Thiap-sat-lô-nî-ka chiân 第 2 章 - 巴克禮全羅

1

In-ūi, hiaⁿ-tī, lín ka-kī chai góan chêng kàu lín tiong-kan m̄ sī khang-khang;

2

to̍k-to̍k tī Hui-lı̍p-pí í-keng tāi-seng siū khó͘ tú-tio̍h lêng-jio̍k, chiàu lín só͘ chai ê, góan tī chōe-chōe cheng-chiàn ê tiong-kan, óa-khò lán ê Siōng-tè, tit-tio̍h hó-táⁿ tùi lín kóng Siōng-tè ê hok-im.

3

In-ūi góan ê khòan-bián m̄ sī chhut tī chha-biū, m̄ sī chhut tī bô chheng-khì, iā m̄ sī ēng kan-chà,

4

chiū-sī góan hō͘ Siōng-tè giām-kè, chiah ēng hok-im thok-tiōng góan, góan chiū chiàu án-ni lâi kóng, m̄ sī chhin-chhiūⁿ hō͘ lâng hoaⁿ-hí ê, chiū-sī hō͘ giām góan ê sim ê Siōng-tè hoaⁿ-hí.

5

In-ūi góan lóng bē bat ēng thiám-mī ê ōe, chiàu lín só͘ chai ê, iā bô ēng chng-thāⁿ lâi jia-khàm tham-sim, Siōng-tè chòe kan-chèng.

6

Góan chòe Ki-tok ê sù-tô͘, sui-jiân thang kah lâng kèng-tiōng góan, chóng-sī m̄ bat tùi lâng kiû êng-kng, iā bô tùi lín, iā bô tùi pa̍t lâng.

7

Góan chiū-sī un-jiû tī lín tiong-kan, chhin-chhiūⁿ lin-bú io ka-kī ê kiáⁿ-jî.

8

Chhin-chhiūⁿ án-ni góan in-ūi lôan-bō͘ lín, chiū m̄ nā Siōng-tè ê hok-im, liân ka-kī ê sìⁿ-miā iā hoaⁿ-hí hō͘ lín; in-ūi lín sī góan só͘ thiàⁿ-thàng ê.

9

Hiaⁿ-tī ah, lín kì-tit góan ê tio̍h-bôa kap kan-khó͘, ài bián-tit thoa-lūi lín chı̍t lâng, chiū mî-jı̍t chòe kang, lâi thôan Siōng-tè ê hok-im hō͘ lín.

10

Lín chòe kan-chèng, Siōng-tè iā chòe kan-chèng, góan tùi lín sìn ê lâng, chòe-lâng sī cháiⁿ-iūⁿ sèng-kiat, kong-gī, bô thang hiâm;

11

chhin-chhiūⁿ lín chai góan cháiⁿ-iūⁿ khóan-thāi lín ta̍k lâng chhin-chhiūⁿ lāu-pē khóan-thāi ka-kī ê kiáⁿ-jî, ū khòan-bián lín, iā an-ùi, iā kan-chèng;

12

sī beh hō͘ lín kiâⁿ tāi-chì ha̍p tī Siōng-tè, chiū-sī tiàu lín jı̍p I ê kok kap êng-kng ê.

13

Só͘-í góan iā kám-siā Siōng-tè bô soah, in-ūi lín tùi góan sêng-siū só͘ thiaⁿ Siōng-tè ê tō-lí ê sî, lín chiap-la̍p i, bô lia̍h-chòe lâng ê tō-lí, chiū-sī lia̍h-chòe Siōng-tè ê tō-lí, (sı̍t-chāi chin-chiàⁿ sī), che chiū-sī chhut-la̍t kiâⁿ tī lín sìn ê lâng ê tiong-kan.

14

In-ūi, hiaⁿ-tī ah, lín ū o̍h Iû-thài tōe, tiàm-tī Ki-tok Iâ-so͘, Siōng-tè chiah ê kàu-hōe, in-ūi lín siū-tio̍h lín tâng cho̍k ê hām-hāi, chhin-chhiūⁿ in siū-tio̍h Iû-thài lâng hām-hāi chı̍t iūⁿ.

15

Iû-thài lâng hāi-sí Chú Iâ-so͘ kap chiah ê sian-ti, iā kek-tio̍k góan; in bô hō͘ Siōng-tè hoaⁿ-hí, koh kap chèng lâng chòe tùi-te̍k;

16

góan kà-sī gōa-pang lâng, beh hō͘ in tit-tio̍h kiù, in chó͘-tòng góan, tì-kàu in ê chōe-ok sî-sî teh kòan-móa; nā-sī siū-khì kàu tī in í-keng ke̍k-thâu.

17

Hiaⁿ-tī ah, góan chiām-sî kap lín lī-pia̍t, seng-khu lī-pia̍t sim bô lī-pia̍t, chiū un-khûn ná chhiat chin ài kìⁿ-tio̍h lín ê bīn.

18

In-ūi góan ài chiū-kūn lín, góa Pó-lô chı̍t pái koh chı̍t pái ài khì, nā-sī Sat-tàn chó͘-tòng góan.

19

In-ūi góan ê ǹg-bāng kap hoaⁿ-hí, í-kı̍p só͘ khoa-kháu ê bián-liû sī sím-mı̍h? Kiám m̄ sī lín tng lán ê Chú Iâ-so͘ koh-lâi ê sî, tī I ê bīn-chêng mah?

20

In- ūi lín sī góan ê êng-kng kap hoaⁿ-hí.