創世記 第 37 章

1

(THR) Ngá-kok khiā-khí Ka-lâm tōe, chiū-sī i ê lāu-pē kià-kha ê só͘-chāi.

(BCL) 雅各徛起迦南地，就是伊的老父寄腳的所在。

2

(THR) Ngá-kok ê sè-hē kì tī ē-tóe. Iok-sek cha̍p-chhit hè kap i hiah ê hiaⁿ saⁿ-kap kò͘ iûⁿ; i sī chı̍t ê gín-á kap i ê lāu-pē ê sòe-î Phek-la̍h ê kiáⁿ, Sek-phàⁿ ê kiáⁿ, siông-siông chòe-tīn; Iok-sek chiong i hiah ê hiaⁿ ê pháiⁿ phín-hēng kā in lāu-pē kóng.

(BCL) 雅各的世系記佇下底。約瑟十七歲及伊許個兄相及顧羊。伊是一個囝仔，及伊的老父的細姨辟拉的子，悉帕的子常常做陣。約瑟將伊許個兄的歹品行給老父講。

3

(THR) Taⁿ Í-sek-lia̍t thiàⁿ Iok-sek khah iâⁿ-kè tī thiàⁿ i ê chèng-kiáⁿ, in-ūi Iok-sek sī i nî-lāu siⁿ-ê; i kā i chòe chı̍t niá chhái-sek ê saⁿ.

(BCL) 今以色列疼約瑟卡贏過佇疼伊的眾子，因為約瑟是伊年老生的；伊給伊做一領彩色的衫。

4

(THR) Iok-sek hiah ê hiaⁿ khòaⁿ-kìⁿ lāu-pē thiàⁿ Iok-sek, kè-thâu tī thiàⁿ in; chiū òan-hūn Iok-sek, bōe-ōe kap i kóng hô-bo̍k ê ōe.

(BCL) 約瑟許個兄看見老父疼約瑟過頭佇疼，就怨恨約瑟，會及伊講和睦的話。

5

(THR) Iok-sek bāng-kìⁿ chı̍t ê bāng, kā i hiah ê hiaⁿ kóng; in chiū koh-khah òan-hūn i.

(BCL) 約瑟夢見一個夢，給伊許個兄講，就閣卡怨恨伊。

6

(THR) Iok-sek tùi in kóng, Chhiáⁿ lín thiaⁿ góa só͘ bāng-kìⁿ ê bāng.

(BCL) 約瑟對講：「請恁聽我所夢見的夢：

7

(THR) Lán tī hn̂g-nı̍h hâ gō͘-kak; góa só͘-hâ-ê khí-lâi khiā, lín só͘-hâ-ê ûi-lûi lâi pài góa só͘ hâ-ê.

(BCL) 咱佇園裡縖五穀，我所縖的起來徛，恁所縖的圍纍來拜我所縖的。」

8

(THR) I ê hiaⁿ ìn kóng, Chóng-bô lí chin-chiàⁿ beh chòe góan ê ông mah? chin-chiàⁿ beh kóan-hat góan mah? In chiū ūi-tio̍h i ê bāng, kap i ê ōe, koh-khah òan-hūn i.

(BCL) 伊的兄應講：「總無你真正欲做阮的王嗎？真正欲管轄阮嗎？」就為著伊的夢及伊的話閣卡怨恨伊。

9

(THR) Āu-lâi i koh bāng-kìⁿ chı̍t ê bāng, ia̍h kā i ê hiaⁿ kóng, Lí khòaⁿ, góa iū-koh bāng-kìⁿ chı̍t ê bāng; ū jı̍t, ge̍h, kap cha̍p-it lia̍p chhiⁿ teh pài góa.

(BCL) 後來伊閣夢見一個夢，亦給伊的兄講：「你看，我又閣夢見一個夢，有日、月，及十一粒星拜我。」

10

(THR) Iok-sek kā i ê lāu-pē kap i ê hiaⁿ kóng; in lāu-pē chiū chek-pī i, kóng, Lí só͘ bāng-kìⁿ chit ê bāng sī cháiⁿ-iūⁿ? chóng-bô góa kap lín lāu-bú lín hiaⁿ-tī, lóng beh phak-teh pài lí mah?

(BCL) 約瑟給伊的老父及伊的兄講；老父就責備伊講：「你所夢見此個夢是怎樣！總無我及恁老母、恁兄弟攏欲仆，拜你嗎？」

11

(THR) I ê hiaⁿ lóng òan-tò͘ i; i ê lāu-pē ēng chiah ê ōe kì tī sim-lāi.

(BCL) 伊的兄攏怨妒伊，伊的老父用諸個話記佇心內。

12

(THR) Iok-sek ê hiaⁿ khì Sī-kiàm, chhī lāu-pē ê iûⁿ.

