Lia̍t-ông hā-kòan 第 15 章 - 巴克禮全羅

1

Í-sek-lia̍t ông Iâ-lô-phò-àm jī-cha̍p-chhit nî, Iû-tāi ông A-má-siā ê kiáⁿ A-sat-lī-ngá chē-ūi.

2

I chē-ūi ê sî, cha̍p-la̍k hè; tī Iâ-lō͘-sat-léng chòe-ông kiōng gō͘-cha̍p-jī nî. I ê lāu-bú miâ kiò Iâ-khó-lī-ngá, sī Iâ-lō͘-sat-léng lâng.

3

I kiâⁿ Iâ-hô-hoa só͘ khòaⁿ-chòe hó ê sū, chiàu i ê lāu-pē A-má-siā it-chhè ê só͘-kiâⁿ.

4

chóng-sī soaⁿ-thâu-tôaⁿ iáu bô hòe--khì, peh-sìⁿ iû-gôan hiàn-chè sio-hiuⁿ tī soaⁿ-thâu-tôaⁿ.

5

Iâ-hô-hoa chiū phah ông, hō͘ i thái-ko, kàu i sí ê jı̍t, i chiū lēng-gōa chhù khiā-khí. I ê kiáⁿ Iok-thán kóan-lí ke-sū, tī-lí kok-bîn.

6

A-sat-lī-ngá kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

7

A-sat-lī-ngá kap i ê chó͘ tâng-khùn, kap i ê chó͘ chòng tī Tāi-pı̍t ê siâⁿ. I ê kiáⁿ Iok-thán sòa-chiap i chòe-ông.

8

Iû-tāi ông A-sat-lī-ngá saⁿ-cha̍p-poeh nî, Iâ-lô-phò-àm ê kiáⁿ Sat-ka-lī-ngá tī Sat-má-lī-a chòe Í-sek-lia̍t ông la̍k-ge̍h-jı̍t.

9

I kiâⁿ Iâ-hô-hoa khòaⁿ-chòe pháiⁿ ê sū, chiàu i ê lia̍t-chó͘ só͘ kiâⁿ ê, bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hōan-chōe ê.

10

Ngá-pí ê kiáⁿ Sa-liông pōe-pōan i, tī peh-sìⁿ ê bīn-chêng phah i, thâi i, chhòan i ê ūi.

11

Sat-ka-lī-ngá kî-û ê sū, lóng kì tī Í-sek-lia̍t chiah ê ông ê kì-lio̍k.

12

Che sī chêng Iâ-hô-hoa kā Iâ-hō͘ kóng ê ōe, kóng, Lí ê kiáⁿ-sun beh chē Í-sek-lia̍t ê kok-ūi kàu sì-tāi, chit ê ōe án-ni èng-giām.

13

Iû-tāi ông Ou-se-ngá saⁿ-cha̍p-káu nî, Ngá-pí ê kiáⁿ Sa-liông chē-ūi, tī Sat-má-lī-a chòe-ông chı̍t-ge̍h-jı̍t.

14

Ka-tí ê kiáⁿ Bí-ná-hiān tùi Tek-sat chiūⁿ-khì Sat-má-lī-a, phah Ngá-pí ê kiáⁿ Sa-liông tī Sat-má-lī-a, thâi-sí i, chhòan i ê ūi.

15

Sa-liông kî-û ê sū, kap i pōe-pōan ê chêng-hêng, lóng kì tī Í-sek-lia̍t chiah ê ông ê kì-lio̍k.

16

Hit-sî Bí-ná-hiān phah Thê-húi-sat, kap kìⁿ-nā tī in tiong-kan ê, kap i ê sì-kéng, tùi Tek-sat khí; in-ūi in bô kā i khui siâⁿ-mn̂g, só͘-í phah i, iā phòa-khui in tiong-kan it-chhè ū sin-īn ê hū-jîn-lâng.

17

Iû-tāi ông A-sat-lī-ngá saⁿ-cha̍p-káu nî, Ka-tí ê kiáⁿ Bí-ná-hiān chē-ūi, tī Sat-má-lī-a chòe Í-sek-lia̍t ông, kiōng cha̍p-nî.

18

I kiâⁿ Iâ-hô-hoa só͘ khòaⁿ-chòe pháiⁿ ê sū, chı̍t-sì-lâng bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hōan-chōe--ê.

19

A-su̍t ông Phó͘-le̍k lâi kong-kek chit ê thó͘-tōe. Bí-ná-hiān ēng gûn chı̍t-chheng tha-liân-tek hō͘ Phó͘-le̍k, ài i pang-chān lâi kian-kò͘ i ê kok-kôan.

