Lia̍t-ông siōng-kòan 第 14 章 - 巴克禮全羅

1

Hit-sî Iâ-lô-phò-àm ê kiáⁿ A-pí-ngá phòa-pīⁿ;

2

Iâ-lô-phò-àm tùi i ê bó͘ kóng, Lí khí-lâi kái-chong, hō͘ lâng m̄-chai lí sī Iâ-lô-phò-àm ê bó͘, khì Sī-lô, tī-hia ū sian-ti A-hi-ngá, i lūn-kàu góa kóng, beh chòe chit ê peh-sìⁿ ê ông.

3

Taⁿ lí ê chhiú tio̍h tòa cha̍p tè mī-pau, kap kúi-nā tè phò-phò ê piáⁿ, kap chı̍t kan bı̍t, khì kìⁿ i, i beh kā lí kóng, kiáⁿ ōe cháiⁿ-iūⁿ.

4

Iâ-lô-phò-àm ê bó͘ chiū chiàu án-ni kiâⁿ, khí-lâi khì Sī-lô, lâi kàu A-hi-ngá ê ke; A-hi-ngá in-ūi nî-lāu, ba̍k-chiu chhâ-chhâ bōe khòaⁿ-kìⁿ.

5

Iâ-hô-hoa kā A-hi-ngá kóng, Khòaⁿ ah, Iâ-lô-phò-àm ê bó͘ lâi, beh ūi-tio̍h i ê kiáⁿ lâi mn̄g lí, in-ūi i ū phòa-pīⁿ; lí tio̍h án-ni án-ni kā i kóng; i jı̍p--lâi ê sî, beh chng-chòe pa̍t ê hū-jîn-lâng.

6

I tú-á jı̍p mn̂g, A-hi-ngá thiaⁿ-kìⁿ i ê kha-pō͘ siaⁿ, chiū kóng, Iâ-lô-phò-àm ê bó͘ ah, jı̍p-lâi; lí siáⁿ-sū chng-chòe pa̍t ê hū-jîn-lâng ah? Góa hōng-chhe pò lí pháiⁿ siau-sit.

7

Lí tò-khì kā Iâ-lô-phò-àm kóng, Iâ-hô-hoa Í-sek-lia̍t ê Siōng-tè án-ni kóng, Góa kì-jiân tùi peh-sìⁿ-tiong kú-khí lí, siat-lı̍p lí chòe Góa ê peh-sìⁿ Í-sek-lia̍t ê kun-ông,

8

tùi Tāi-pı̍t ke thiah-lı̍h kok, siúⁿ-sù lí; chóng-sī lí bô chhin-chhiūⁿ Góa ê lô͘-po̍k Tāi-pı̍t, chun-siú Góa ê kài-bēng, chı̍t-sim tè Góa, choan-bū kiâⁿ Góa khòaⁿ-chòe chèng-tı̍t ê sū.

9

Lí kéng-jiân kiâⁿ pháiⁿ iâⁿ-kè it-chhè tī lí í-chêng-ê, in-ūi lí ūi ka-kī chō pa̍t ê siōng-tè, kap chù ê ngó͘-siōng, kek Góa ê siū-khì, khì-sak Góa tī lí ê ka-chiah-āu.

10

In-ūi án-ni Góa beh hō͘ chai-ē lîm-kàu Iâ-lô-phò-àm ê ke, Góa beh chián-tû sio̍k Iâ-lô-phò-àm ê ta-po͘-teng, bô-lūn siū khu-sok-ê, á-sī chū-iû-ê; tī Í-sek-lia̍t iā beh it-chīn tû Iâ-lô-phò-àm ê ke, chhin-chhiūⁿ lâng tû pùn-sò, kàu it-chīn liáu.

11

Kìⁿ-sio̍k Iâ-lô-phò-àm ê lâng, sí tī siâⁿ-lāi-ê, káu beh chia̍h i; sí tī chhân-iá-ê, khong-tiong ê chiáu beh chia̍h i, in-ūi Iâ-hô-hoa í-keng kóng lah.

12

Taⁿ lí khí-lâi tò-khì lí ê ke; lí ê kha chı̍t-ē jı̍p siâⁿ, kiáⁿ chiū sí.

13

Í-sek-lia̍t chèng lâng beh thî-khàu i, bâi-chòng i, in-ūi sio̍k Iâ-lô-phò-àm ê lâng, chí-ū i tit-tio̍h jı̍p bōng; in-ūi tī Iâ-lô-phò-àm ê ke-tiong, chí-ū i ǹg Iâ-hô-hoa Í-sek-lia̍t ê Siōng-tè, hián-chhut hó-sū.

14

Iâ-hô-hoa beh ūi ka-kī heng-khí chı̍t ê ông, kóan-lí Í-sek-lia̍t; tī hit-jı̍t I beh chián-tû Iâ-lô-phò-àm ê ke; sím-mı̍h sî ah? Chit-tia̍p chiū-sī.

