Lia̍t-ông siōng-kòan 第 8 章 - 巴克禮全羅

1

Hit-sî Só͘-lô-bûn chū-chı̍p Í-sek-lia̍t ê tióng-ló, kap ta̍k chi-phài ê siú-léng, í-kı̍p Í-sek-lia̍t lâng hiah ê cho̍k-tiúⁿ, kàu Iâ-lō͘-sat-léng Só͘-lô-bûn ông hia, beh chiong Iâ-hô-hoa ê iok-kūi, tùi Tāi-pı̍t siâⁿ, chiū-sī Sek-an, ūn-chiūⁿ--lâi.

2

Í-tha-liām ge̍h, chiū-sī chhit-ge̍h, ê choeh-kî, Í-sek-lia̍t lâng lóng chū-chı̍p kàu Só͘-lô-bûn ông hia.

3

Í-sek-lia̍t ê tióng-ló lóng lâi, hiah ê chè-si kng iok-kūi.

4

In chiū kng Iâ-hô-hoa ê kūi, kap hōe-bō͘, í-kı̍p Pò͘-pîⁿ-lāi it-chhè sèng ê khì-kū chiūⁿ-lâi; chè-si kap Lī-bī lâng lóng kng i chiūⁿ-lâi.

5

Só͘-lô-bûn ông kap chū-chı̍p kàu i hia Í-sek-lia̍t ê chôan-hōe tī iok-kūi chêng hiàn iûⁿ, gû, chòe chè-sū, chōe kàu bōe-sǹg-tit, iā sǹg-bōe-liáu.

6

Chè-si kng Iâ-hô-hoa ê iok-kūi kàu i ê só͘-chāi, jı̍p hit keng chhù ê āu-tiān, kàu Chì-sèng-só͘, hē tī ki-lō͘-peng ê sı̍t-ē.

7

In-ūi ki-lō͘-peng thí-khui in ê sı̍t, tī kūi ê só͘-chāi ê téng-bīn; koh ki-lō͘-peng tī hí(**hit) téng-bīn jia-khàm kūi, kap i ê kǹg.

8

Hiah ê kǹg chin-tn̂g, kǹg-bé tī āu-tiān-chêng ê Sèng-só͘ thang khòaⁿ-kìⁿ, tī gōa-bīn chiū bōe khòaⁿ-kìⁿ; kàu kin-á-jı̍t iáu tī-hia.

9

Kūi-lāi chí-ū nn̄g tè chio̍h-pi, chiū-sī Í-sek-lia̍t lâng chhut Ai-kı̍p tōe, Iâ-hô-hoa kap in lı̍p-iok ê sî, Mô͘-se tī Hô-lia̍t soaⁿ só͘ hē--ê; che í-gōa bô pa̍t-hāng mı̍h.

10

Tng chè-si tùi sèng-só͘ chhut-lâi ê sî, ū hûn chhiong-móa Iâ-hô-hoa ê tiān;

11

tì-kàu chè-si ūi-tio̍h hûn ê iân-kò͘ bōe-ōe-khiā--teh ho̍k-sāi; in-ūi Iâ-hô-hoa ê êng-kng chhiong-móa Iâ-hô-hoa ê tiān.

12

Hit-sî Só͘-lô-bûn kóng, Iâ-hô-hoa bat kóng I beh tiàm tī o͘-o͘ àm-àm ê só͘-chāi.

13

Góa í-keng khí chit keng tiān hō͘ Lí khiā-khí, chòe Lí éng-óan tòa ê só͘-chāi.

14

Ông o̍at-tńg i ê bīn chiok-hok Í-sek-lia̍t hōe-chiòng; Í-sek-lia̍t hōe-chiòng lóng khiā--khí-lâi.

15

I kóng; Iâ-hô-hoa Í-sek-lia̍t ê Siōng-tè sī eng-kai o-ló ê, in-ūi I chhin-chhùi tùi góa ê pē Tāi-pı̍t só͘ èng-ún ê, iā chhin-chhiú èng-giām i, kóng,

16

Tùi Góa chhōa Góa ê peh-sìⁿ Í-sek-lia̍t chhut Ai-kı̍p í-lâi, Góa bē-bat tī Í-sek-lia̍t chèng chi-phài-tiong kéng chı̍t ê siâⁿ, khí tiān hō͘ Góa ê miâ tī-hia; to̍k-to̍k kéng Tāi-pı̍t tī-lí Góa ê peh-sìⁿ Í-sek-lia̍t.

