創世記 第 19 章

1

(THR) Jı̍t-àm, hit nn̄g ê sù-chiá kàu Só͘-to-má; Lô-tek chē tī Só͘-to-má siâⁿ-mn̂g-nı̍h; Lô-tek khòaⁿ-kìⁿ in, chiū khí-lâi ngiâ-chih in; kiok-kiong bīn ǹg tōe,

(BCL) 日暗，彼二個使者到所多瑪；羅得坐佇所多瑪城門裡，羅得看見，就起來迎接，鞠躬面向地，

2

(THR) kóng, Góa ê chú ah, chhiáⁿ oat lâi lô͘-po̍k ê chhù hioh-mî, sóe-kha; bîn-á-chá-khí khí-lâi, kiâⁿ lín ê lō͘. In kóng, M̄-bián; góan beh tī tōa koe-bīn kè-mî.

(BCL) 講：「我的主啊，請越來奴僕的厝歇暝洗腳，明仔早起起來行恁的路。」講：「呣免！阮欲佇大街面過暝。」

3

(THR) Lô-tek chhiat-chhiat chhiáⁿ in; in chiah o̍at-tńg-kha, oat-jı̍p i ê chhù; Lô-tek ūi in pī-pān iân-sia̍h, pek bû-kàⁿ-piáⁿ; in chiū chia̍h.

(BCL) 羅得切切請，才越轉腳，越入伊的厝。羅得為備辦筵席，無酵餅就食。

4

(THR) In iáu-bē khì khùn, siâⁿ-lāi ê lâng, chiū-sī Só͘-to-má lâng, tùi siàu-liân kàu lāu, sì-bīn lâi ûi i ê chhù;

(BCL) 猶未去睏，城內的人就是所多瑪人，對少年到老，四面來圍伊的厝，

5

(THR) kiò Lô-tek kóng, Kin-àm kàu lí chia ê lâng tī tah-lo̍h? hō͘ in chhut-lâi, chiàu góan só͘ ài chòe.

(BCL) 叫羅得講：「今暗到你遮的人佇叨落？互出來，照阮所愛做。」

6

(THR) Lô-tek chhut-khì kàu mn̂g-gōa, chèng-lâng hia, chiū chiong mn̂g koaiⁿ-teh;

(BCL) 羅得出去到門外眾人遐，就將門關，

7

(THR) kóng, Hiaⁿ-tī ah, chhiáⁿ lín bo̍h-tit chòe chit-hō pháiⁿ;

(BCL) 講：「兄弟啊！請恁莫得做此號歹。

8

(THR) lí khòaⁿ, góa ū nn̄g ê cha-bó͘-kiáⁿ, iáu sī chāi-sek-lú; iông-ún góa chhōa-chhut-lâi, chhut-chāi lín só͘ ài lâi kiâⁿ; to̍k-to̍k chit nn̄g-lâng, í-keng kàu góa ê chhù, m̄-thang tùi in chòe sím-mı̍h.

(BCL) 你看，我有二個查某子，猶是在室女，容允我導出來，出在恁所愛來行；獨獨此二人已經到我的厝，呣通對做甚麼。」

9

(THR) Chèng-lâng kóng, Lí thè-khì. Koh kóng, Chit-lâng kià-ku tī-chia, sòa beh kóan-hat góan mah? taⁿ góan beh hāi lí pí hāi in khah siong-tiōng. Chiū oe-khoeh Lô-tek, chìn-chêng beh kong-phòa i ê mn̂g.

(BCL) 眾人講：「你退去！」閣講：「此人寄居佇遮，續欲管轄阮嗎？今阮欲害你比害卡傷重。」就挨夾羅得，進前欲攻破伊的門。

10

(THR) Chóng-sī hit nn̄g-lâng chhun-chhiú, khan Lô-tek jı̍p chhù, chiong mn̂g koaiⁿ-khì.

