Thê-mô͘-thài chiân 第 4 章 - 巴克禮全羅

1

Nā-sī Sèng Sîn bêng-bêng kóng, tī āu-lâi ê sî-kî beh ū lâng pōe-biū sìn, ì-hiòng hiah ê bê-he̍k lâng ê sîn, kap kúi ê kà-sī,

2

tùi pe̍h-chha̍t lâng ê ké-hó, in ê liông-sim chhin-chhiūⁿ hō͘ jia̍t ê thih kù-tio̍h,

3

kìm-chí kè-chhōa, kìm-kài chia̍h-mı̍h, chiū-sī Siōng-tè só͘ chhòng-chō, hō͘ sìn lâi bêng-pe̍k chin-lí ê lâng, ēng chiok-siā lâi hióng-siū ê.

4

In-ūi Siōng-tè só͘ chhòng-chō ê mı̍h lóng sī hó, nā chiok-siā lâi niá-siū i, chiū bô chı̍t hāng thang khì-sak.

5

In-ūi tùi Siōng-tè ê ōe kap kî-tó chiū chiâⁿ-sèng.

6

Nā chiong chiah ê sū tiám-chhíⁿ hiaⁿ-tī, chiū lí beh chòe Ki-tok Iâ-so͘ hó ê chhe-ēng, ēng sìn-tō ê ōe kap lí só͘ sūn-thàn hó ê kà-sī ê ōe lâi tit-tio̍h pôe-iúⁿ.

7

Tio̍h khì-sak chho͘-sio̍k ê ōe kap lāu hū-jîn-lâng ê phàⁿ-kó͘. Tio̍h ka-kī liān-sı̍p kàu tī kèng-khiân.

8

In-ūi liān-sı̍p seng-khu hit ê lī-ek sī sió-khóa, nā-sī kèng-khiân chiū hōan sū ū lī-ek; in-ūi ū hiān-sî kap chiong-lâi o̍ah-miā ê èng-ún.

9

Chit kù ōe sī thang sìn, thang chiâu-chn̂g chiap-la̍p ê.

10

In-ūi lán tio̍h-bôa chhut-la̍t sī ūi-tio̍h chit-ê, in-ūi lán ê ǹg-bāng chāi-tī chin-o̍ah ê Siōng-tè, I sī chèng lâng ê Kiù-chú, tī chiah ê sìn ê lâng koh khah sī.

11

Chiah ê sū lí tio̍h bēng-lēng lâi kà-sī.

12

Bo̍h-tit in-ūi lí ê siàu-liân hō͘ lâng khòaⁿ-khin; tio̍h tī kóng ōe, tī kiâⁿ chòe, tī jîn-ài, tī sìn, tī chheng-khì, chòe sìn ê lâng ê bô͘-iūⁿ.

13

Tio̍h tì-ì tha̍k-chheh, khòan-bián kà-sī, kàu tī góa lâi.

14

Lí sim-lāi ê un-sù, tùi sian-ti ê ōe kap tiúⁿ-ló-hōe hōaⁿ chhiú lâi hō͘ lí ê, lí m̄ thang hut-lio̍k.

15

Lí tio̍h tì-ì choan-sim tī chiah ê sū, hō͘ lí ê chìn-pō͘ hián-bêng tī chèng lâng.

16

Tio̍h kín-sīn lí pún-sin í-kı̍p lí ê kà-sī, siông-siông koan-sim tī chiah ê sū; in-ūi án-ni kiâⁿ, chiū beh kiù lí pún-sin kap thiaⁿ lí ê lâng.