創世記 第 30 章

1

(THR) La̍h-kiat khòaⁿ pún-sin bô kā Ngá-kok siⁿ kiáⁿ, chiū òan-tò͘ i ê tōa-chí; tùi Ngá-kok kóng, Lí tio̍h kiáⁿ hō͘ góa; nā bô, góa beh sí.

(BCL) 拉結看本身無給雅各生子，就怨妒伊的大姊，對雅各講：「你著子互我，若無我欲死。」

2

(THR) Ngá-kok siū-khì La̍h-kiat; kóng, Hō͘ lí bô siⁿ-ê, sī Siōng-tè; góa kiám sī thòe I mah?

(BCL) 雅各受氣拉結，講：「互你無生的是上帝，我豈是替伊嗎？」

3

(THR) La̍h-kiat kóng, Lí khòaⁿ góa ê lú-pī Phek-la̍h tī-chia; lí khì kap i tâng-pâng, hō͘ i siⁿ kiáⁿ phō tī góa ê kha-thâu-u; góa iā chiū thang tùi i tit-tio̍h kiáⁿ.

(BCL) 拉結講：「你看我的女婢辟拉佇遮，你去及伊同房，互伊生子抱佇我的腳頭窩，我也就通對伊得著子。」

4

(THR) La̍h-kiat chiū chiong i ê lú-pī Phek-la̍h hō͘ i chòe-bó͘; Ngá-kok chiū kap i tâng-pâng.

(BCL) 拉結就將伊的女婢辟拉互伊做某，雅各就及伊同房，

5

(THR) Phek-la̍h hôai-īn, kā Ngá-kok siⁿ chı̍t ê kiáⁿ.

(BCL) 辟拉懷孕，給雅各生一個子。

6

(THR) La̍h-kiat kóng, Siōng-tè kā góa phòaⁿ-tòan, ia̍h thiaⁿ góa ê siaⁿ, hō͘ góa ū kiáⁿ; só͘-í kiò i ê miâ chòe Tàn.

(BCL) 拉結講：「上帝給我判斷，亦聽我的聲，互我有子」，所以叫伊的名做但。

7

(THR) La̍h-kiat ê lú-pī Phek-la̍h koh hôai-īn, kā Ngá-kok siⁿ tē-jī ê kiáⁿ;

(BCL) 拉結的女婢辟拉閣懷孕，給雅各生第二個子。

8

(THR) La̍h-kiat kóng, Góa kap góa ê tōa-chí hui-siông ê saⁿ-chiⁿ, ia̍h tit-tio̍h khah-iâⁿ; chiū kiò i ê miâ chòe Ná-hut-tha-lī.

(BCL) 拉結講：「我及我的大姊非常的相爭，亦得著卡贏」，就叫伊的名做拿弗他利。

9

(THR) Lī-a khòaⁿ pún-sin thêng-hioh bô siⁿ, chiū chiong i ê lú-pī, Sek-phàⁿ, hō͘ Ngá-kok chòe bó͘.

(BCL) 利亞看本身停歇無生，就將伊的女婢悉帕互雅各做某。

10

(THR) Lī-a ê lú-pī Sek-phàⁿ kā Ngá-kok siⁿ kiáⁿ.

(BCL) 利亞的女婢悉帕給雅各生子。

11

(THR) Lī-a kóng, Kai-chài! chiū kiò i ê miâ chòe Ka-tek.

(BCL) 利亞講：「佳哉！」就叫伊的名做迦得。

12

(THR) Lī-a ê lú-pī, Sek-phàⁿ, koh kā Ngá-kok siⁿ tē-jī ê kiáⁿ.

(BCL) 利亞的女婢悉帕閣給雅各生第二個子。

13

(THR) Lī-a kóng, Góa ū hok-khì! chiah ê cha-bó͘-gín-á lóng beh chheng góa ū hok-khì; chiū kiò i ê miâ chòe A-siat.

