Iok-hān it 第 1 章 - 巴克禮全羅

1

Lūn-kàu o̍ah-miā ê Tō, tùi khí-thâu só͘ ū, góan só͘ thiaⁿ-kìⁿ, chhin-ba̍k só͘ khòaⁿ-kìⁿ, só͘ koan-khòaⁿ, iā góan ê chhiú bong-tio̍h ê;

2

(chit ê o̍ah-miā bat chhut-hiān, góan ū khòaⁿ-kìⁿ lâi chòe kan-chèng, iā pò lín chai hit ê éng-o̍ah ê o̍ah-miā, chiū-sī pún kap Pē tī-teh, iā chhut-hiān tī góan ê);

3

góan chiong só͘ khòaⁿ-kìⁿ só͘ thiaⁿ-kìⁿ pò lín chai, beh hō͘ lín kap góan kau-pôe, koh góan só͘ kau-pôe, chiū-sī kap Pē í-kı̍p I ê Kiáⁿ Iâ-so͘ Ki-tok:

4

góan siá chiah-ê, sī beh hō͘ góan ê hoaⁿ-hí chhiong-móa.

5

Góan tùi I só͘ thiaⁿ ê ōe, lâi thôan hō͘ lín ê, chiū-sī kóng, Siōng-tè sī kng, tī I chôan-jiân bô àm.

6

Lán nā kóng, ū teh kap I kau-pôe, iā kiâⁿ tī o͘-àm, chiū-sī kóng pe̍h-chha̍t, bô kiâⁿ chin-sı̍t;

7

to̍k-to̍k lán nā kiâⁿ tī kng-bêng, chhin-chhiūⁿ I tiàm tī kng-bêng, chiū lán saⁿ-kap kau-pôe, iā I ê Kiáⁿ Iâ-so͘ ê huih sóe-tû lán lóng-chóng ê chōe.

8

Lán nā kóng bô chōe, chiū-sī phiàn ka-kī, chin-lí iā bô tiàm tī lán.

9

Lán nā jīn lán ê chōe, I sī chin-sı̍t kong-gī, beh sià-bián lán ê chōe, sóe-tû lán lóng-chóng ê put-gī.

10

Lán nā kóng bē bat hōan chōe, piān sī hō͘ I chòe kóng pe̍h-chha̍t ê, I ê tō-lí bô tiàm tī lán.