(BCL) 總是彼二人伸手，牽羅得入厝，將門關起，

11

(THR) Koh hō͘ mn̂g-gōa ê lâng, tùi sòe kàu tōa, ba̍k-chiu ian-n̄g, lóng bōe khòaⁿ-kìⁿ; chhē kàu siān chhē bô mn̂g.

(BCL) 閣互門外的人，對細到大，目睭煙暈，攏看見；尋到倦尋無門。

12

(THR) Hit nn̄g-lâng tùi Lô-tek kóng, Lí tī-chia iáu ū sím-mı̍h lâng? he̍k-sī kiáⁿ-sài, he̍k-sī kiáⁿ, he̍k-sī cha-bó͘-kiáⁿ, í-kı̍p siâⁿ-lāi it-chhè sio̍k lí ê lâng; lí tio̍h hō͘ in lóng chhut chit só͘-chāi.

(BCL) 彼二人對羅得講：「你佇遮猶有甚麼人？或是子婿或是子或是查某子，以及城內一切屬你的人，你著互攏出此所在。

13

(THR) In-ūi góan beh châu-bia̍t chit ê só͘-chāi, sī ūi-tio̍h in hoah-hiàm ê siaⁿ tī Iâ-hô-hoa ê bīn-chêng chin-tōa; Iâ-hô-hoa chhe góan lâi beh châu-bia̍t-i.

(BCL) 因為阮欲剿滅此個所在；是為著喝喊的聲佇耶和華的面前真大，耶和華差阮來，欲剿滅伊。」

14

(THR) Lô-tek chhut-khì, tùi chhōa i ê cha-bó͘-kiáⁿ ê kiáⁿ-sài kóng, Lín khí-lâi, lī-khui chia; in-ūi Iâ-hô-hoa beh bia̍t-bô chit ê siâⁿ; i ê kiáⁿ-sài lia̍h-chòe i sī kóng-chhiò.

(BCL) 羅得出去，對娶伊的查某子的子婿講：「恁起來離開遮，因為耶和華欲滅無此個城。」伊的子婿掠做伊是講笑。

15

(THR) Thiⁿ-kng sù-chiá chhui-pek Lô-tek kóng, Khí-lâi, chhōa lí ê bó͘, í-kı̍p lí tī-chia nn̄g ê cha-bó͘-kiáⁿ khì; kiaⁿ-liáu kap chit ê siâⁿ ê chōe-ok saⁿ-kap siū bia̍t-bô.

(BCL) 天光，使者催迫羅得講：「起來！導你的某以及你佇遮二個查某子去，驚了及此個城的罪惡相及受滅無。」

16

(THR) Lô-tek iân-chhiân; hit nn̄g-lâng, in-ūi Iâ-hô-hoa lîn-bín Lô-tek, chiū khan i ê chhiú, kap i ê bó͘ ê chhiú, kap i nn̄g ê cha-bó͘-kiáⁿ ê chhiú, chiong i chhōa-chhut, an-tì tī siâⁿ-gōa.

(BCL) 羅得延延。彼二人因為耶和華憐憫羅得，就牽伊的手及伊的某的手，及伊二個查某子的手，將伊導出，安置佇城外；

17

(THR) Chhōa in chhut-khì liáu, kóng, Lí tio̍h tô-miā, m̄-thang o̍at-thâu khòaⁿ, ia̍h m̄-thang tòa tī Pîⁿ-iûⁿ; tio̍h cháu-khì soaⁿ-nı̍h, kiaⁿ-liáu siū bia̍t-bô.

(BCL) 導出去了，講：「你著逃命，呣通越頭看，亦呣通住佇平洋。著走去山裡，驚了受滅無。」

18

(THR) Lô-tek tùi in kóng, Góa ê chú ah, m̄-thang án-ni.

(BCL) 羅得對講：「我的主啊！呣通按呢！

19

(THR) Lí khòaⁿ, lí ê lô͘-po̍k í-keng tit-tio̍h un-tián tī lí ê bīn-chêng, lí ia̍h tùi góa hián-chhut ke̍k-tōa ê jîn-chû, kiù góa ê sìⁿ-miā; góa bōe-ōe cháu kàu soaⁿ-nı̍h, kiaⁿ-liáu chit ê chai-ē kàu tī góa, góa chiū sí.