(BCL) 利亞講：「我有福氣，諸個查某囝仔攏欲稱我有福氣」，就叫伊的名做亞設。

14

(THR) Koah-be̍h ê sî, Liû-piān khì chhân-nı̍h, tit-tio̍h hong-ka, the̍h-lâi hō͘ i ê lāu-bú Lī-a. La̍h-kiat tùi Lī-a kóng, Chhiáⁿ chiong lí ê kiáⁿ ê hong-ka hō͘ góa.

(BCL) 割麥的時，流便去田裡，得著風茄，提來互伊的老母利亞。拉結對利亞講：「請將你的子的風茄互我。」

15

(THR) Lī-a tùi i kóng, Lí chhiúⁿ-to̍at góa ê tiōng-hu, kiám-sī sió-khóa sū; lí koh chhiúⁿ-to̍at góa ê kiáⁿ ê hong-ka mah? La̍h-kiat kóng, Ūi-tio̍h lí ê kiáⁿ ê hong-ka, só͘-í kin-mî i thang kap lí saⁿ-kap khùn.

(BCL) 利亞對伊講：「你搶奪我的丈夫，豈是小可事？你閣搶奪我的子的風茄嗎？」拉結講：「為著你的子的風茄，所以今暝伊通及你相及睏。」

16

(THR) Kàu àm, Ngá-kok tùi chhân-nı̍h tò-lâi; Lī-a chhut-khì ngiâ-chih i, kóng, Lí tio̍h kap góa saⁿ-kap khùn; in-ūi góa sı̍t-chāi ēng góa ê kiáⁿ ê hong-ka chhiàⁿ lí. Hit-mî i chiū kap i saⁿ-kap khùn.

(BCL) 到暗，雅各對田裡倒來，利亞出去迎接伊，講：「你著及我相及睏，因為我實在用我的子的風茄倩你。」彼暝，伊就及伊相及睏。

17

(THR) Siōng-tè ún-chún Lī-a, i chiū hôai-īn, kā Ngá-kok siⁿ tē-gō͘ ê kiáⁿ.

(BCL) 上帝允准利亞，伊就懷孕，給雅各生第五個子。

18

(THR) Lī-a kóng, Siōng-tè hō͘ góa kang-chîⁿ, in-ūi góa chiong lú-pī hō͘ góa ê tiōng-hu; tùi án-ni kā i hō-miâ Í-sat-ka.

(BCL) 利亞講：「上帝互我工錢，因為我將女婢互我的丈夫」，對按呢給伊號名以薩迦。

19

(THR) Lī-a koh hôai-īn, kā Ngá-kok siⁿ tē-la̍k ê kiáⁿ.

(BCL) 利亞閣懷孕，給雅各生第六個子。

20

(THR) Lī-a kóng, Siōng-tè siúⁿ-sù góa hó ê siúⁿ-sù; góa ê tiōng-hu beh kap góa tòa, in-ūi góa kā i siⁿ la̍k ê kiáⁿ; tùi án-ni kā i hō-miâ Se-pò͘-lûn.

(BCL) 利亞講：「上帝賞賜我好的賞賜；我的丈夫欲及我住，因為我給伊生六個子」，對按呢給伊號名西布倫。

21

(THR) Āu-lâi siⁿ chı̍t ê cha-bó͘-kiáⁿ, kā i hō-miâ kiò Tí-ná.

(BCL) 後來生一個查某子，給伊號名叫底拿。

22

(THR) Siōng-tè siàu-liām La̍h-kiat, Siōng-tè ún-chún i, hō͘ i ōe siⁿ kiáⁿ.

(BCL) 上帝數念拉結，上帝允准伊，互伊會生子。

23

(THR) I chiū hôai-īn siⁿ kiáⁿ; kóng, Siōng-tè tû-khì góa ê kiàn-siàu;

(BCL) 伊就懷孕生子，講：「上帝除去我的見誚」，

24

(THR) chiū kā i hō-miâ Iok-sek, kóng, Gōan Iâ-hô-hoa koh ke-thiⁿ góa chı̍t ê kiáⁿ.