17

Góa ê pē Tāi-pı̍t sim-lāi ū ì-sù, beh ūi Iâ-hô-hoa Í-sek-lia̍t ê Siōng-tè ê miâ khí tiān.

18

Chóng-sī Iâ-hô-hoa tùi góa ê pē Tāi-pı̍t kóng, Lí ê sim ū ì-sù beh ūi Góa ê miâ khí tiān, lí chit ê ì-sù chin hó;

19

to̍k-to̍k lí m̄-thang khí tiān; lí só͘ chhin-siⁿ ê kiáⁿ beh ūi Góa ê miâ khí tiān.

20

Taⁿ Iâ-hô-hoa èng-giām I só͘ kóng ê ōe; góa chiàu Iâ-hô-hoa ê ōe khí-lâi sòa-chiap góa ê pē Tāi-pı̍t, chē Í-sek-lia̍t ê kok-ūi; koh ūi Iâ-hô-hoa Í-sek-lia̍t Siōng-tè ê miâ khí tiān.

21

Góa iā tī-hia ūi iok-kūi pī-pān chı̍t só͘-chāi, kūi-lāi ū Iâ-hô-hoa ê iok, chiū-sī I chhōa lán ê lia̍t-chó͘ chhut Ai-kı̍p ê sî, kap in só͘ lı̍p ê iok.

22

Só͘-lô-bûn tng Í-sek-lia̍t hōe-chiòng ê bīn-chêng, khiā tī Iâ-hô-hoa ê tôaⁿ-chêng, kia̍h-khí chhiú ǹg thiⁿ, kóng,

23

Iâ-hô-hoa Í-sek-lia̍t ê Siōng-tè ah, tī thiⁿ-téng, tī tōe-ē, bô ū Siōng-tè chhin-chhiūⁿ Lí siú-iok kiâⁿ jîn-ài tī Lí hiah ê lô͘-po̍k, chiū-sī chīn-sim kiâⁿ tī Lí ê bīn-chêng ê.

24

Lí tùi Lí ê lô͘-po̍k góa ê pē Tāi-pı̍t só͘ èng-ún ê, Lí ū siú i; Lí chhin-chhùi kóng ê, chhin-chhiú èng-giām i, chiàu kin-á-jı̍t ê khóan.

25

Iâ-hô-hoa Í-sek-lia̍t ê Siōng-tè ah, Lí só͘ èng-ún Lí ê lô͘-po̍k góa ê pē Tāi-pı̍t kóng, Lí ê kiáⁿ-sun nā kín-sīn in ê só͘-chòe, kiâⁿ tī Góa ê bīn-chêng, chhin-chhiūⁿ lí kiâⁿ tī Góa ê bīn-chêng, chiū sio̍k tī lí-ê beh tī Góa ê bīn-chêng chē Í-sek-lia̍t ê kok-ūi éng bô tn̄g; taⁿ kiû Lí èng-giām i.

26

Í-sek-lia̍t ê Siōng-tè ah, Lí tùi Lí ê lô͘-po̍k góa ê pē Tāi-pı̍t só͘ kóng ê, kiû Lí hō͘ i chiâⁿ-chòe sı̍t-sū.

27

Siōng-tè chin-chiàⁿ beh khiā-khí tōe-chiūⁿ mah? Khòaⁿ ah, thiⁿ kap chiah ê thiⁿ ê thiⁿ siōng-chhiáⁿ bô kàu-gia̍h hō͘ Lí khiā-khí, hô-hòng góa só͘ khí chit keng tiān ah?

28

Iâ-hô-hoa góa ê Siōng-tè ah, gōan Lí àⁿ-lo̍h siàu-liām Lí ê lô͘-po̍k ê kî-tó khún-kiû, lâi thiaⁿ Lí ê lô͘-po̍k kin-á-jı̍t só͘ kî-tó tī Lí bīn-chêng ê kiû-kiò kî-tó.