(BCL) 你看，你的奴僕已經得著恩典佇你的面前；你亦對我顯出極大的仁慈，救我的性命。我會走到山裡，驚了此個災禍到佇我，我就死。

20

(THR) Lí khòaⁿ, chit ê siâⁿ kūn-kūn thang tô-cháu, ia̍h sī sòe; chhiáⁿ iông-ún góa tô-siám tī-hia, lâi pó-chôan góa ê o̍ah-miā; chit ê siâⁿ kiám m̄-sī sòe-ê mah?

(BCL) 你看，此個城近近通逃走，也是細，請容允我逃閃佇遐，來保全我的活命。此個城豈呣是細個嗎？」

21

(THR) I tùi i kóng, Chit ê tāi-chì, góa ia̍h ún-chún lí; lí só͘ kóng ê siâⁿ, góa bô beh chhia-tó.

(BCL) 伊對伊講：「此個代誌我亦允准你；你所講的城我無欲捙倒。

22

(THR) Lí tio̍h kín-kín cháu-khì hia; in-ūi lí iáu-bē kàu hia, góa bōe-ōe chòe sím-mı̍h. In-ūi án-ni hit ê siâⁿ miâ-kiò Só-jíⁿ.

(BCL) 你著緊緊走去遐；因為你猶未到遐，我會做甚麼。」因為按呢彼個城名叫瑣珥。

23

(THR) Lô-tek kàu Só-jíⁿ, jı̍t í-keng chhut.

(BCL) 羅得到瑣珥，日已經出。

24

(THR) Hit sî Iâ-hô-hoa chiong jiû-n̂g kap hé, tùi thiⁿ-téng, tùi Iâ-hô-hoa hia, kàng-lo̍h tī Só͘-to-má kap Gô-mô͘-la̍h.

(BCL) 彼時，耶和華將硫磺及火對天頂對耶和華遐，降落佇所多瑪及蛾摩拉，

25

(THR) Chiong hiah ê siâⁿ, í-kı̍p chôan pîⁿ-iûⁿ, kap siâⁿ-lāi só͘-ū ê peh-sìⁿ, liân tōe-bīn-chiūⁿ seng-tióng-ê, lóng húi-hōai.

(BCL) 將許個城以及全平洋，及城內所有的百姓，連地面上成長的，攏毀壞。

26

(THR) Lô-tek ê bó͘ tī āu-bīn, chı̍t-ē o̍at-thâu khòaⁿ, chiū pìⁿ-chòe chı̍t ki iâm-thiāu.

(BCL) 羅得的某佇後面一下越頭看，就變做一支鹽柱。

27

(THR) A-pek-la̍h-hán thàu-chá khí-lâi, kàu i chêng-jı̍t khiā tī Iâ-hô-hoa bīn-chêng hit-ūi;

(BCL) 亞伯拉罕透早起來，到伊前日徛佇耶和華面前彼位，

28

(THR) ǹg Só͘-to-má Gô-mô͘-la̍h, kap Pîⁿ-iûⁿ ê chôan-tōe lâi khòaⁿ; khòaⁿ-kìⁿ hit só͘-chāi hé-ian chhèng-kôaiⁿ, chhin-chhiūⁿ hé-lô͘ ê ian.

(BCL) 向所多瑪蛾摩拉，及平洋的全地來看，看見彼所在火煙淐高，親像火爐的煙。

29

(THR) Tng Siōng-tè châu-bia̍t Pîⁿ-iûⁿ chiah ê siâⁿ ê sî, Siōng-tè siàu-liām A-pek-la̍h-hán; tú-tú tī chhia-tó Lô-tek só͘ khiā-khí ê siâⁿ ê sî, chiū kah Lô-tek tùi chhia-tó ê tiong-kan chhut-khì.

