詩篇 第 37 章

1

(THR) Tāi-pı̍t ê si.1) M̄-thang in-ūi chòe pháiⁿ ê lâng, sim-lāi put-pêng; Ia̍h m̄-thang òan-tò͘ kiâⁿ put-gī ê lâng.

(BCL) 〔大衛的詩。〕呣通因為做歹的人心內不平，亦呣通怨妒行不義的人。

2

(THR) In-ūi in chhin-chhiūⁿ chháu khòai-khòai koah; Koh chhin-chhiūⁿ chhiⁿ-chhùi ê chhài láu--khì.

(BCL) 因為親像草快快割，閣親像青翠的菜老去。

3

(THR) Tio̍h óa-khò Iâ-hô-hoa lâi kiâⁿ hó, Tiàm tī chit ê thó͘-tōe, ēng sêng-sı̍t chòe bí-niû.

(BCL) 著倚靠耶和華來行好，踮佇此個土地，用誠實做米糧；

4

(THR) Tio̍h lia̍h Iâ-hô-hoa chòe hoaⁿ-hí, I beh chiong lí ê sim só͘ kiû--ê hō͘ lí.

(BCL) 著掠耶和華做歡喜，伊欲將你的心所求的互你。

5

(THR) Tio̍h chiong lí ê tāi-chì kau-tài Iâ-hô-hoa; Koh óa-khò I, I beh hō͘ i chiâⁿ.

(BCL) 著將你的代誌交代耶和華，閣倚靠伊，伊欲互伊成。

6

(THR) I beh hō͘ lí ê gī hoat-chhut chhin-chhiūⁿ kng; Lí ê phòaⁿ-tòan, chhin-chhiūⁿ tiong-tàu ê kng.

(BCL) 伊欲互你的義發出親像光，你的判斷親像中晝的光。

7

(THR) Tio̍h chēng-chēng tī Iâ-hô-hoa ê bīn-chêng, khoan-sim thèng-hāu I; M̄-thang in-ūi hit-hō sū-sū heng-thong-ê, Kap hit-hō pháiⁿ kè-bô͘ tit-tio̍h chiâⁿ--ê, lâi put-pêng.

(BCL) 著靜靜佇耶和華的面前，寬心聽候伊；呣通因為彼號事事亨通的及彼號歹計謀得著成者來不平。

8

(THR) Tio̍h soah siū-khì, lī-khui tōa siū-khì; M̄-thang put-pêng, kiaⁿ-liáu ōe chòe pháiⁿ.

(BCL) 著息受氣，離開大受氣；呣通不平，驚了會做歹。

9

(THR) In-ūi kiâⁿ-pháiⁿ ê lâng beh siū châu-bia̍t; To̍k-to̍k thèng-hāu Iâ-hô-hoa ê lâng, in beh sêng-chiap thó͘-tōe.

(BCL) 因為行歹的人欲受到剿滅；獨獨聽候耶和華的人欲承接土地。

10

(THR) In-ūi koh tiap-á-kú, pháiⁿ-lâng beh bô--khì; Lí nā siông-sè chhâ i ê só͘-chāi, i ia̍h bô--khì;

(BCL) 因為閣霎仔久，歹人欲無去；你若詳細查伊的所在伊亦無去。

11

(THR) To̍k-to̍k khiam-pi ê lâng beh sêng-chiap thó͘-tōe; In-ūi pêng-an hong-sēng tōa-tîm hoaⁿ-hí.

(BCL) 獨獨謙卑的人欲承接土地，因為平安豐盛大沈歡喜。

12

(THR) Pháiⁿ-lâng siat kè-bô͘ beh hāi gī-lâng, Koh ǹg i kā chhùi-khí-kun.

(BCL) 歹人設計謀欲害義人，閣向伊咬嘴齒根。

13

(THR) Chú beh chhiò i, In-ūi khòaⁿ-kìⁿ i ê jı̍t-chí beh kàu.