(BCL) 約瑟的兄去示劍，飼老父的羊。

13

(THR) Í-sek-lia̍t tùi Iok-sek kóng, Lín hiaⁿ kiám m̄-sī tī Sī-kiàm chhī iûⁿ mah? Lí lâi, góa beh chhe lí khì in hia.

(BCL) 以色列對約瑟講：「恁兄豈呣是佇示劍飼羊嗎？你來，我欲差你去遐。」伊應講：「我佇遮。」

14

(THR) I ìn kóng, Góa tī-chia. I kā i kóng, Lí khì khòaⁿ lín hiaⁿ ū pêng-an á-bô, iûⁿ-kûn ū pêng-an á-bô; tò-lâi kā góa kóng. Chiū chhe i chhut Hi-pek-lûn ê soaⁿ-kok; i chiū khì kàu Sī-kiàm.

(BCL) 伊給伊講：「你去看恁兄有平安抑無，羊群有平安抑無，倒來給我講」；就差伊出希伯崙的山谷，伊就去到示劍。

15

(THR) Ū lâng tn̄g-tio̍h i tī soaⁿ-nı̍h bê-lō͘; chiū mn̄g i kóng, Lí teh chhē sím-mı̍h?

(BCL) 有人撞著伊佇山裡迷路，就問伊講：「你尋甚麼？」

16

(THR) I kóng, Góa teh chhē góa ê hiaⁿ; chhiáⁿ kā góa kóng, in tī tah-lo̍h teh chhī iûⁿ.

(BCL) 伊講：「我尋我的兄，請給我講，佇叨落飼羊？」

17

(THR) Hit-lâng kóng, In í-keng lī-khui chia; in-ūi góa thiaⁿ-kìⁿ in teh kóng, Lán lâi-khì To-tan. Iok-sek chiū khì jip i ê hiaⁿ, tú-tio̍h in tī To-tan.

(BCL) 彼人講：「已經離開遮，因為我聽見講，咱來去多坍。」約瑟就去伊的兄，抵著佇多坍。

18

(THR) In hn̄g-hn̄g khòaⁿ-kìⁿ i, i iáu-bē kiâⁿ kàu in hia, in chiū saⁿ-kap kè-bô͘ beh hāi-sí i.

(BCL) 遠遠看見伊，伊猶未行到遐，就相及計謀欲害死伊，

19

(THR) Tāi-ke saⁿ-kap kóng, Lí khòaⁿ, chòe-bāng-ê lâi-lah.

(BCL) 大家相及講：「你看！做夢者來啦。

20

(THR) Hò͘-lâi, taⁿ lán kā i thâi-sí, hiat tī chı̍t ê ta-chíⁿ; chiah lâi kóng ū pháiⁿ-siù chia̍h-i; lán chiah khòaⁿ i ê bāng chiong-lâi cháiⁿ-iūⁿ.

(BCL) 乎來！今咱給伊死，佇一個乾井，才來講有歹獸食伊。咱才看伊的夢將來怎樣。」

21

(THR) Liû-piān thiaⁿ-kìⁿ, chiū kiù i thoat-lī in ê chhiú; kóng, Lán m̄-thang hāi i ê sìⁿ-miā.

(BCL) 流便聽見，就救伊脫離的手，講：「咱呣通害伊的生命」；

22

(THR) Liû-piān koh tùi in kóng, M̄-thang hō͘ i lâu-huih; thang kā i hiat tī chit ê khòng-iá ê ta-chíⁿ, m̄-thang hē chhiú hāi i; ì-sù sī beh kiù i thoat-lī in ê chhiú, hō͘ i tò-khì i ê lāu-pē hia.

(BCL) 流便閣對講：「呣通互伊流血，通給伊佇此個曠野的乾井，呣通下手害伊。」意思是欲救伊脫離的手，互伊倒去伊的老父遐。

23

(THR) Iok-sek kàu i ê hiaⁿ hia, hit-tia̍p in chiū thǹg Iok-sek ê gōa-saⁿ, chiū-sī i seng-khu hit-niá chhái-sek ê saⁿ;

(BCL) 約瑟到伊的兄遐，彼霎就褪約瑟的外衫，就是伊身軀彼領彩色的衫，

24

(THR) chiū lia̍h i, hiat-lo̍h chíⁿ, hit ê chíⁿ sī ta-ê, lāi-bīn bô chúi.

(BCL) 就掠伊落井；彼個井是乾的，內面無水。

25

(THR) In chē-teh chia̍h-piáⁿ; kia̍h-ba̍k khòaⁿ, khòaⁿ-kìⁿ chı̍t-tīn Í-sı̍t-má-lī lâng tùi Ki-lia̍t lâi; ēng lo̍k-tô pē hiuⁿ-liāu, jú-hiuⁿ, bu̍t-io̍h, beh tòa lo̍h-khì Ai-kı̍p.

