Lia̍t-ông hā-kòan 第 20 章 - 巴克禮全羅

1

Hiah ê jı̍t ê tiong-kan Hi-se-ka phòa-pīⁿ tit-beh sí. A-mô͘-su ê kiáⁿ sian-ti Í-sài-a, khì kìⁿ i, tùi i kóng, Iâ-hô-hoa án-ni kóng, Lí tio̍h siat-hoat lí ê ke-sū, in-ūi lí tit-beh sí, bōe o̍ah.

2

I chiū o̍at-tńg bīn ǹg-piah, kî-tó Iâ-hô-hoa kóng,

3

Iâ-hô-hoa ah, kiû Lí kì-liām góa tī Lí ê bīn-chêng cháiⁿ-iūⁿ chûn ôan-chôan ê sim, chiàu sêng-sı̍t lâi kiâⁿ; koh chòe Lí só͘ khòaⁿ-chòe hó--ê. Hi-se-ka chiū tōa-siaⁿ thî-khàu.

4

Í-sài-a chhut-khì, iáu-bē kàu tiong-īⁿ, Iâ-hô-hoa ê ōe chiū lîm-kàu i kóng,

5

Lí oat-tò-tńg, kā Góa ê peh-sìⁿ ê jîn-kun Hi-se-ka kóng, Lí ê chó͘ Tāi-pı̍t ê Siōng-tè Iâ-hô-hoa án-ni kóng, Góa í-keng thiaⁿ-kìⁿ lí ê kî-tó, khòaⁿ-kìⁿ lí ê ba̍k-sái; khòaⁿ ah, Góa beh i-hó lí; kàu tē-saⁿ jı̍t, lí beh chiūⁿ-khì Iâ-hô-hoa ê tiān.

6

Góa beh ke-thiⁿ lí ê hè-siū cha̍p-gō͘ nî; koh Góa beh kiù lí kap chit ê siâⁿ thoat-lī A-su̍t ông ê chhiú; Góa ūi-tio̍h ka-kī ê iân-kò͘, koh ūi-tio̍h Góa ê lô͘-po̍k Tāi-pı̍t ê iân-kò͘, beh pó-hō͘ chit ê siâⁿ.

7

Í-sài-a kóng, Tio̍h the̍h chı̍t-tè bû-hoa-kó-piáⁿ lâi; in chiū the̍h-lâi, tah tī lia̍p-á; ông chiū hó.

8

Hi-se-ka mn̄g Í-sài-a kóng, Iâ-hô-hoa beh i-hó góa, kàu tē-saⁿ jı̍t góa beh chiūⁿ-khì Iâ-hô-hoa ê tiān, ū sím-mı̍h tiāu-thâu?

9

Í-sài-a kóng, Iâ-hô-hoa beh chiâⁿ I só͘ kóng ê, che sī Iâ-hô-hoa beh hō͘ lí ê tiāu-thâu; lí beh jı̍t-iáⁿ chìn-chêng cha̍p-tō͘, á-sī thè-āu cha̍p-tō͘ ah?

10

Hi-se-ka ìn kóng, Jı̍t-iáⁿ chìn-chêng cha̍p-tō͘ sī khah-khòai; bô--lah, tio̍h jı̍t-iáⁿ thè-āu cha̍p-tō͘.

11

Sian-ti Í-sài-a kiû-kiò Iâ-hô-hoa, I chiū hō͘ A-hap-su ê jı̍t-kui chìn-chêng ê jı̍t-iáⁿ thè-āu cha̍p-tō͘.

12

Tng-sî Pa-pí-lûn ông Pa-la̍h-tàn ê kiáⁿ Pí-lô-ta̍t-pa-la̍h-tàn thiaⁿ-kìⁿ Hi-se-ka phòa-pīⁿ, chiū sàng phoe-sìn kap lé-mı̍h hō͘ Hi-se-ka.

13

Hi-se-ka thiaⁿ sù-chiá ê ōe, chiū chiong i khǹg pó-mı̍h ê chhù, kim, gûn, hiuⁿ-liāu, kùi-khì ê iû, kap i ê kun-chong-ke̍k, kap hú-khò͘-lāi it-chhè só͘-ū-ê, lóng hō͘ in khòaⁿ; i ê ke-tiong kap i chôan-kok ê lāi-bīn, Hi-se-ka bô chı̍t hāng bô hō͘ in khòaⁿ.

14

Tùi án-ni sian-ti Í-sài-a lâi kìⁿ Hi-se-ka ông, mn̄g i kóng, Chiah ê lâng kóng sím-mı̍h? in tùi toh-lo̍h lâi kìⁿ lí? Hi-se-ka kóng, In tùi hn̄g-hn̄g ê só͘-chāi, chiū-sī tùi Pa-pí-lûn lâi.

15

Í-sài-a kóng. In tī lí ê ke ū khòaⁿ-kìⁿ sím-mı̍h? Hi-se-ka ìn kóng, Hōan-nā góa ke-tiong só͘-ū-ê in lóng ū khòaⁿ-kìⁿ; góa ê châi-pó ê tiong-kan bô chı̍t-hāng bô hō͘ in khòaⁿ-kìⁿ.

16

Í-sài-a tùi Hi-se-ka kóng, Lí tio̍h thiaⁿ Iâ-hô-hoa ê ōe.

17

Khòaⁿ ah, jı̍t-chí beh kàu, hōan-nā lí ke-lāi só͘-ū-ê kap lí ê lia̍t-chó͘ chek-chū kàu hiān-kim-ê, lóng beh siū-chhiúⁿ kàu Pa-pí-lûn, bô lâu chı̍t-hāng; che sī Iâ-hô-hoa kóng ê.

18

Koh tùi lí pún-sin só͘ siⁿ ê kiáⁿ-sun, kî-tiong ū-ê beh siū lia̍h--khì, tī Pa-pí-lûn ê ông-kiong tng thài-kàm.

19

Hi-se-ka tùi Í-sài-a kóng, Lí só͘ thôan Iâ-hô-hoa ê ōe sī hó; koh kóng, Góa iáu tī-teh ê jı̍t, nā ū thài-pêng kian-kò͘, kiám m̄-sī hó?

20

Hi-se-ka kî-û ê sū, kap i ê lêng-le̍k, i cháiⁿ-iūⁿ ku̍t tî khui kau, ín chúi jı̍p siâⁿ, kiám bô lóng kì tī Iû-tāi lia̍t-ông ê kì-lio̍k mah?

21

Hi-se-ka kap i ê lia̍t-chó͘ tâng khùn. I ê kiáⁿ Má-ná-se sòa-chiap i chòe ông.