(BCL) 主欲笑伊，因為看見伊的日子欲到。

14

(THR) Pháiⁿ-lâng pu̍ih-to khui-keng, beh táⁿ-tó khùn-khó͘ sòng-hiong ê lâng; Beh thâi-sí kiâⁿ-chòe chèng-tı̍t ê lâng.

(BCL) 歹人拔刀開弓，欲打倒困苦喪鄉的人，欲死行做正直的人。

15

(THR) In ê to beh chhì-jı̍p ka-kī ê sim, In ê keng beh siū at-chı̍h.

(BCL) 的刀欲刺入家己的心；的弓欲受遏折。

16

(THR) Gī-lâng só͘-ū-ê chió-chió, Iâⁿ-kè chōe-chōe pháiⁿ-lâng ê pù-ū.

(BCL) 義人所有的少少，贏過多多歹人的富有。

17

(THR) In-ūi pháiⁿ-lâng ê chhiú beh siū at-chı̍h; To̍k-to̍k Iâ-hô-hoa hû-chhî gī ê lâng.

(BCL) 因為歹人的手欲受遏折；獨獨耶和華扶持義的人。

18

(THR) Iâ-hô-hoa chai ôan-chôan ê lâng ê sî-jı̍t; In ê sán-gia̍p beh éng-óan tī-teh.

(BCL) 耶和華知完全的人的時日；的產業欲永遠佇。

19

(THR) In tī hōan-lān ê sî put-tì kiàn-siàu; Tī ki-hng ê jı̍t beh tit-tio̍h pá-chiok.

(BCL) 佇患難的時不致見誚，佇飢荒的日欲得著飽足。

20

(THR) Chóng-sī pháiⁿ-lâng beh bia̍t-bô, Iâ-hô-hoa ê tùi-te̍k beh chhin-chhiūⁿ chháu-po͘ ê bō͘-sēng; In beh siau-bô chhin-chhiūⁿ hé-hun ê siau-bô.

(BCL) 總是歹人欲滅無。耶和華的對敵欲親像草埔的茂盛；欲消無，親像火熏的消無。

21

(THR) Pháiⁿ-lâng kā lâng chioh, iā bô hêng; Nā-sī gī-lâng kiâⁿ lîn-bín, siá-si lâng.

(BCL) 歹人給人借也無還；若是義人行憐憫，捨施人。

22

(THR) Iâ-hô-hoa sù-hok ê lâng, in beh sêng-chiap thó͘-tōe; Hō͘ I chiù-chó͘ ê lâng beh siū bia̍t-bô.

(BCL) 耶和華賜福的人欲承接土地；互伊咒詛的人欲受滅無。

23

(THR) Gī-lâng ê kha-pō͘ sī Iâ-hô-hoa só͘ an-tì; Koh I hoaⁿ-hí i ê lō͘.

(BCL) 義人的腳步是耶和華所安置；閣伊歡喜伊的路。

24

(THR) I sui-bóng po̍ah-tó, ia̍h bô kàu kui-sin siak--lo̍h-khì; In-ūi Iâ-hô-hoa ēng I ê chhiú hû i.

(BCL) 伊雖莽跋倒亦無到歸身摔落去，因為耶和華用伊的手扶伊。

25

(THR) Góa chêng siàu-liân, taⁿ nî lāu; Chóng-sī bē-bat khòaⁿ-kìⁿ gī-lâng siū pàng-sak, Ia̍h i ê hō͘-è chòe khit-chia̍h.

(BCL) 我前少年，今年老，總是未曾看見義人受放拺，亦伊的後裔做乞食。

26

(THR) I thong-jı̍t lîn-bín lâng, chioh lâng, I ê hō͘-è tit-tio̍h hok-khì.

(BCL) 伊通日憐憫人，借人；伊的後裔得著福氣！

27

(THR) Lí tio̍h lī-khui pháiⁿ, kiâⁿ hó, Chiah thang éng-óan khiā-khí.