29

Gōan Lí jı̍t-mî khòaⁿ-kò͘ chit ê tiān, chiū-sī Lí só͘ kóng-khí Góa ê miâ beh tī-hia ê só͘-chāi, lâi thiaⁿ. Lí ê lô͘-po̍k só͘ beh ǹg chit só͘-chāi kî-tó ê kî-tó.

30

Lí ê lô͘-po̍k kap Lí ê peh-sìⁿ Í-sek-lia̍t ǹg chit só͘-chāi kî-tó ê sî, gōan Lí thiaⁿ in ê kî-kiû; gōan Lí tī thiⁿ--nih, Lí khiā-khí ê só͘-chāi, lâi thiaⁿ in; Lí thiaⁿ-kìⁿ ê sî, chiū sià-bián.

31

Lâng nā tek-chōe i ê chhù-piⁿ, iā ū lâng ēng chı̍t ê chiù-chōa kah i chiù-chōa, i nā lâi chit keng tiān, tī Lí ê tôaⁿ-chêng chiù-chōa;

32

kiû Lí tī thiⁿ--nih thiaⁿ lâi pān-lí i, sím-phòaⁿ Lí chiah ê lô͘-po̍k, tēng pháiⁿ-lâng ê chōe, chiàu i só͘-kiâⁿ--ê, pò-èng tī i ê thâu-khak; tēng gī-lâng chòe-gī, chiàu i ê gī lâi hō͘ i.

33

Siat-sú Lí ê peh-sìⁿ Í-sek-lia̍t, in-ūi tek-chōe Lí, chiah thâi-su tī tùi-te̍k ê bīn-chêng, in nā kui-ǹg Lí, jīn Lí ê miâ, koh tī chit keng tiān kî-tó khún-kiû Lí;

34

kiû Lí tī thiⁿ--nih thiaⁿ in, lâi sià-bián Lí ê peh-sìⁿ Í-sek-lia̍t ê chōe, hō͘ in tò-lâi Lí só͘ siúⁿ-sù in ê lia̍t-chó͘ ê tōe.

35

Siat-sú in tek-chōe Lí, tì-kàu thiⁿ koaiⁿ-ba̍t, bô lo̍h-hō͘; Lí hêng-ho̍at in ê sî, in nā ǹg chit só͘-chāi kî-tó, jīn Lí ê miâ, lī-khui in ê chōe;

36

kiû Lí tī thiⁿ--nih thiaⁿ in, sià-bián Lí ê lô͘-po̍k kap Lí ê peh-sìⁿ Í-sek-lia̍t ê chōe, tī Lí kà-sī in só͘ tio̍h kiâⁿ ê hó-lō͘ ê sî, koh lo̍h-hō͘ tī Lí ê tōe, chiū-sī Lí siúⁿ-sù Lí ê peh-sìⁿ chòe-gia̍p--ê.

37

Chit ê tōe nā ū ki-hng, un-e̍k, ko͘-tâ, hiú-nōa, chháu-meh, chián-thâng, á-sī in ê tùi-te̍k tī in hiah ê siâⁿ ê tōe ûi-khùn in, bô-lūn ū sím-mı̍h chai-ē, sím-mı̍h phòa-pīⁿ;

38

he̍k-sī chı̍t-lâng, he̍k-sī Lí ê peh-sìⁿ Í-sek-lia̍t ê chèng-lâng, ta̍k-ê chai ka-kī sim-lāi ê chai-ē, ǹg chit keng tiān kia̍h-khí chhiú, bô-lūn cháiⁿ-iūⁿ khún-kiû, cháiⁿ-iūⁿ kî-tó;

39

gōan Lí tī thiⁿ--nih, Lí só͘ khiā-khí ê só͘-chāi, lâi thiaⁿ i, lâi sià-bián, lâi si-hêng; Lí chai in ê sim, chiàu in ta̍k-lâng ê kiâⁿ-chòe lâi khóan-thāi in, (in-ūi sè-kan ta̍k-lâng ê sim, chí ū Lí chai);

40

hō͘ in tī Lí siúⁿ-sù góan lia̍t-chó͘ ê tōe, chı̍t-sì-lâng kèng-ùi Lí.