(BCL) 就給伊號名約瑟，講：「願耶和華閣加添我一個子。」

25

(THR) La̍h-kiat siⁿ Iok-sek liáu-āu, Ngá-kok tùi La̍h-pan kóng, Chhiáⁿ chhe góa khì, hō͘ góa tò-khì góa ê pún só͘-chāi, pún-tōe;

(BCL) 拉結生約瑟了後，雅各對拉班講：「請差我去，互我倒去我的本所在本地。

26

(THR) chhiáⁿ lí chiong góa ho̍k-sāi lí só͘ tit-tio̍h ê bó͘-kiáⁿ hō͘ góa, iông-ún góa khì; góa cháiⁿ-iūⁿ ho̍k-sāi lí, lí lóng chai.

(BCL) 請你將我服事你所得著的某子互我，容允我去；我怎樣服事你，你攏知。」

27

(THR) La̍h-pan kā i kóng, Góa nā tī lí ê bīn-chêng tit-tio̍h un-tián, chhiáⁿ lí kap góa tòa; in-ūi góa chhim-chai Iâ-hô-hoa sù góa hok-khì, sī ūi-tio̍h lí ê iân-kò͘.

(BCL) 拉班給伊講：「我若佇你的面前得著恩典，請你及我住，因為我深知，耶和華賜我福氣是為著你的緣故」；

28

(THR) Koh kā i kóng, Chhiáⁿ lí tiāⁿ-tio̍h lí ê kang-chîⁿ, góa chiū hō͘ lí.

(BCL) 閣給伊講：「請你定著你的工錢，我就互你。」

29

(THR) Ngá-kok kā i kóng, Góa ho̍k-sāi lí cháiⁿ-iūⁿ, lí ê cheng-siⁿ tī góa ê chhiú-thâu cháiⁿ-iūⁿ, sī lí só͘ chai.

(BCL) 雅各給伊講：「我服事你怎樣，你的精牲佇我的手頭怎樣，是你所知。

30

(THR) Góa bē lâi ê tāi-seng, lí só͘-ū-ê chin-chió, taⁿ chiū tōa hoat-ta̍t; Iâ-hô-hoa ēng hok-khì tè góa ê kha lâi hō͘ lí; taⁿ góa beh sím-mı̍h sî ūi góa ê ke kiàn-tì sán-gia̍p?

(BCL) 我未來的代先，你所有的真少，今就大發達，耶和華用福氣隨我的腳來互你。今我欲甚麼時為我的家建置產業？」

31

(THR) La̍h-pan kóng, Góa tio̍h hō͘ lí sím-mı̍h? Ngá-kok kóng, Lí ia̍h m̄-bián hō͘ góa sím-mı̍h; ū chı̍t-hāng sū, lí nā èng-sêng, chiū góa iû-gôan chhī lí ê iûⁿ-kûn lâi kò͘-siú.

(BCL) 拉班講：「我著互你甚麼？」雅各講：「你亦呣免互我甚麼，有一項事，你若應承，就我猶原飼你的羊群來顧守。

32

(THR) Kin-á-jı̍t góa beh piàn-sûn lí ê iûⁿ-kûn, chiong mî-iûⁿ-tiong kìⁿ-ū tiám-ê, ū pan-ê, kap o͘-sek-ê, í-kı̍p soaⁿ-iûⁿ-tiong kìⁿ-ū pan-ê, ū tiám-ê, lóng poah-chhut; chiong-lâi chit-khóan-ê chòe góa ê kang-chîⁿ.

(BCL) 今仔日我欲遍巡你的羊群，將綿羊中見有點的、有斑的、及黑色的，以及山羊中見有斑的、有點的，攏撥出；將來此款的做我的工錢。

33

(THR) Í-āu lí lâi khòaⁿ góa ê kang-chîⁿ, hit tiong-kan nā soaⁿ-iûⁿ bô tiám bô pan-ê, mî-iûⁿ bô o͘-sek-ê, chiū sǹg sī góa thau-ê; ēng án-ni lâi chèng-bêng góa ê kong-tō.