(BCL) 你著離開歹，行好，才通永遠徛起。

28

(THR) In-ūi Iâ-hô-hoa hoaⁿ-hí kong-pêng, Bô pàng-sak I sèng ê peh-sìⁿ; In éng-óan siū pó-hō͘, To̍k-to̍k pháiⁿ-lâng ê hō͘-è beh siū châu-bia̍t.

(BCL) 因為，耶和華歡喜公平，無放拺伊聖的百姓；永遠受保護，獨獨歹人的後裔欲受剿滅。

29

(THR) Gī-lâng beh sêng-chiap thó͘-tōe, Éng-óan tiàm tī-hia.

(BCL) 義人欲承接土地，永遠踮佇遐。

30

(THR) Gī-lâng ê chhùi kóng tì-hūi, I ê chı̍h tâm-lūn kong-pêng.

(BCL) 義人的嘴講智慧；伊的舌談論公平。

31

(THR) I ê Siōng-tè ê lu̍t-hoat tī i ê sim-lāi; I ê kha lóng bōe ta̍h-thu̍t.

(BCL) 伊的上帝的律法佇伊的心內；伊的腳攏踏脫。

32

(THR) Pháiⁿ-lâng thau-khòaⁿ gī-lâng, Siàu-siūⁿ thâi--i.

(BCL) 歹人偷看義人，數想伊。

33

(THR) Iâ-hô-hoa bô pàng-sak i tī pháiⁿ lâng ê chhiú; Tng sím-phòaⁿ ê sî, ia̍h bô tēng i ê chōe.

(BCL) 耶和華無放拺伊佇歹人的手；當審判的時，亦無定伊的罪。

34

(THR) Lí tio̍h thèng-hāu Iâ-hô-hoa chun-siú I ê tō-lō͘; I chiū ko-seng lí, hō͘ lí sêng-chiap thó͘-tōe; Pháiⁿ-lâng siū châu-bia̍t ê sî, lí beh khòaⁿ-kìⁿ.

(BCL) 你著聽候耶和華，遵守伊的道路，伊就高升你，互你承接土地；歹人受剿滅的時，你欲看見。

35

(THR) Góa bat khòaⁿ-kìⁿ pháiⁿ-lâng ū tōa sè-le̍k, Koh hoat-ta̍t chhin-chhiūⁿ ām ê chhiū tī i ê pún thó͘-tōe.

(BCL) 我曾看見歹人有大勢力，閣發達親像艷的樹佇伊的本土地。

36

(THR) Ū lâng tùi hia keng-kè, khòaⁿ ah, i bô--khì lah; Góa ia̍h chhē i, chhē bōe tio̍h.

(BCL) 有人對遐經過，看啊，伊無去啦；我亦尋伊，尋著。

37

(THR) Lí tio̍h siông-sè khòaⁿ hit ê ôan-chôan ê lâng, khòaⁿ hit ê chèng-tı̍t ê lâng, In-ūi hô-pêng ê lâng ū hó ê kiat-kio̍k.

(BCL) 你著詳細看彼個完全的人，看彼個正直的人，因為和平的人有好的結局。

38

(THR) Lūn-kàu hōan-hoat ê lâng, beh chòe-chı̍t-ē bia̍t-bô; Pháiⁿ-lâng ê kiat-kio̍k beh siū châu-bia̍t.

(BCL) 論到犯法的人，欲做一下滅無；歹人的結局欲受剿滅。

39

(THR) Chóng-sī gī-lâng tit-tio̍h kiù, sī tùi Iâ-hô-hoa; Tng hōan-lān ê sî, I chòe in ê iâⁿ-chē.

(BCL) 總是義人得著救是對耶和華；當患難的時伊做的營寨。

40

(THR) Iâ-hô-hoa pang-chān in, chín-kiù in; I chín-kiù in thoat-lī pháiⁿ-lâng, lâi khan-kiù in; In-ūi in óa-khò I.

(BCL) 耶和華幫助，拯救；伊拯救脫離歹人，來牽救，因為倚靠伊。

Bible Color Mark

• 台語漢字羅馬本
• 巴克禮全羅