(BCL) 當上帝剿滅平洋諸個城的時，上帝數念亞伯拉罕，抵抵佇捙倒羅得所徛起的城的時，就教羅得對捙倒的中間出去。

30

(THR) Lô-tek tiàm tī Só-jíⁿ kiaⁿ-hiâⁿ; chiū kap i nn̄g ê cha-bó͘-kiáⁿ tùi Só-jíⁿ chiūⁿ-khì tiàm tī soaⁿ-nı̍h; i kap nn̄g ê cha-bó͘-kiáⁿ tiàm tī chı̍t ê tōng-lāi.

(BCL) 羅得踮佇瑣珥驚惶，就及伊二個查某子對瑣珥上去，踮佇山裡；伊及二個查某子踮佇一個洞內。

31

(THR) Tōa cha-bó͘-kiáⁿ tùi sòe cha-bó͘-kiáⁿ kóng, Lán ê lāu-pē lāu-lah, tōe-chiūⁿ koh bô lâng kap lán chòe phit-phòe, lâi chiàu jîn-tō.

(BCL) 大查某子對細查某子講：「咱的老父老啦，地上閣無人及咱做匹配來照人道。

32

(THR) Lâi-lah, thang hō͘ lāu-pē lim chiú, kap i saⁿ-kap khùn; án-ni lán hó thang tùi i liû-chûn hō͘-è.

(BCL) 來啦！通互老父飲酒，及伊相及睏。按呢，咱好通對伊留存後裔。

33

(THR) Hit-mî in hō͘ lāu-pē lim chiú; tōa cha-bó͘-kiáⁿ chiū jı̍p-khì kap lāu-pē saⁿ-kap khùn; i sím-mı̍h sî khì khùn, sím-mı̍h sî khí-lâi, lāu-pē lóng m̄-chai.

(BCL) 彼暝互老父飲酒，大查某子就入去及老父相及睏；伊甚麼時去睏，甚麼時起來，老父攏呣知。

34

(THR) Kè-jı̍t tōa cha-bó͘-kiáⁿ kā sòe cha-bó͘-kiáⁿ kóng, Góa chā-mî kap lāu-pē saⁿ-kap khùn; kin-àm lán koh hō͘ i lim chiú, lí thang jı̍p-khì kap i saⁿ-kap khùn. Án-ni, lán hó thang tùi lāu-pē liû-chûn hō͘-è.

(BCL) 隔日，大查某子給細查某子講：「我昨暝及老父相及睏。今暗咱閣互伊飲酒，你通入去及伊相及睏。按呢，咱好通對老父留存後裔。」

35

(THR) Hit-mî in koh hō͘ lāu-pē lim chiú, sòe cha-bó͘-kiáⁿ khí-lâi khì kap i khùn; i sím-mı̍h sî khì khùn, sím-mı̍h sî khí-lâi, lāu-pē ia̍h lóng m̄-chai.

(BCL) 彼暝閣互老父飲酒，細查某子起來去及伊睏；伊甚麼時去睏，甚麼時起來，老父亦攏呣知。

36

(THR) Án-ni Lô-tek nn̄g ê cha-bó͘-kiáⁿ lóng tùi in lāu-pē lâi hôai-īn.

(BCL) 按呢，羅得二個查某子攏對老父來懷孕。

37

(THR) Tōa-ê siⁿ kiáⁿ, kiò i ê miâ Mô͘-ap, chiū-sī hiān-kim Mô͘-ap lâng ê chó͘.

(BCL) 大的生子，叫伊的名摩押，就是現今摩押人的祖。

38

(THR) Sòe-ê ia̍h siⁿ-kiáⁿ, kiò i ê miâ Piān-á-bí, chiū-sī hiān-kim A-bûn lâng ê chó͘.

(BCL) 細的也生子，叫伊的名便亞米，就是現今亞捫人的祖。

Bible Color Mark

• 台語漢字羅馬本
• 巴克禮全羅