Pí-tek chiân 第 2 章 - 巴克禮全羅

1

Só͘-í lín tû-khì lóng-chóng ê ok-to̍k, í-kı̍p lóng-chóng ê khúi-khiat, kap ké-hó, kap òan-tò͘, kap lóng-chóng húi-pòng ê ōe;

2

chiū tio̍h chhin-chhiūⁿ tú-á siⁿ ê eⁿ-á him-bō͘ sîn-lêng choan ê lin, hō͘ lín tùi tióng-tōa kàu tit-tio̍h kiù.

3

Lín nā chhì-tio̍h chai Chú sī chû-siān, chiū tio̍h án-ni.

4

I sī o̍ah chio̍h, hō͘ lâng khì-sak, nā-sī hō͘ Siōng-tè kéng-sóan tin-tiōng, lín chiū-kūn I,

5

iā chhin-chhiūⁿ o̍ah chio̍h khí chòe sîn-lêng ê chhù, chòe sèng ê chè-si-pan, lâi hiàn sîn-lêng ê chè, tùi Iâ-so͘ Ki-tok ōe hō͘ Siōng-tè hoaⁿ-hí chiap-la̍p ê.

6

In-ūi sèng-keng ū kì-chài kóng, Khòaⁿ ah, Góa ēng só͘ kéng-sóan, só͘ tin-tiōng ê chhù-kak-thâu iàu-kín ê chio̍h, hē tī Sûn-siâⁿ. Sìn I ê lâng put-tì kiàn-siàu.

7

Án-ni hit ê pó-pòe sī kui tī lín sìn ê lâng; nā-sī tī hiah ê m̄ sìn ê lâng, chiū Khí chhù ê sai-hū só͘ khì-sak ê chio̍h, Chiâⁿ chòe chhù-kak ê thâu-tè chio̍h;

8

iū-koh, Chòe po̍ah-tó lâng ê chio̍h, gāi-tio̍h lâng ê chio̍h-pôaⁿ;in m̄ sūn-thàn tō-lí lâi po̍ah-tó; ōe kàu án-ni, sī pún tiāⁿ-tio̍h teh.

9

To̍k-to̍k lín sī kéng-sóan ê cho̍k, sī ông iā sī chè-si, sī sèng ê pang-kok, sī Siōng-tè ka-kī ê peh-sìⁿ; hō͘ lín thôan-pò hit ê tiàu lín chhut o͘-àm, jı̍p I bî-biāu ê kng ê ê hó-tek;

10

lín chêng m̄ sī peh-sìⁿ, taⁿ sī Siōng-tè ê peh-sìⁿ; chêng bô siū lîn-bín, taⁿ ū tit-tio̍h lîn-bín.

11

Só͘ thiàⁿ ê hiaⁿ-tī ah, lín chòe kià-kha chhut-gōa ê lâng, góa khǹg lín tio̍h kìm-kài jio̍k-thé ê su-io̍k, chiū-sī kong-kek lêng-hûn ê;

12

lín tī gōa-pang-tiong kiâⁿ-chòe tio̍h toan-chiàⁿ; hō͘ in khòaⁿ-kìⁿ lín toan-chiàⁿ ê phín-hēng, chiū tī in só͘ húi-pòng lín chòe kiâⁿ pháiⁿ ê sū, in thang tī kàm-chhat ê jı̍t kui êng-kng Siōng-tè.

13

Lín ūi-tio̍h Chú tio̍h hâng-ho̍k kìⁿ-nā lâng só͘ siat ê ; he̍k-sī ông, sī siōng tōa ê;

14

he̍k-sī koaⁿ-hú, sī i só͘ chhe lâi hêng-ho̍at pháiⁿ lâng, o-ló hó lâng ê.

15

In-ūi Siōng-tè ê chí-ì sī án-ni, chiū-sī lín kiâⁿ hó, lâi that-ba̍t gōng lâng ê m̄ chai-iáⁿ;

16

chòe chū-iû ê, iā m̄ sī ēng chū-iû chòe ok-to̍k ê jia-khàm, chiū-sī chòe Siōng-tè ê lô͘-po̍k.

17

Tio̍h chun-kèng chèng lâng: thiàⁿ chèng hiaⁿ-tī: kiaⁿ-ùi Siōng-tè: chun-kèng kun-ông.

18

Chòe lô͘-po̍k ê, hōan sū tio̍h kiaⁿ-hiâⁿ sūn-ho̍k chú-lâng; m̄-nā tī siān-liông un-sûn ê, liân tī koai-phiah ê, iā tio̍h án-ni.

19

In-ūi lâng siū oan-óng, nā-sī ūi-tio̍h thian-liông ǹg Siōng-tè lâi tam-iu, che sī thang o-ló.

20

In-ūi lín nā hōan chōe siū phah lâi jím-siū, ū sím-mı̍h khó-chhú? lín nā kiâⁿ hó siū-khó͘ lâi jím-siū, che tī Siōng-tè ê bīn-chêng sī thang o-ló.

21

In-ūi lín siū-tiàu pún sī beh án-ni; in-ūi Ki-tok iā thòe lín siū khó͘, lâu bô͘-iūⁿ hō͘ lín, beh hō͘ lín tè I ê kha-pō͘;

22

I bô hōan chōe, chhùi-lāi bô khúi-khiat;

23

hō͘ lâng mē, bô tò mē lâng; siū khó͘ bô pàng-tiau; to̍k-to̍k chiong pún-sin kau-thok hit ê chiàu kong-gī sím-phòaⁿ ê;

24

I tī chhâ-nı̍h chhin-sin tam-tng lán ê chōe tī I ê sin-khu, hō͘ lán ǹg chōe hit bīn sí ê lâng ōe ǹg gī chit bīn lâi o̍ah; tùi I ê siong-hûn lín tit-tio̍h i-hó.

25

In -ūi lín chêng chhin-chhiūⁿ iûⁿ bê lō͘; nā-sī taⁿ kui tī lín lêng-hûn ê Bo̍k-chiá, iā sī Kàm-tok.