20

Bí-ná-hiān tùi Í-sek-lia̍t it-chhè ê tōa hó-gia̍h lâng, kiông phài chiah ê gûn, kah ta̍k-lâng chhut gûn gō͘-cha̍p sià-khek-le̍k, sàng hō͘ A-su̍t ông. Tùi án-ni A-su̍t ông tò-khì, bô tiàm hit só͘-chāi.

21

Bí-ná-hiān kî-û ê sū, kìⁿ i só͘ kiâⁿ ê, kiám bô lóng kì tī Í-sek-lia̍t chiah ê ông ê kì-lio̍k mah?

22

Bí-ná-hiān kap i ê lia̍t-chó͘ tâng-khùn; i ê kiáⁿ Pí-ka-hat sòa-chiap i chòe-ông.

23

Iû-tāi ông A-sat-lī-ngá gō͘-cha̍p nî, Bí-ná-hiān ê kiáⁿ Pí-ka-hat tī Sat-má-lī-a chòe Í-sek-lia̍t ông, kiōng nn̄g-nî.

24

I kiâⁿ Iâ-hô-hoa só͘ khòaⁿ-chòe pháiⁿ ê sū; bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hōan-chōe--ê.

25

I ê kun-tiúⁿ, Lī-má-lī ê kiáⁿ Pí-ka pōe-pōan i, tī Sat-má-lī-a ông-kiong ê ōe-só͘ phah i; A-jíⁿ-ko-pek kap A-lī-iâ kap Ki-lia̍t ê lâng gō͘-cha̍p-ê kap i tâng-bô͘; thâi-sí i, chhòan i ê ūi.

26

Pí-ka-hat kî-û ê sū, kìⁿ i só͘ kiâⁿ ê, lóng kì tī Í-sek-lia̍t chiah ê ông ê kì-lio̍k.

27

Iû-tāi ông A-sat-lī-ngá gō͘-cha̍p-jī nî, Lī-má-lī ê kiáⁿ Pí-ka tī Sat-má-lī-a chē-ūi, chòe Í-sek-lia̍t ông, kiōng jī-cha̍p nî.

28

I kiâⁿ Iâ-hô-hoa só͘ khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hōan-chōe--ê.

29

Í-sek-lia̍t ông Pí-ka ê sî, A-su̍t ông Thê-kek-la̍h-pí-lia̍t-sek lâi chhú Í-hûn, A-pek-pek-má-ka, A-lô, Ki-te-su, Hā-só, Ki-lia̍t, Ka-lī-lī, kap Ná-hut-tha-lī chôan-tōe; lóng lia̍h in kàu A-su̍t.

30

Ou-se-ngá ê kiáⁿ Iok-thán jī-cha̍p nî, Í-la̍h ê kiáⁿ Hô-sè-a pōe-pōan Lī-má-lī ê kiáⁿ Pí-ka, phah lâi thâi-sí i, chhòan i ê ūi.

31

Pí-ka kî-û ê sū, kìⁿ i só͘ kiâⁿ ê, lóng kì tī Í-sek-lia̍t chiah ê ông ê kì-lio̍k.

32

Í-sek-lia̍t ông Lī-má-lī ê kiáⁿ Pí-ka tē-jī nî, Iû-tāi ông Ou-se-ngá ê kiáⁿ Iok-thán chē-ūi.

33

I chē-ūi ê sî, jī-cha̍p-gō͘ hè, tī Iâ-lō͘-sat-léng chòe-ông cha̍p-la̍k nî; i ê lāu-bú miâ kiò Iâ-lō͘-sa, sī Sat-tok ê cha-bó͘-kiáⁿ.

34

I kiâⁿ Iâ-hô-hoa só͘ khòaⁿ-chòe hó ê sū; chiàu i ê lāu-pē Ou-se-ngá it-chhè só͘ kiâⁿ ê khì kiâⁿ.

35

Chóng-sī soaⁿ-thâu-tôaⁿ iáu bô hòe-bô, peh-sìⁿ iû-gôan hiàn-chè sio-hiuⁿ tī soaⁿ-thâu-tôaⁿ. Iok-thán khí Iâ-hô-hoa tiān téng-bīn ê mn̂g.

36

Iok-thán kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

37

Hit-sî Iâ-hô-hoa khí-thâu chhe A-lân ông Lī-sìn kap Lī-má-lī ê kiáⁿ Pí-ka khì kong-kek Iû-tāi.

38

Iok-thán kap i ê lia̍t-chó͘ tâng-khùn, kap i ê lia̍t-chó͘ chòng tī i ê chó͘ Tāi-pı̍t ê siâⁿ. I ê kiáⁿ A-hap-su sòa-chiap i chòe-ông.