Lia̍t-ông hā-kòan 第 7 章 - 巴克禮全羅

1

Í-lī-sa kóng, Lín tio̍h thiaⁿ Iâ-hô-hoa ê ōe; Iâ-hô-hoa án-ni kóng, Bîn-á-jı̍t iok-lio̍k kàu chit-sî, tī Sat-má-lī-a ê siâⁿ-mn̂g-kháu, chı̍t sè-a ê iù-mī-hún ta̍t gûn chı̍t sià-khek-le̍k, nn̄g sè-a tōa-be̍h ta̍t gûn chı̍t sià-khek-le̍k.

2

Ū chı̍t ê kun-tiúⁿ, sī ông òa(**óa) i ê chhiú--ê, ìn Siōng-tè ê lô͘-po̍k kóng, Siat-sú Iâ-hô-hoa tùi thiⁿ khui thang-á, kiám ōe án-ni mah? Í-lī-sa kóng, Lí beh chhin-ba̍k khòaⁿ, chóng-sī chia̍h-bōe-tio̍h.

3

Tī siâⁿ-mn̂g hia ū sì ê thái-ko-ê, in saⁿ-kap kóng, Lán siáⁿ-sū chē tī-chia thèng-hāu sí ah?

4

Lán nā kóng, Jı̍p siâⁿ khì, siâⁿ-lāi ū ki-hng, lán beh sí tī-hia; nā tiāⁿ-tiāⁿ chē tī-chia, iā sī tio̍h sí. Lâi lah, lán lâi khì tâu-hâng A-lân ê kun-tūi; in nā lâu lán ê o̍ah-miā, lán chiū ōe o̍ah; nā thâi-sí lán, kun-tu iā sī sí.

5

Hông-hun ê sî, in khí-lâi, beh khì A-lân lâng ê iâⁿ; í-keng kàu A-lân lâng ê iâⁿ ê piⁿ-kak, khòaⁿ ah, bô chı̍t-lâng tī-hia.

6

In-ūi Chú hō͘ A-lân ê kun-tūi thiaⁿ-kìⁿ chhia ê siaⁿ, bé ê siaⁿ, chiū-sī tōa kun-tūi ê siaⁿ. In chiū saⁿ-kap kóng, Khòaⁿ ah, che sī Í-sek-lia̍t ông bóe-hó Hek-lâng chiah ê ông, kap Ai-kı̍p lâng chiah ê ông, lâi kong-kek lán.

7

Só͘-í tī hông-hun ê sî in khí-lâi tô-cháu, pàng-sak in ê pò͘-pîⁿ, in ê bé, in ê lû, iâⁿ-pôaⁿ chiàu-kū, cháu-khì pó sìⁿ-miā.

8

Hiah ê thái-ko-ê kàu iâⁿ ê piⁿ-kak, jı̍p chı̍t ê pò͘-pîⁿ, iā chia̍h iā lim; tùi hia the̍h kim gûn kap i-chiûⁿ khì siu-khǹg; koh lâi, koh jı̍p chı̍t ê pò͘-pîⁿ, tùi hia the̍h-chhut châi-bu̍t khì siu-khǹg.

9

Hit-sî in saⁿ-kap kóng, Lán só͘-chòe-ê m̄-hó; kin-á-jı̍t sī ū hó siau-sit ê jı̍t iā lán chēng-chēng; nā thèng-hāu kàu thiⁿ kng, lán tio̍h siū-chōe; lâi ah, lán tio̍h khì pò ông-ke chai.

10

In chiū khì kiò kò͘ siâⁿ-mn̂g ê, kā in kóng, Góan kàu A-lân lâng ê iâⁿ, khòaⁿ-kìⁿ bô chı̍t-lâng tī-hia, iā bô lâng ê siaⁿ-seh; chí-ū bé pa̍k-teh, lû pa̍k-teh, pò͘-pîⁿ lóng chiàu-kū.

11

I chiū khì kiò hiah ê kò͘-mn̂g--ê; in chiū khì pò ông-ke chai.

12

Ông thàu-mî khí-lâi, kā i ê jîn-sîn kóng, A-lân lâng tùi-tī lán só͘ chòe ê, góa kā lín kóng. In chai lán iau-gō, só͘-í chhut iâⁿ-pôaⁿ, bâi-ho̍k tī chhân-iá, kóng, In chhut-siâⁿ ê sî, lán chiū o̍ah-o̍ah lia̍h in, lâi tit-tio̍h jı̍p in ê siâⁿ.

13

I ê jîn-sîn ū chı̍t-ê ìn ông kóng, Iáu chhun ê bé, chiū-sī iáu lâu tī siâⁿ-lāi ê, kiû lí chhe lâng khan gō͘ chiah lâi, (khòaⁿ ah, bé chhin-chhiūⁿ Í-sek-lia̍t chèng-lâng só͘ lâu tī siâⁿ-lāi ê; khòaⁿ ah, bé chhin-chhiūⁿ Í-sek-lia̍t chèng-lâng siū-bia̍t-ê;) lán thang chhe lâng khì khòaⁿ i.

14

Chiū chhú nn̄g tiuⁿ chhia, kap bé, ông chhe lâng khì jip A-lân ê kun-peng, kóng, Lín khì khòaⁿ-bāi--leh.

15

In chiū tui-jip in kàu Iok-tàn, khòaⁿ-kìⁿ móa-lō͘ lóng sī A-lân lâng kín cháu ê sî só͘ hiat-ka̍k ê i-ho̍k khì-kū; sù-chiá chiū tò-lâi hê-hok ông.

16

Peh-sìⁿ chiū chhut-khì chhiúⁿ A-lân lâng ê iâⁿ-pôaⁿ; tùi án-ni chı̍t sè-a ê iù-mī-hún ta̍t gûn chı̍t sià-khek-le̍k; nn̄g sè-a tōa-be̍h iā ta̍t gûn chı̍t sià-khek-le̍k; chiàu Iâ-hô-hoa só͘ kóng ê.

17

Ông phài i só͘ òa(**óa)-chhiú hit ê kun-tiúⁿ kóan-lí siâⁿ-mn̂g; peh-sìⁿ tī siâⁿ-mn̂g thún-ta̍h i, i chiū sí, chiàu Siōng-tè ê lô͘-po̍k só͘ kóng ê, chiū-sī ông lo̍h-lâi kìⁿ i ê sî só͘ kóng ê.

18

Koh Siōng-tè ê lô͘-po̍k só͘ tùi ông kóng ê, Bîn-á-jı̍t iok-lio̍k kàu chit-sî, tī Sat-má-lī-a ê siâⁿ-mn̂g-kháu, nn̄g sè-a tōa-be̍h ta̍t gûn chı̍t sià-khek-le̍k, chı̍t sè-a ê iù-mī-hún ta̍t gûn chı̍t sià-khek-le̍k;

19

koh hit ê kun-tiúⁿ tùi Siōng-tè ê lô͘-po̍k kóng, Siat-sú Iâ-hô-hoa tùi thiⁿ khui thang-á, kiám ōe án-ni mah? Siōng-tè ê lô͘-po̍k kóng, Lí beh chhin-ba̍k khòaⁿ-kìⁿ, chóng-sī chia̍h-bōe-tio̍h;

20

chit ê ōe kó-jiân èng-giām tī i ê sin-chiūⁿ; in-ūi peh-sìⁿ tī siâⁿ-mn̂g-kháu thún-ta̍h i, i chiū sí.