Le̍k-tāi chì-lio̍k siōng-kòan 第 18 章 - 巴克禮全羅

1

Chit-tia̍p liáu-āu Tāi-pı̍t phah Hui-lī-sū lâng, hō͘ in hâng-ho̍k; koh tùi Hui-lī-sū lâng ê chhiú chhú Ka-te̍k kap i ê hiuⁿ-lí.

2

Koh phah Mô͘-ap, Mô͘-ap lâng chiū ho̍k-sāi Tāi-pı̍t, lâi chìn-kòng i.

3

Só-pa ông Hap-tāi-lī-siā khì Pek-la̍h hô, beh kian-kò͘ i ê kok-kôan, Tāi-pı̍t chiū phah i, tı̍t-kàu Hap-má.

4

Tāi-pı̍t chhiúⁿ i ê chiàn-chhia chı̍t-chheng tiuⁿ, bé-peng chhit-chheng, pō͘-peng nn̄g-bān; thoa-chhia ê bé, Tāi-pı̍t chiū koah i tōa-thúi ê kun; kî-tiong chí-ū lâu chı̍t-pah tiuⁿ chhia ê bé.

5

Tāi-má-sek ê A-lân lâng lâi pang-chān Só-pa ông Hap-tāi-lī-siā, Tāi-pı̍t chiū thâi A-lân lâng, nn̄g-bān nn̄g-chheng lâng.

6

Tùi án-ni Tāi-pı̍t tī Tāi-má-sek ê A-lân tōe siat-lı̍p hông-siú ê peng-iâⁿ; A-lân lâng chiū hâng-ho̍k Tāi-pı̍t lâi chìn-kòng i. Tāi-pı̍t bô-lūn toh-lo̍h khì, Iâ-hô-hoa lóng hō͘ i tek-sèng.

7

Tāi-pı̍t chhiúⁿ Hap-tāi-lī-siā chiah ê lô͘-po̍k kim ê pîn-pâi, tòa-kàu Iâ-lō͘-sat-léng.

8

Tāi-pı̍t koh tùi Hap-tāi-lī-siā só͘ kóan ê Thê-pa kap Kun nn̄g ê siâⁿ, chhiúⁿ chōe-chōe tâng, chiū-sī Só͘-lô-bûn só͘ ēng lâi chō tâng-hái kap thiāu, í-kı̍p chiah ê tâng-khì--ê.

9

Hap-má ông To-o͘ thiaⁿ-kìⁿ Tāi-pı̍t phah-iâⁿ Hap-tāi-lī-siā ê chôan-kun,

10

chiū chhe i ê kiáⁿ Hap-to-lân khì kìⁿ Tāi-pı̍t ông, kā i chhéng-an, iā kā i chiok-hok, in-ūi i ū kap Hap-tāi-lī-siā kau-chiàn lâi khah-iâⁿ i; pún-jiân Hap-tāi-lī-siā kap To-o͘ siông-siông ū kau-chiàn ê iân-kò͘. Hap-to-lân sòa tòa kim, gûn, tâng, chiah ê khì-kū.

11

Tāi-pı̍t ông chiong chiah ê khì-kū, kap tùi ta̍k-kok tòa-lâi ê kim gûn, lóng hun-piat chòe-sèng hiàn-hō͘ Iâ-hô-hoa, chiū-sī i tùi Í-tong, Mô͘-ap, A-bûn cho̍k, Hui-lī-sū lâng, A-má-le̍k só͘ chhiúⁿ-lâi--ê.

12

Sé-ló͘-ngá ê kiáⁿ A-pí-su tī Iâm ê soaⁿ-kok thâi Í-tong lâng chı̍t-bān poeh-chheng.

13

I tī Í-tong tōe siat-lı̍p hông-siú ê peng-iâⁿ; Í-tong lâng chiū lóng hâng-ho̍k Tāi-pı̍t. Tāi-pı̍t bô-lūn toh-lo̍h khì, Iâ-hô-hoa lóng hō͘ i tek-sèng.

14

Tāi-pı̍t chòe Í-sek-lia̍t chôan-kok ê ông, koh tī chèng peh-sìⁿ ê tiong-kan péng-kong kiâⁿ-gī.

15

Sé-ló͘-ngá ê kiáⁿ Iok-ap chòe gôan-sòe, A-hi-lu̍t ê kiáⁿ Iok-sa-hoat chòe sú-koaⁿ.

16

A-hi-tu̍t ê kiáⁿ Sat-tok, kap A-pí-a-tha ê kiáⁿ A-hi-bí-le̍k chòe chè-si; Sa-ui-sa chòe su-kì-koaⁿ.

17

Iâ-hô-iâ-tāi ê kiáⁿ Pí-ná-ngá kóan-hat Ki-lī-thê lâng kap Pí-lī-thê lâng. Tāi-pı̍t ê chèng-kiáⁿ lóng tī ông ê sin-piⁿ chòe thâu-lâng.