(BCL) 以後你來看我的工錢，彼中間若山羊無點無斑的，綿羊無黑色的，就算是我偷的；用按呢來證明我的公道。」

34

(THR) La̍h-pan kóng, Hó, góa gōan chiàu lí ê ōe kiâⁿ.

(BCL) 拉班講：「好！我願照你的話行。」

35

(THR) Tng hit-jı̍t, chiū chiong ū hûn ū pan ê soaⁿ-iûⁿ-káng, ū tiám ū pan, kàiⁿ pe̍h ê soaⁿ-iûⁿ-bú, í-kı̍p o͘-sek ê mî-iûⁿ, lóng poah-chhut lâi kau hō͘ i hiah ê kiáⁿ.

(BCL) 當彼日，就將有紋、有斑的山羊，有點、有斑、間白的山羊母，以及黑色的綿羊，攏撥出來，交互伊許個子，

36

(THR) I hō͘ ka-kī kap Ngá-kok saⁿ-lī ū saⁿ-jı̍t ê lō͘-chām; Ngá-kok chiū kò͘ La̍h-pan kî-û ê iûⁿ.

(BCL) 伊互家己及雅各相離有三日的路站。雅各就顧拉班其餘的羊。

37

(THR) Ngá-kok the̍h chhiⁿ ê iông-chhiū, hēng-chhiū, png-chhiū, nńg ê ki, chiong phê pak chiâⁿ pe̍h-hûn, hō͘ ki-lāi pe̍h-ê lō͘-chhut.

(BCL) 雅各提青的楊樹、杏樹、楓樹軟的枝，將皮剝成白紋，互枝內白的露出，

38

(THR) Chiong pak-phê ê ki, chhah tī iûⁿ lim-chúi ê chúi-kau kap chúi-chô, hō͘ i kap iûⁿ saⁿ-tùi; iûⁿ lâi lim ê sî, kang-bú kau-ha̍p;

(BCL) 將剝皮的枝，插佇羊飲水的水溝及水槽，互伊及羊相對，羊來飲的時，公母交合。

39

(THR) iûⁿ tī ki ê tùi-bīn kau-ha̍p, chiū siⁿ ū-hûn-ê, ū-tiám-ê, ū-pan-ê.

(BCL) 羊佇枝的對面交合，就生有紋的、有點的、有斑的。

40

(THR) Ngá-kok chiong iûⁿ-á poah-chhut, hō͘ La̍h-pan ê iûⁿ kap chiah ê ū-hûn kap o͘-sek ê iûⁿ saⁿ-tùi; chiong ka-kī ê iûⁿ lēng-gōa pàng tī chı̍t só͘-chāi, bô hō͘ i kap La̍h-pan ê iûⁿ chham-chhap.

(BCL) 雅各將羊仔撥出，互拉班的羊及諸個有紋及黑色的羊相對，將家己的羊另外放佇一所在，無互伊及拉班的羊參插。

41

(THR) Tú-tio̍h iûⁿ-kûn-tiong ióng-chòng-ê kau-ha̍p ê sî, Ngá-kok chiū ēng chhiū-ki chhah tī chúi-kau-lāi; hō͘ iûⁿ tī chhiū-ki ê tùi-bīn kau-ha̍p.

(BCL) 抵著羊群中勇壯的交合的時，雅各就用樹枝插佇水溝內，互羊佇樹枝的對面交合。

42

(THR) Tú-tio̍h iûⁿ-kûn ê sán-ê, chiū bô chhah chhiū-ki; tùi án-ni sán-ê kui La̍h-pan, ióng-chòng-ê kui Ngá-kok.

(BCL) 抵著羊群的瘦的就無插樹枝。對按呢，瘦的歸拉班，勇壯的歸雅各。

43

(THR) Tùi án-ni i tōa hoat-ta̍t, tit-tio̍h chōe-chōe iûⁿ-kûn, lú-pī, lô͘-po̍k, lo̍k-tô, kap lû.

(BCL) 對按呢伊大發達，得著多多羊群、女婢、奴僕、駱駝，及驢。

Bible Color Mark

• 台語漢字羅馬本
• 巴克禮全羅