41

Lūn-kàu gōa-pang lâng, m̄-sī sio̍k Lí ê peh-sìⁿ Í-sek-lia̍t, i ūi-tio̍h Lí ê miâ tùi hn̄g-hn̄g ê só͘-chāi lâi ê,

42

(in-ūi in thiaⁿ-kìⁿ Lí ê tōa-miâ, tōa kôan-lêng ê chhiú, chhun-chhut ê chhiú;) nā lâi ǹg chit ê tiān kî-tó,

43

gōan Lí tī thiⁿ--nih, Lí khiā-khí ê só͘-chāi, lâi thiaⁿ in, chiàu gōa-pang lâng it-chhè só͘ tùi Lí kiû--ê lâi kiâⁿ; hō͘ thiⁿ-ē bān peh-sìⁿ lóng bat Lí ê miâ, kèng-ùi Lí, chhin-chhiūⁿ Lí ê peh-sìⁿ Í-sek-lia̍t chı̍t-iūⁿ; koh hō͘ in chai góa só͘ khí chit keng tiān sī ēng Lí ê miâ lâi chheng--ê.

44

Lí ê peh-sìⁿ nā chhut-khì Lí só͘ chhe in khì ê lō͘, kap tùi-te̍k kau-chiàn, iā ǹg Lí só͘ kéng ê siâⁿ, kap góa ūi-tio̍h Lí ê miâ só͘ khí ê tiān, lâi kî-tó Iâ-hô-hoa;

45

gōan Lí tī thiⁿ--nih lâi thiaⁿ in ê kî-tó khún-kiû, lâi kā in phòaⁿ-tòan.

46

Lí ê peh-sìⁿ nā tek-chōe Lí, (in-ūi bô ū bô hōan-chōe ê lâng,) Lí siū-khì in, chiong in kau hō͘ tùi-te̍k, tì-kàu tùi-te̍k lia̍h in kàu tùi-te̍k ê tōe, he̍k-sī hn̄g he̍k-sī kūn;

47

in nā tī só͘ lia̍h--khì ê tōe, sim-lāi tò-tńg siūⁿ, lâi hóan-hóe; koh tī lia̍h in ê lâng ê tōe, khún-kiû Lí kóng, Góan ū chōe, góan ū pōe-ge̍k, góan ū chòe-pháiⁿ;

48

in nā tī siū lia̍h-khì ê tōe, chiū-sī tùi-te̍k lia̍h in khì ê tōe, chīn-sim chīn-sèng kui-ho̍k Lí, koh ǹg pún-tōe, chiū-sī Lí siúⁿ-sù in lia̍t-chó͘ ê tōe, kap Lí só͘ kéng ê siâⁿ, í-kı̍p góa ūi-tio̍h Lí ê miâ só͘ khí ê tiān, lâi kî-tó Lí;

49

gōan Lí tī thiⁿ--nih, Lí só͘ khiā-khí ê só͘-chāi, thiaⁿ in ê kî-tó khún-kiû, kā in phòaⁿ-tòan;

50

koh sià-bián Lí ê peh-sìⁿ tek-chōe Lí ê, í-kı̍p in it-chhè tek-chōe Lí ê chōe-kòa, hō͘ in tit-tio̍h lîn-bín tī lia̍h in ê lâng ê bīn-chêng, tì-kàu lia̍h in ê lâng lîn-bín in.

51

In-ūi in sī Lí ê peh-sìⁿ, Lí ê sán-gia̍p, sī Lí chhōa in chhut Ai-kı̍p, tùi chù-thih ê lô͘-tiong chhut-lâi--ê.

52

Gōan Lí ê ba̍k-chiu khui khòaⁿ-kò͘ Lí ê lô͘-po̍k ê kî-tó, kap Lí ê peh-sìⁿ Í-sek-lia̍t ê kî-tó, lâi thiaⁿ in it-chhè tùi Lí kiû ê.

53

Chú Iâ-hô-hoa ah, in-ūi Lí bat tùi tōe-chiūⁿ chèng peh-sìⁿ ê tiong-kan hun-piat in, lâi chòe Lí ê sán-gia̍p, sī chiàu Lí chhōa góan ê lia̍t-chó͘ chhut Ai-kı̍p ê sî, thok Lí ê lô͘-po̍k Mô͘-se só͘ kóng ê.

