Sat-bó͘-jíⁿ hā-kòan 第 16 章 - 巴克禮全羅

1

Tāi-pı̍t kè soaⁿ-téng bô jōa-hn̄g, khòaⁿ-kìⁿ Bí-hui-pho-siat ê lô͘-po̍k, Sé-pa lâi tú-tio̍h i, tòa kòa-oaⁿ ê lû nn̄g-chiah, chài piáⁿ nn̄g-pah, phû-tô-koaⁿ, chı̍t-pah pha, hē-thiⁿ ê ké-chí chı̍t pah, chiú chı̍t phê-lông.

2

Ông mn̄g Sé-pa kóng, Lí tòa chiah-ê lâi sī sím-mı̍h ì-sù? Sé-pa kóng, Lû sī beh hō͘ ông ê ke-kòan khiâ, piáⁿ kap hē-thiⁿ ê ké-chí, sī beh hō͘ siàu-liân lâng chia̍h; chiú sī beh hō͘ tī khòng-iá ià-siān ê lâng lim.

3

Ông mn̄g kóng, Lí ê chú-lâng ê kiáⁿ tī toh-lo̍h? Sé-pa ìn ông kóng, I iû-gôan tī Iâ-lō͘-sat-léng; in-ūi i kóng, Í-sek-lia̍t lâng kin-á-jı̍t beh chiong góa ê pē ê kok hêng góa.

4

Ông kā Sé-pa kóng, Bí-hui-pho-siat só͘ ū-ê lóng kui hō͘ lí. Sé-pa kóng, Góa kūi-pài; gōan tit-tio̍h un-tián tī góa ê chú góa ê ông ê bīn-chêng.

5

Tāi-pı̍t ông kàu Pa-hō͘-lîm ê sî, khòaⁿ ah, ū Sò-lô cho̍k ê ke chı̍t-lâng chhut-lâi, chiū-sī Ki-la̍h ê kiáⁿ, miâ kiò Sī-múi; i chhut-lâi, ná-kiâⁿ ná chiù-chó͘;

6

koh khioh chio̍h-thâu tìm Tāi-pı̍t kap Tāi-pı̍t ông ê jîn-sîn; hit-sî chèng peh-sìⁿ kap ióng-sū lóng tī ông ê chó-iū.

7

Sī-múi chiù-chó͘ kóng, Lí chit ê lâu lâng ê huih ê lâng ah, lí chit ê pháiⁿ-lâng ah, khì--ah, khì--ah.

8

Lí thòe Sò-lô chòe ông, taⁿ Iâ-hô-hoa ēng i ê ke ê huih lóng kui tī lí; Iâ-hô-hoa ēng chit ê kok kau tī lí ê kiáⁿ Ap-sa-liông ê chhiú; taⁿ lí tú-tio̍h ok-pò, in-ūi lí sī lâu lâng ê huih ê lâng.

9

Sé-ló͘-ngá ê kiáⁿ A-pí-su kā ông kóng, Chit chiah sí-káu, kiám thang chiù-chó͘ góa ê chú góa ê ông mah? kiû lí chún góa kè--khì, koah i ê thâu.

10

Ông kóng, Sé-ló͘-ngá chiah ê kiáⁿ ah, góa kap lín ū sím-mı̍h kan-sia̍p? chhut-chāi i chiù-chó͘, in-ūi Iâ-hô-hoa hoan-hù i kóng, Lí tio̍h chiù-chó͘ Tāi-pı̍t; án-ni chī-chūi káⁿ kóng, Lí siáⁿ-sū án-ni kiâⁿ ah?

11

Tāi-pı̍t koh kā A-pí-su, kap i ê chèng jîn-sîn kóng, Góa chhin-siⁿ ê kiáⁿ siōng-chhiáⁿ siàu-siūⁿ góa ê sìⁿ-miā, hô-hòng chit ê Piān-ngá-bín lâng ah? iông-ún i, chhut-chāi i chiù-chó͘; in-ūi che sī Iâ-hô-hoa kah i ê.

12

Kiám-chhái Iâ-hô-hoa kàm-chhat góa ê oan-óng, in-ūi i kin-á-jı̍t ê chiù-chó͘, Iâ-hô-hoa beh ēng hó pò góa.

13

Tāi-pı̍t kap tè i ê lâng kiâⁿ lō͘ khì. sī-múi kiâⁿ tī i saⁿ-tùi ê soaⁿ-phiâⁿ, ná-kiâⁿ ná chiù-chó͘, koh tìm chio̍h-thâu, iā thô͘.

14

Ông kap tè i ê chèng peh-sìⁿ chin ià-siān, kàu chı̍t só͘-chāi, chiū tī-hia hioh-khùn.

15

Ap-sa-liông kap chèng peh-sìⁿ Í-sek-lia̍t lâng, lâi kàu Iâ-lō͘-sat-léng. A-hi-to-hut iā kap i tī-hia.

16

Tāi-pı̍t ê pêng-iú, A-ki lâng Hō͘-su, lâi kàu Ap-sa-liông hia; Hō͘-su kā Ap-sa-liông kóng, Gōan ông bān-sòe, gōan ông bān-sòe.

17

Ap-sa-liông kā Hō͘-su kóng, Lí hó khóan-thāi lí ê pêng-iú sī án-ni mah? siáⁿ-sū bô kap lí ê pêng-iú saⁿ-kap khì ah?

18

Hō͘-su kā Ap-sa-liông kóng, M̄-sī án-ni, Iâ-hô-hoa kap chit ê peh-sìⁿ, kap Í-sek-lia̍t chèng-lâng, só͘ kéng ê, góa beh kui i, iā beh kap i tòa.

19

Koh chı̍t-hāng, góa tio̍h ho̍k-sāi chī-chūi ah? kiám-m̄-sī tī i ê kiáⁿ ê bīn-chêng mah? Góa cháiⁿ-iūⁿ tī lí ê lāu-pē ê bīn-chêng ho̍k-sāi, iā beh án-ni tī lí ê bīn-chêng.

20

Ap-sa-liông kā A-hi-to-hut kóng, Lín tio̍h kè-e̍k, khòaⁿ lán tio̍h cháiⁿ-iūⁿ kiâⁿ.

21

A-hi-to-hut kā Ap-sa-liông kóng, Lí ê lāu-pē só͘ lâu--teh kò͘-chhù hiah ê pìn-hui, lí tio̍h kap i khùn; chiū Í-sek-lia̍t ê chèng-lâng thiaⁿ-kìⁿ lí hō͘ lí ê lāu-pē iàm-ò͘ⁿ, kìⁿ-nā kui lí ê lâng, i ê chhiú beh giám-ngī.

22

In chiū kā Ap-sa-liông tah pò͘-pîⁿ, tī ông-kiong ê chng-pîⁿ-téng. Ap-sa-liông chiū tī Í-sek-lia̍t chèng-lâng ê bīn-chêng jı̍p--khì, kap i ê lāu-pē ê pìn-hui khùn.

23

Hit-sî A-hi-to-hut só͘ kè-e̍k ê kè-e̍k, chhin-chhiūⁿ lâng mn̄g Siōng-tè ê ōe chı̍t-iūⁿ; A-hi-to-hut tùi-tī Tāi-pı̍t á-sī tùi-tī Ap-sa-liông só͘ kè-e̍k ê, lóng sī án-ni.