Le̍k-tāi chì-lio̍k hā-kòan 第 5 章 - 巴克禮全羅

1

Tùi án-ni Só͘-lô-bûn ūi-tio̍h Iâ-hô-hoa ê tiān só͘ chòe ê kang lóng ôan. Só͘-lô-bûn chiong i ê lāu-pē Tāi-pı̍t só͘ hiàn hiah ê mı̍h tòa jı̍p-khì; i ê gûn, i ê kim, i hiah ê khì-kū, hē tī Siōng-tè tiān-lāi ê hú-khò͘.

2

Hit-sî Só͘-lô-bûn chū-chı̍p Í-sek-lia̍t ê tiúⁿ-ló, kok chi-phài ê siú-léng, kap Í-sek-lia̍t lâng hiah ê cho̍k-tiúⁿ, kàu Iâ-lō͘-sat-léng; beh chiong Iâ-hô-hoa ê iok-kūi, tùi Tāi-pı̍t siâⁿ, chiū-sī Sek-an, ūn chiūⁿ--lâi.

3

Í-sek-lia̍t chèng-lâng chiū tī chhit-ge̍h ê choeh-kî, lóng chū-chı̍p kàu ông hia.

4

Í-sek-lia̍t chiah ê tiúⁿ-ló kàu-tè; hiah ê Lī-bī lâng kng iok-kūi.

5

In chiū kng iok-kūi, kap hōe-bō͘, kap Pò͘-pîⁿ-lāi it-chhè sèng ê khì-kū, chiūⁿ--lâi; chè-si Lī-bī lâng lóng kng i chiūⁿ--lâi.

6

Só͘-lô-bûn ông kap chū-chı̍p kàu i hia Í-sek-lia̍t ê chôan-hōe, tī iok-kūi chêng hiàn iûⁿ, gû, chòe chè-sū, chōe kàu bōe-sǹg-tit, iā sǹg-bōe-liáu.

7

Chè-si kng Iâ-hô-hoa ê iok-kūi kàu i ê só͘-chāi, jı̍p hit keng chhù ê āu-tiān, kàu chì-sèng-só͘, hē tī ki-lō͘-peng ê sı̍t-ē;

8

in-ūi ki-lō͘-peng thí-khui in ê sı̍t, tī kūi ê só͘-chāi ê téng-bīn; ki-lō͘-peng tī hí(**hit) téng-bīn jia-khàm kūi kap i ê kǹg;

9

hiah ê kǹg chin-tn̂g, i ê kǹg-bé tùi iok-kūi tī āu-tiān chêng, thang khòaⁿ-kìⁿ, tī gōa-bīn chiū bōe khòaⁿ-kìⁿ; kàu kin-á-jı̍t iáu tī-hia.

10

Kūi-lāi chí-ū nn̄g tè chio̍h-pi, chiū-sī Í-sek-lia̍t lâng chhut Ai-kı̍p tōe, Iâ-hô-hoa kap in lı̍p-iok ê sî, Mô͘-se tī Hô-lia̍t soaⁿ só͘ hē--ê; che í-gōa bô pa̍t-hāng mı̍h.

11

Hiah ê chè-si chhut sèng-só͘, in-ūi só͘ tī-hia ê chè-si lóng í-keng ka-kī chheng-khì, bô chiàu in ê pan-lia̍t;

12

Lī-bī lâng tiong chèng chhiùⁿ-koa--ê, chiū-sī A-sat, Hi-bān, Iâ-tō͘-tùn kap in hiah ê kiáⁿ, hiah ê hiaⁿ-tī lóng chhēng iù-tōe-saⁿ, khiā tī tôaⁿ ê tang--sì, the̍h nâ-po̍ah kap sek kap khîm; koh ū chè-si pah-jī lâng kap in tī-hia pûn sàu-kak;

13

hiah-ê pûn sàu-kak--ê, hiah-ê chhiùⁿ-koa--ê, chı̍t-chôe tâng-siaⁿ, o-ló kám-siā Iâ-hô-hoa; ēng i ê sàu-kak, nâ-po̍ah, ga̍k-khì, tōa-siaⁿ o-ló Iâ-hô-hoa kóng, In-ūi I sī hó, I ê chû-hūi éng-éng tī-teh; hit-sî hit ê tiān, chiū-sī Iâ-hô-hoa ê tiān, ū hûn chhiong-móa;

14

tì-kàu chè-si ūi-tio̍h hûn ê iân-kò͘, bōe-ōe khiā-teh ho̍k-sāi; in-ūi Iâ-hô-hoa ê êng-kng chhiong-móa Siōng-tè ê tiān.