Sat-bó͘-jíⁿ siōng-kòan 第 5 章 - 巴克禮全羅

1

Hui-lī-sū lâng tòa Siōng-tè ê iok-kūi, tùi Í-piān-í-siā kng kàu A-sı̍t-tu̍t.

2

Hui-lī-sū lâng chiong Siōng-tè ê kūi kng jı̍p Tāi-kún ê biō, hē tī Tāi-kún ê sin-piⁿ.

3

Keh chá-khí A-sı̍t-tu̍t ê lâng khí-lâi, khòaⁿ-kìⁿ Tāi-kún po̍ah-tó tī Iâ-hô-hoa ê kūi-chêng, bīn phak tī tōe-nih; chiū chiong Tāi-kún koh chhāi tī i ê gôan-ūi.

4

Koh keh-jı̍t thàu-chá khí-lâi, khòaⁿ-kìⁿ Tāi-kún po̍ah-tó tī Iâ-hô-hoa ê kūi-chêng, bīn phak tī tōe-nih; koh Tāi-kún ê thâu kap nn̄g-ki chhiú-chiúⁿ lóng chı̍h tī hō͘-tēng téng; chí-ū chhun Tāi-kún khu̍t-khu̍t ê sin-khu.

5

Ūi-tio̍h án-ni, Tāi-kún ê chè-si, kap it-chhè jı̍p A-sı̍t-tu̍t Tāi-kún ê biō ê lâng, lóng bô ta̍h Tāi-kún ê hō͘-tēng, tı̍t-kàu kin-á-jı̍t.

6

Iâ-hô-hoa ê chhiú tāng-tāng phah A-sı̍t-tu̍t lâng, pāi-hōai in, hō͘ in hoat lia̍p-á-chèng; chiū-sī A-sı̍t-tu̍t kap i ê kéng-lāi lóng sī án-ni.

7

A-sı̍t-tu̍t lâng khòaⁿ-kìⁿ án-ni, chiū kóng, Í-sek-lia̍t Siōng-tè ê kūi m̄-thang tiàm tī lán tiong-kan, in-ūi I ê chhiú tāng-tāng phah lán, kap lán ê siōng-tè Tāi-kún.

8

Chiū chhe lâng chhiáⁿ Hui-lī-sū hiah ê siú-léng lâi chū-chı̍p in hia, kóng, Í-sek-lia̍t Siōng-tè ê kūi lán tio̍h cháiⁿ-iūⁿ siat-hoat ah? In ìn kóng, Thang chiong Í-sek-lia̍t Siōng-tè ê kūi ūn khì Ka-te̍k; chiū chiong Í-sek-lia̍t Siōng-tè ê kūi ūn kàu hia.

9

Ūn-kàu liáu-āu, Iâ-hô-hoa ê chhiú kong-kek hit ê siâⁿ, hō͘ hit ê siâⁿ ê lâng chin tōa-lōan; koh phah siâⁿ-lāi ê lâng bô-lūn tōa-sòe, in lóng hoat lia̍p-á-chèng.

10

In chiū chiong Siōng-tè ê kūi sàng-kàu Í-kek-lûn. Siōng-tè ê kūi kàu Í-kek-lûn, Í-kek-lûn ê lâng chiū hoah kóng, In chiong Í-sek-lia̍t Siōng-tè ê kūi ūn-kàu lán chia, beh hāi-sí lán kap lán ê peh-sìⁿ.

11

Chiū chhe lâng chū-chı̍p Hui-lī-sū lóng-chóng ê siú-léng, kóng Í-sek-lia̍t Siōng-tè ê iok-kūi tio̍h sàng i khì hō͘ i tò-khì pún só͘-chāi, bián-tit i hāi-sí lán kap lán ê peh-sìⁿ; hit-sî thong-siâⁿ ū tì-kàu sí ê jiáu-lōan; in-ūi Siōng-tè ê chhiú tī-hia phah in chin-tāng;

12

bô sí ê lâng lóng tú-tio̍h lia̍p-á-chèng; siâⁿ-tiong thî-khàu ê siaⁿ thàu kàu thiⁿ-nih.