，

6

(THR) chiū-sī chóan-kau ba̍k-chhiūⁿ, khí-chō ê kap thô͘-chhiūⁿ, koh bóe chhâ-liāu, kap kè-phah ê chio̍h, lâi siu-lí tiān.

(BCL) 就是轉交木匠，起造的，及土匠，閣買柴料，及過拍的石，來修理殿，

7

(THR) Chóng-sī kau-kè in ê chhiú ê gûn, bô kap in sǹg; in-ūi in chòe tāi-chì sêng-sı̍t.

(BCL) 總是交過的手的銀，無及算，因為做代誌誠實。」

8

(THR) Chè-si-thâu Hi-le̍k-ka kā su-kì Sa-hoan kóng, Góa tī Iâ-hô-hoa tiān-lāi ngó͘-jiân tit-tio̍h lu̍t-hoat ê chheh. Hi-le̍k-ka chiong chheh kau-hō͘ Sa-hoan, Sa-hoan chiū tha̍k i.

(BCL) 祭司頭希勒家給書記沙番講：「我佇耶和華殿內偶然得著律法的冊。」希勒家將冊交互沙番，沙番就讀伊。

9

(THR) Su-kì Sa-hoan kàu ông hia, hê-hok ông kóng, Lí ê lô͘-po̍k í-keng chiong só͘ tit-tio̍h tī tiān-lāi ê gûn piàⁿ-chhut-lâi, kau hō͘ pān-lí Iâ-hô-hoa tiān ê chòe-kang lâng.

(BCL) 書記沙番到王遐，回覆王講：「你的奴僕已經將所得著佇殿內的銀傾出來，交互辦理耶和華殿的做工人。」

10

(THR) Su-kì Sa-hoan koh kā ông kóng, Chè-si Hi-le̍k-ka ū the̍h chı̍t pún chheh hō͘ góa. Sa-hoan chiū tī ông ê bīn-chêng tha̍k i.

(BCL) 書記沙番閣給王講：「祭司希勒家有提一本冊互我。」沙番就佇王的面前讀伊。

11

(THR) Ông thiaⁿ-kìⁿ lu̍t-hoat chheh ê ōe, chiū thiah-lı̍h i ê saⁿ.

(BCL) 王聽見律法冊的話，就拆裂伊的衫，

12

(THR) Ông hoan-hù chè-si Hi-le̍k-ka, kap Sa-hoan ê kiáⁿ A-hi-kam, Bí-kai-a ê kiáⁿ A-kek-pho, su-kì Sa-hoan, kap ông ê kūn-sîn A-sat-ngá, kóng,

(BCL) 王吩咐祭司希勒家及沙番的子亞希甘、米該亞之子亞革波、書記沙番及王的近臣亞撒雅，講：

13

(THR) Lín khì, ūi góa , ūi peh-sìⁿ, ūi Iû-tāi chèng-lâng, chiong só͘ khioh-tio̍h chit pún chheh ê ōe mn̄g Iâ-hô-hoa; in-ūi Iâ-hô-hoa tōa siū-khì lán, sī in-ūi lán ê lia̍t-chó͘ bô thiaⁿ-thàn chit ê chheh ê ōe, bô chiàu it-chhè só͘ kì-chài lūn lán-ê lâi kiâⁿ.

(BCL) 「恁去為我、為百姓、為猶大眾人，將所拾著此本冊的話問耶和華；因為耶和華大受氣咱，是因為咱的列祖無聽趁此個冊的話，無照一切所記載論咱的來行。」

14

(THR) Tùi án-ni chè-si Hi-le̍k-ka, kap A-hi-kam, A-kek-pho, Sa-hoan, A-sat-ngá, lóng khì kìⁿ lú sian-ti Hō͘-le̍k-tāi. I sī Hap-jíⁿ-hap-su ê sun, Tek-óa ê kiáⁿ, kóan-lí lé-ho̍k hit ê Sa-liông ê bó͘; i tiàm tī Iâ-lō͘-sat-léng tē-jī khu. In kap i kóng.

(BCL) 對按呢，祭司希勒家及亞希甘、亞革波、沙番、亞撒雅攏去見女先知戶勒大。伊是哈珥哈斯的孫、特瓦的子；管理禮服彼個沙龍的某。伊踮佇耶路撒冷第二區。及伊講。

15

(THR) I kā in kóng, Iâ-hô-hoa Í-sek-lia̍t ê Siōng-tè án-ni kóng, Lín khì hê-hok hit ê chhe lín lâi kìⁿ góa ê lâng, kóng,

(BCL) 伊給講：「耶和華──以色列的上帝按呢講：『恁去回覆彼個差恁來見我的人講，

16

(THR) Iâ-hô-hoa án-ni kóng, Khòaⁿ ah, Góa beh kàng chai-ē tī chit só͘-chāi kap tī-chia khiā-khí ê peh-sìⁿ, chiū-sī Iû-tāi ông só͘ tha̍k hit pún chheh ê ōe.

(BCL) 耶和華按呢講：看啊我欲降災禍佇此所在及佇遮徛起的百姓，就是猶大王所讀彼本冊的話。

17

(THR) In-ūi in khì-sak Góa, sio-hiuⁿ tī pa̍t ê siōng-tè, ēng in ê chhiú só͘-chòe--ê kek Góa ê siū-khì; só͘-í Góa siū-khì chit só͘-chāi, chhin-chhiūⁿ hé to̍h bô soah.

(BCL) 因為棄拺我，燒香佇別個上帝，用的手所做的激我的受氣，所以我受氣此所在，親像火無息，』

18

(THR) Chóng-sī chhe lín lâi mn̄g Iâ-hô-hoa ê Iû-tāi ông, lín tio̍h án-ni kā i kóng, Iâ-hô-hoa Í-sek-lia̍t ê Siōng-tè án-ni kóng, Lūn-kàu lí só͘ thiaⁿ-kìⁿ ê ōe,

(BCL) 總是，差恁來問耶和華的猶大王，恁著按呢給伊講：『耶和華──以色列的上帝按呢講：論到你所聽見的話，

19

(THR) chiū-sī thiaⁿ-kìⁿ Góa kong-kek chit só͘-chāi kap khiā-khí tī-chia ê peh-sìⁿ, só͘ kóng beh hō͘ i pha-hng siū chiù-chó͘; lí ê sim chiū nńg, lí ka-kī khiam-pi tī Iâ-hô-hoa ê bīn-chêng, koh thiah-lı̍h lí ê saⁿ, tī Góa ê bīn-chêng thî-khàu, Góa iā ū thiaⁿ-kìⁿ, che sī Iâ-hô-hoa kóng ê.

(BCL) 就是聽見我攻擊此所在及徛起佇遮的百姓所講、欲互伊拋荒受咒詛，你的心就軟，你家己謙卑佇耶和華的面前，閣拆裂你的衫，佇我的面前啼哭，我也有聽見，這是耶和華講的。

20

(THR) Só͘-í Góa beh hō͘ lí kui lí ê lia̍t-chó͘, lí beh pêng-an kui-bōng; Góa só͘ beh kàng-lo̍h tī chit só͘-chāi it-chhè ê chai-ē, lí ê ba̍k-chiu tek-khak bōe khòaⁿ-kìⁿ. In chiū tò-tńg--khì hê-hok ông.

(BCL) 所以我欲互你歸你的列祖，你欲平安歸墓；我所欲降落佇此所在一切的災禍，你的目睭的確看見。』」就倒轉去回覆王。

Bible Color Mark

• 台語漢字羅馬本
• 巴克禮全羅