詩篇 第 45 章

1

(THR) Khó-la̍h hō͘-è kà-sī ê si, koh sī ài-bō͘ ê koa; kau hō͘ Ga̍k-koaⁿ; tiāu, sī ēng "Pek-ha̍p-hoe".1) Góa ê sim chhèng-chhut hó ê ōe; Góa kóng-khí góa ūi-tio̍h ông só͘ chòe--ê; Góa ê chı̍h sī bín-chia̍t ê lâng ê pit.

(BCL) 〔可拉後裔教示的詩，閣是愛慕的歌，交互樂官，調是用百合花。〕我的心淐出好的話；我講起我為著王所做的，我的舌是敏捷的人的筆。

2

(THR) Lí pí sè-kan lâng khah hó-khòaⁿ, Tī lí ê chhùi móa-móa ū un-hūi, Só͘-í Siōng-tè sù-hok lí, tı̍t-kàu éng-óan.

(BCL) 你比世間人卡好看；佇你的嘴滿滿有恩惠；所以上帝賜福你，直到永遠。

3

(THR) Tōa kôan-lêng--ê ah, lí tio̍h pē kiàm tī io--nih, Hián-chhut lí ê êng-kng kap ui-giâm.

(BCL) 大權能者啊，你著佩劍佇腰裡，顯出你的榮光及威嚴！

4

(THR) Koh tī ui-giâm ê tiong-kan, ūi-tio̍h chin-lí, khiam-pi, kong-gī, Lí chē-chhia chìn-chêng khì, bô m̄ tek-sèng; Lí ê chiàⁿ-chhiú beh chòe thang kiaⁿ ê sū, hō͘ lí khòaⁿ.

(BCL) 閣佇威嚴的中間，為著真理、謙卑、公義你坐車進前去，無呣得勝；你的正手欲做通驚的事互你看。

5

(THR) Lí ê chìⁿ-bah chin lāi, Siā-tio̍h ông ê tùi-te̍k ê sim, Lia̍t-pang tó tī lí ê ē-bīn.

(BCL) 你的箭肉真利，射著王的對敵的心；列邦倒佇你的下面。

6

(THR) Siōng-tè ah, Lí ê pó-chō sī éng-éng óan-óan ê, Lí ê kok ê kôan-pèng sī chèng-tı̍t ê kôan-pèng.

(BCL) 上帝啊，你的寶座是永永遠遠的；你的國的權柄是正直的權柄。

7

(THR) Lí hoaⁿ-hí kong-gī, òan-hūn put-hoat, Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ.

(BCL) 你歡喜公義，怨恨不法；所以上帝──你的上帝──用歡喜的油抹你，贏過你諸個同伴。

8

(THR) Lí ê i-chiûⁿ lóng ū bu̍t-io̍h, tîm-hiuⁿ, jio̍k-kùi ê phang; Tùi chhiūⁿ-gê ê ông-kiong, ū si-hiân ê ga̍k-khì hō͘ lí hoaⁿ-hí.

(BCL) 你的衣裳攏有沒藥、沈香、肉桂的芳；對象牙的王宮有絲弦的樂器互你歡喜。

9

(THR) Ū ông ê cha-bó͘-kiáⁿ tī lí chun-kùi hū-lú ê tiong-kan; Ông-hō͘ ēng Gô-hui ê kim chng-thāⁿ, khiā tī lí ê chiàⁿ-pêng.

(BCL) 有王的查某子佇你尊貴婦女的中間；王后用俄斐的金妝飾徛佇你的正旁。

10

(THR) Cha-bó͘-gín-á ah, lí tio̍h thiaⁿ, tio̍h khòaⁿ, tio̍h àⁿ hī-khang; M̄-thang kì-tit lí ê peh-sìⁿ, kap lí ê lāu-pē ê ke;

(BCL) 查某囝仔啊，你著聽，著看，著俯耳孔！呣通記得你的百姓及你的老父的家，

11

(THR) Ông chiū beh him-bō͘ lí ê súi; In-ūi i sī lí ê chú, lí tio̍h pài i.

(BCL) 王就欲欣慕你的娞；因為伊是你的主，你著拜伊。

12

(THR) Chhui-lô ê peh-sìⁿ beh lâi sàng lé-mı̍h, Peh-sìⁿ tiong ê hó-gia̍h lâng beh tùi lí kiû un.

(BCL) 推羅的百姓欲來送禮物；百姓中的好額人欲對你求恩。

13

(THR) Ông ê cha-bó͘-kiáⁿ tī ông-kiong-lāi, ke̍k-kî êng-hôa; I ê i-ho̍k sī ēng kim-sòaⁿ siù--ê.

(BCL) 王的查某子佇王宮內極其榮華；伊的衣服是用金線　的。

14

(THR) I beh chhēng siù-hoe ê i-ho̍k, siū chhōa kàu ông ê bīn-chêng; Chòe-phōaⁿ kun-sûi i ê chāi-sek-lú ia̍h beh siū chhōa kàu lí ê bīn-chêng;

(BCL) 伊欲穿　花的衣服，受導到王的面前；做伴跟隨伊的在室女亦欲受導到你的面前。

15

(THR) In beh hoaⁿ-hí khòai-lo̍k siū ín-chhōa; In beh chìn-jı̍p ông-kiong.

(BCL) 欲歡喜快樂受引導；欲進入王宮。

16

(THR) Lí ê kiáⁿ-sun beh sòa-chiap lí ê lia̍t-chó͘; Lí beh siat-lı̍p in tī chôan-tōe chòe-ông.

(BCL) 你的子孫欲續接你的列祖；你欲設立佇全地做王。

17

(THR) Góa beh hō͘ lí ê miâ bān-tāi hō͘ lâng kì-liām; Só͘-í bān peh-sìⁿ beh éng-éng óan-óan kám-siā lí.

(BCL) 我欲互你的名萬代互人記念，所以萬百姓欲永永遠遠感謝你。

Bible Color Mark

• 台語漢字羅馬本
• 巴克禮全羅