(BCL) 坐食餅，抬目看，看見一陣以實瑪利人對基列來，用駱駝背香料、乳香、沒藥，欲帶落去埃及。

26

(THR) Iû-tāi tùi chiah ê hiaⁿ-tī kóng, Lán thâi-sí lán ê sió-tī, khǹg-ba̍t i ê huih, ū sím-mı̍h lī-ek?

(BCL) 猶大對諸個兄弟講：「咱死咱的小弟，囥密伊的血，有甚麼利益？

27

(THR) Lán lâi kā i bōe hō͘ Í-sı̍t-má-lī lâng; m̄-thang hē-chhiú hāi i; in-ūi i sī lán ê sió-tī, lán ê kut-jio̍k. Hiaⁿ-tī thiaⁿ-i.

(BCL) 咱來給伊賣互以實瑪利人，呣通下手害伊；因為伊是咱的小弟，咱的骨肉。」兄弟聽伊。

28

(THR) Ū hiah ê Bí-tiân ê seng-lí lâng tùi hia kè, i ê hiaⁿ chiū kā Iok-sek tùi chíⁿ-lāi pu̍ih-khí-lâi, chiong i bōe hō͘ Í-sı̍t-má-lī lâng, tit-tio̍h jī-cha̍p ê gûn. Hiah ê lâng chiū tòa Iok-sek khì Ai-kı̍p.

(BCL) 有許個米甸的生理人對遐過，伊的兄就給約瑟對井內拔起來，將伊賣互以實瑪利人，得著二十個銀。許個人就帶約瑟去埃及。

29

(THR) Liû-piān tò-tńg-lâi chíⁿ-piⁿ, khòaⁿ-kìⁿ Iok-sek bô tī chíⁿ-lāi, chiū thiah-lı̍h ka-kī ê saⁿ.

(BCL) 流便倒轉來井邊，看見約瑟無佇井內，就拆裂家己的衫，

30

(THR) Tò-khì sió-tī hia, kóng, Gín-á bô-khì lah; iā góa nih, góa beh tah-lo̍h khì?

(BCL) 倒去小弟遐，講：「囝仔無去啦。也我呢，我欲叨落去？」

31

(THR) In chiū thâi chı̍t chiah soaⁿ-iûⁿ-káng, chiong Iok-sek hit niá saⁿ ùn-huih;

(BCL) 就一隻山羊，將約瑟彼領衫搵血，

32

(THR) chiū chhe lâng the̍h hit niá chhái-sek ê saⁿ khì in lāu-pē hia, kóng, Góan chhē-tio̍h chit-niá, chhiáⁿ lí jīn-khòaⁿ sī lí ê kiáⁿ ê gōa-saⁿ á m̄-sī.

(BCL) 就差人提彼領彩色的衫去老父遐，講：「阮尋著此領，請你認看是你的子的外衫抑呣是？」

33

(THR) I jīn-tit, chiū kóng, Che sī góa ê kiáⁿ ê gōa-saⁿ, ū pháiⁿ-siù kā-chia̍h-i; Iok-sek tek-khak hō͘ i thiah-chhùi.

(BCL) 伊認得，就講：「這是我的子的外衫。有歹獸給食伊，約瑟的確互伊拆碎。」

34

(THR) Ngá-kok chiū thiah-lı̍h saⁿ, io hâ môa-pò͘, ūi i ê kiáⁿ ai-siong chōe-chōe jı̍t.

(BCL) 雅各就拆裂衫，腰縖麻布，為伊的子哀傷多多日。

35

(THR) I ê kiáⁿ kap i ê cha-bó͘-kiáⁿ lóng khí-lâi an-ùi i; i m̄-khéng siū an-ùi; kóng, Góa tek-khak ai-siong lo̍h im-hú, kàu góa ê kiáⁿ hia. I ê lāu-pē ūi-tio̍h i thî-khàu.

(BCL) 伊的子及伊的查某子攏起來安慰伊，伊呣肯受安慰，講：「我的確哀傷落陰府到我的子遐。」伊的老父為著伊啼哭。

36

(THR) Bí-tiân lâng tòa Iok-sek kàu Ai-kı̍p, chiong i bōe hō͘ Hoat-ló ê jîn-sîn, sī-ōe-tiúⁿ, Pho-thê-hoat.

(BCL) 米甸人帶約瑟到埃及，將伊賣互法老的人臣──侍衛長波提法。

Bible Color Mark

• 台語漢字羅馬本
• 巴克禮全羅