15

In-ūi Iâ-hô-hoa beh phah Í-sek-lia̍t lâng, chhin-chhiūⁿ chúi-tiong ê lô͘-úi teh iô chı̍t-iūⁿ; koh beh pu̍ih-chhut Í-sek-lia̍t ê kun tī I só͘ siúⁿ-sù in lia̍t-chó͘ ê hó-tōe, sì-sòaⁿ in tī Tōa-hô hit-pêng, in-ūi in chō in ê A-sià-lîm, kek Iâ-hô-hoa ê siū-khì.

16

In-ūi Iâ-lô-phò-àm ê chōe, chiū-sī i pún-sin só͘ hōan ê chōe, koh hō͘ Í-sek-lia̍t lâng hōan-chōe, só͘-í Iâ-hô-hoa beh khì-sak Í-sek-lia̍t.

17

Iâ-lô-phò-àm ê bó͘ khí-sin tò-khì kàu Tek-sat; tú-á kàu chhù ê hō͘-tēng, kiáⁿ chiū sí.

18

Í-sek-lia̍t chèng-lâng bâi-chòng i, ūi i thî-khàu, chiàu Iâ-hô-hoa thok I ê lô͘-po̍k sian-ti A-hi-ngá só͘ kóng ê ōe.

19

Iâ-lô-phò-àm kî-û ê sū, i cháiⁿ-iūⁿ kau-chiàn, cháiⁿ-iūⁿ chòe ông, lóng siá tī Í-sek-lia̍t lia̍t-ông ê kì-lio̍k.

20

Iâ-lô-phò-àm chòe ông, kiōng jī-cha̍p-jī nî, chiū kap i ê lia̍t-chó͘ saⁿ-kap khùn; i ê kiáⁿ Ná-tap sòa-chiap i chòe ông.

21

Só͘-lô-bûn ê kiáⁿ Lô-phò-àm tī Iû-tāi chòe ông. Lô-phò-àm chē-ūi ê sî, sì-cha̍p-it hè; tī Iâ-lō͘-sat-léng, chiū-sī Iâ-hô-hoa tùi Í-sek-lia̍t chèng chi-phài tiong só͘ kéng an-tì I ê miâ ê siâⁿ, chòe ông cha̍p-chhit nî. I ê lāu-bú miâ-kiò Ná-má; sī A-bûn lâng.

22

Iû-tāi kok kiâⁿ Iâ-hô-hoa só͘ khòaⁿ-chòe pháiⁿ ê sū, tùi i só͘ kiâⁿ ê chōe kek-tōng I thòng-hūn, pí in lia̍t-chó͘ só͘ chòe koh khah pháiⁿ.

23

In-ūi in tī ta̍k ê kôaiⁿ-soaⁿ, ta̍k châng chhiⁿ-chhùi ê chhiū-kha, khí tôaⁿ, chhòng thiāu-siōng kap A-sià-lîm.

24

Kok-lāi iā ū lôan-tông; Iâ-hô-hoa tī Í-sek-lia̍t lâng ê bīn-chêng só͘ kóaⁿ-chhut ê lia̍t-kok, in chiū o̍h hiah ê kok it-chhè khó-ò͘ⁿ ê sū lâi kiâⁿ.

25

Lô-phò-àm ông gō͘ nî, Ai-kı̍p ông Sī-sat chiūⁿ-lâi kong-kek Iâ-lō͘-sat-léng;

26

chhiúⁿ Iâ-hô-hoa tiān ê pó-mı̍h kap ông-kiong ê pó-mı̍h; lóng tòa--khì; koh chhiúⁿ Só͘-lô-bûn só͘ chòe hiah ê kim ê pîn-pâi.

27

Lô-phò-àm ông chòe tâng ê pîn-pâi lâi thòe i; kau hō͘ kò͘-siú ông-kiong mn̂g ê sī-ōe-tiúⁿ kò͘-siú.

28

Ông ta̍k-pái jı̍p Iâ-hô-hoa ê tiān, sī-ōe chiū tòa chiah ê pîn-pâi, āu-lâi chiū tòa tò-tńg, lâi hē tī sī-ōe ê chhù.

29

Lô-phò-àm kî-û ê sū, kìⁿ i só͘ kiâⁿ ê, kiám bô-kì tī Iû-tāi lia̍t-ông ê kì-lio̍k mah?

30

Lô-phò-àm kap Iâ-lô-phò-àm siông-siông kau-chiàn.

31

Lô-phò-àm kap i ê lia̍t-chó͘ tâng-khùn, kap i ê lia̍t-chó͘ chòng tī Tāi-pı̍t ê siâⁿ; i ê lāu-bú miâ-kiò Ná-má, sī A-bûn lâng. Lô-phò-àm ê kiáⁿ A-pí-iáng sòa-chiap i chòe ông.