54

Só͘-lô-bûn tī Iâ-hô-hoa ê tôaⁿ-chêng kha-thâu-u kūi--teh, chhiú chhun ǹg thiⁿ, só͘ tùi Iâ-hô-hoa kî-tó khún-kiû-ê í-keng kî-tó bêng-pe̍k, chiū khí-lâi;

55

i chiū khiā-teh, tōa-siaⁿ chiok-hok Í-sek-lia̍t chôan hōe-chiòng, kóng,

56

Iâ-hô-hoa sī eng-kai tio̍h o-ló--ê, in-ūi I it-chhè só͘ èng-ún--ê, siúⁿ-sù pêng-an hō͘ I ê peh-sìⁿ Í-sek-lia̍t, kìⁿ-nā thok I ê lô͘-po̍k Mô͘-se só͘ èng-ún ê hó-ōe, bô chı̍t-kù lo̍k-khong.

57

Gōan Iâ-hô-hoa lán ê Siōng-tè kap lán tī-teh, chhin-chhiūⁿ I kap lán ê lia̍t-chó͘ tī-teh chı̍t-iūⁿ; gōan I bô lī-khui lán, bô pàng-sak lán;

58

hō͘ lán ê sim kui-ǹg I, lâi kiâⁿ I it-chhè ê tō-lō͘, siú I só͘ bēng-lēng lán ê lia̍t-chó͘ ê kài-bēng, I ê lu̍t-lē, I ê hoat-tō͘.

59

Góa taⁿ tī Iâ-hô-hoa ê bīn-chêng só͘ kî-kiû chiah ê ōe, gōan chiah ê ōe jı̍t-mî kūn tī lán ê Siōng-tè Iâ-hô-hoa; koh jı̍t-jı̍t chiàu tāi-chì só͘ ha̍p-gî--ê ūi I ê lô͘-po̍k phòaⁿ-tòan, kap I ê peh-sìⁿ Í-sek-lia̍t phòaⁿ-tòan.

60

Hō͘ tōe-chiūⁿ bān peh-sìⁿ chai Iâ-hô-hoa sī Siōng-tè, I í-gōa bô pa̍t-ê.

61

Só͘-í lín ê sim tio̍h sûn-chôan ǹg Iâ-hô-hoa lán ê Siōng-tè, chun-thàn I ê lu̍t-lē, siú I ê kài-bēng, chhin-chhiūⁿ kin-á-jı̍t ê khóan.

62

Ông kap Í-sek-lia̍t chèng peh-sìⁿ saⁿ-kap tī Iâ-hô-hoa ê bīn-chêng hiàn-chè.

63

Só͘-lô-bûn hiàn siā-un ê chè, chiū-sī hiàn hō͘ Iâ-hô-hoa ê, gû nn̄g-bān nn̄g-chheng chiah, iûⁿ cha̍p-jī-bān chiah. Án-ni, ông kap Í-sek-lia̍t chèng peh-sìⁿ, ūi Iâ-hô-hoa ê tiān kiâⁿ hiàn-tiān ê lé.

64

Tng hit-jı̍t, ông hun-piat Iâ-hô-hoa tiān-chêng īⁿ-tiong ê só͘-chāi, tī-hia hiàn sio-chè, sò͘-chè, kap siā-un-chè ê iû, in-ūi Iâ-hô-hoa thâu-chêng ê tâng-tôaⁿ siuⁿ-sòe, bōe iông-ún-tit hiah ê sio-chè, sò͘-chè, kap siā-un-chè ê iû.

65

Hit-sî Só͘-lô-bûn kap Í-sek-lia̍t chèng-lâng, chiū-sī tùi Hap-má ê lō͘-kháu kàu Ai-kı̍p ê khoe, lóng kap i chū-chı̍p chòe tōa-hōe, tī Iâ-hô-hoa lán Siōng-tè ê bīn-chêng siú choeh-iân chhit-jı̍t, koh chhit-jı̍t, kiōng cha̍p-sì jı̍t.

66

Tē-poeh jı̍t ông chhe peh-sìⁿ khì; in chiū kā ông chiok-hok; in-ūi Iâ-hô-hoa tùi I ê lô͘-po̍k Tāi-pı̍t kap I ê peh-sìⁿ Í-sek-lia̍t só͘ si-chhut it-chhè ê un-hūi, chiū hoaⁿ-hí, sim-lāi khòai-lo̍k, ta̍k-ê tò-khì in ê pò͘-pîⁿ.