Thê-mô͘-thài chiân 第 2 章 - 巴克禮全羅

1

Só͘-í góa só͘ khòan-bián ê, tē it chiū-sī thòe chèng lâng khún-kiû, kî-tó, kiû un, chiok-siā;

2

thòe chiah ê ông kap lóng-chóng ê koaⁿ-hú kiû; hō͘ lán hōan sū kèng-khiân toan-chong, thang an-jiân thiâm-chēng lâi kè jı̍t.

3

Che sī hó, koh tit-tio̍h chiap-la̍p tī kiù lán ê Siōng-tè ê bīn-chêng;

4

I ài chèng lâng tit-tio̍h kiù, iā chhim chai chin-lí.

5

In-ūi Siōng-tè sī chı̍t-ê, Siōng-tè kap lâng ê tiong-kan tiong-pó iā sī chı̍t-ê, chiū-sī chòe lâng ê Ki-tok Iâ-so͘;

6

I ūi-tio̍h chèng lâng hiàn pún-sin, chòe thòe-sio̍k ê kè-chîⁿ, ū kı̍p-sî chèng-bêng;

7

in-ūi án-ni góa siū siat-lı̍p chòe soan-thôan ê, chòe sù-tô͘, ēng sìn ēng chin-sı̍t chòe gōa-pang ê kàu-su; góa só͘ kóng sī chin-sı̍t bô pe̍h-chha̍t.

8

Só͘-í góa ài ta-po͘-lâng kia̍h-khí sèng ê chhiú, bô siū-khì bô giâu-gî, ta̍k só͘-chāi kî-tó;

9

iā ài hū-jîn-lâng táⁿ-pān sò͘-sò͘, ēng liâm-thí siú-kí ka-kī chng-thāⁿ, m̄ sī ēng piⁿ thâu-mn̂g, kap kim-khì, á-sī chin-chu, á-sī ta̍t chîⁿ ê i-chiûⁿ;

10

sī ēng hó só͘ kiâⁿ chòe chng-thāⁿ, che sī ka-kī jīn chòe kèng Siōng-tè ê hū-jîn-lâng só͘ ha̍p-gî ê.

11

Hū-jîn-lâng tio̍h thiâm-chēng, it-bī hâng-ho̍k lâi ha̍k-sı̍p.

12

Góa m̄ chún hū-jîn-lâng thôan-kàu, á-sī kóan-hat ta-po͘-lâng, to̍k-to̍k tio̍h thiâm-chēng.

13

In-ūi A-tong tāi-seng siū chō, jiân-āu chiah Hā-oa.

14

Koh A-tong bô siū khi-phiàn, to̍k-to̍k hū-jîn-lâng siū khi-phiàn lâi hām-lo̍h chōe.

15

Chóng-sī in nā tiàm-tī sìn kap jîn-ài kap chiâⁿ-sèng kiam chiat-chè, i chiū beh tùi siⁿ kiáⁿ lâi tit kiù.