Le̍k-tāi chì-lio̍k hā-kòan 第 36 章 - 巴克禮全羅

1

Kok-bîn ēng Iok-se-a ê kiáⁿ Iok-hap-su siat-lı̍p chòe ông, tī Iâ-lō͘-sat-léng sòa-chiap i ê lāu-pē.

2

Iok-hap-su chē-ūi ê sî, jī-cha̍p-saⁿ hè, tī Iâ-lō͘-sat-léng chòe ông le̍k-kè saⁿ-ge̍h jı̍t.

3

Ai-kı̍p ông tī Iâ-lō͘-sat-léng hòe i, koh ho̍at hit kok chìn-kòng gûn chı̍t-pah tha-liân-tek, kim chı̍t tha-liân-tek.

4

Ai-kı̍p ông siat-lı̍p i ê hiaⁿ Í-lī-ngá-kèng chòe Iû-tāi kap Iâ-lō͘-sat-léng ê ông, ōaⁿ i ê miâ kiò Iok-ngá-kèng; Nî-ko tòa i ê sió-tī Iok-hap-su kàu Ai-kı̍p.

5

Iok-ngá-kèng chē-ūi ê sî, jī-cha̍p-gō͘ hè, tī Iâ-lō͘-sat-léng chòe ông kiōng cha̍p-it nî; kiâⁿ Iâ-hô-hoa i ê Siōng-tè só͘ khòaⁿ-chòe pháiⁿ ê sū.

6

Pa-pí-lûn ông Nî-pò͘-kah-nî-sat chiūⁿ lâi kong-kek i, ēng tâng-liān pa̍k i, beh tòa i kàu Pa-pí-lûn.

7

Nî-pò͘-kah-nî-sat koh chiong Iâ-hô-hoa tiān-lāi ê khì-kū tòa kàu Pa-pí-lûn, hē tī Pa-pí-lûn i ê biō-lāi.

8

Iok-ngá-kèng kî-û ê sū, kap i só͘ kiâⁿ khó-ò͘ⁿ ê sū, kap i ê put-chèng, lóng kì tī Í-sek-lia̍t kap Iû-tāi lia̍t-ông ê kì-lio̍k. I ê kiáⁿ Iok-ngá-kun sòa-chiap i chòe ông.

9

Iok-ngá-kun chē-ūi ê sî, poeh-hè, tī Iâ-lō͘-sat-léng chòe ông saⁿ-ge̍h-jı̍t liân cha̍p-jı̍t; kiâⁿ Iâ-hô-hoa só͘ khòaⁿ-chòe pháiⁿ ê sū.

10

Kè-nî Nî-pò͘-kah-nî-sat chhe lâng tòa i kap Iâ-hô-hoa tiān-lāi hiah ê pó-pòe ê khì-kū kàu Pa-pí-lûn; chiū siat-lı̍p i ê chek Se-tí-ka chòe Iû-tāi kap Iâ-lō͘-sat-léng ê ông.

11

Se-tí-ka chē-ūi ê sî, jī-cha̍p-it hè, tī Iâ-lō͘-sat-léng chòe ông kiōng cha̍p-it nî.

12

I kiâⁿ Iâ-hô-hoa i ê Siōng-tè só͘ khòaⁿ-chòe pháiⁿ ê sū; sian-ti Iâ-lī-bí ēng Iâ-hô-hoa só͘ hoan-hù-ê thôan hō͘ i, i iû-gôan bô ka-kī khiam-pi tī i ê bīn-chêng.

13

Nî-pò͘-kah-nî-sat ông bat kah i kí Siōng-tè lâi chiù-chōa; chóng-sī i pōe-pōan, ngī i ê ām-kún, kò͘-chip i ê sim, m̄ kui-sūn Iâ-hô-hoa Í-sek-lia̍t ê Siōng-tè.

14

Koh hiah ê chè-si ê thâu-ba̍k kap peh-sìⁿ iā hōan tōa-chōe, o̍h gōa-pang it-chhè khó-ò͘ⁿ ê sū, phah lâ-sâm Iâ-hô-hoa tī Iâ-lō͘-sat-léng hun-piat chòe-sèng ê tiān.

15

Iâ-hô-hoa in lia̍t-chó͘ ê Siōng-tè thok I hiah ê sù-chiá, chhe in khì peh-sìⁿ hia, sī thàu-chá khí-lâi chhe i; in-ūi I lîn-bín I ê peh-sìⁿ kap I khiā-khí ê só͘-chāi.

16

Chóng-sī in thí-chhiò Siōng-tè ê sù-chiá, biáu-sī I ê ōe, ki-chhì I ê sian-ti, tı̍t-kàu Iâ-hô-hoa tōa siū-khì I ê peh-sìⁿ, bô hoat-tō͘ thang i-tī.

17

Só͘-í Siōng-tè chhōa Ka-le̍k-tí lâng ê ông lâi kong-kek in, tī in sèng-só͘ ê chhù ēng to thâi-sí in ê siàu-liân lâng, bô lîn-bín in siàu-liân ê ta-po͘-teng, á-sī chāi-sek-lú, lāu kap pe̍h-thâu-mn̂g--ê; Siōng-tè chiong in lóng kau tī i ê chhiú.

18

I koh chiong Siōng-tè ê tiān tōa-sòe ê khì-kū, kap Iâ-hô-hoa tiān-lāi ê châi-pó, í-kı̍p ông kap hiah ê siú-léng ê châi-pó, lóng tòa kàu Pa-pí-lûn.

19

In sio Siōng-tè ê chhù, thiah-húi Iâ-lō͘-sat-léng ê siâⁿ-chhiûⁿ, ēng hé sio hiah ê kiong-tiān, húi-hōai hiah ê pó-pòe ê khì-kū.

20

Kìⁿ-nā thoat-lī to-kiàm ê, i tòa in kàu Pa-pí-lûn; in chòe i kap i ê kiáⁿ-sun ê lô͘-po̍k, kàu Pho-su kok heng-khí.

21

Che sī èng-giām Iâ-hô-hoa thok Iâ-lī-bí só͘ kóng ê ōe, thèng-hāu thó͘-tōe hióng-siū i ê an-hioh; in-ūi i pha-hng ê sî siú an-hioh, kàu móa chhit-cha̍p nî.

22

Tng Pho-su ông Kó͘-lia̍t gôan--nî, in-ūi beh èng-giām Iâ-hô-hoa thok Iâ-lī-bí só͘ kóng ê ōe, Iâ-hô-hoa chiū kek-tōng Pho-su ông Kó͘-lia̍t ê sim, hō͘ i soan-pò͘ tī thong-kok, koh siá i, kóng,

23

Pho-su ông Kó͘-lia̍t án-ni kóng, Thiⁿ-téng ê Siōng-tè Iâ-hô-hoa chiong thiⁿ-ē ê bān-kok siúⁿ-sù góa; koh bēng-lēng góa tī Iû-tāi ê Iâ-lō͘-sat-léng kā I khí tiān. Lín tiong-kan kìⁿ-nā chòe I ê peh-sìⁿ ê, thang chiūⁿ-khì, gōan Iâ-hô-hoa i ê Siōng-tè kap i tī-teh.