Sat-bó͘-jíⁿ hā-kòan 第 19 章 - 巴克禮全羅

1

Ū lâng kā Iok-ap kóng, Khòaⁿ ah, ông ūi-tio̍h Ap-sa-liông thî-khàu pi-ai.

2

Hit-jı̍t ê tek-sèng piàn-chòe chèng peh-sìⁿ ê pi-ai; in-ūi hit-jı̍t peh-sìⁿ thiaⁿ-kìⁿ kóng, Ông ūi-tio̍h i ê kiáⁿ iu-būn.

3

Hit-jı̍t peh-sìⁿ àm-chīⁿ jı̍p siâⁿ, chhin-chhiūⁿ tī tīn--nih tô-cháu kiàn-siàu ê peh-sìⁿ àm-chīⁿ jı̍p-lâi chı̍t-iūⁿ.

4

Ông tà i ê bīn, ông tōa-siaⁿ háu, kóng, Góa ê kiáⁿ Ap-sa-liông ah, Ap-sa-liông, góa ê kiáⁿ, góa ê kiáⁿ ah.

5

Iok-ap jı̍p chhù khì kìⁿ ông kóng, Lí kin-á-jı̍t hō͘ lí it-chhè ê lô͘-po̍k bô thé-biān; in kin-á-jı̍t kiù lí ê sìⁿ-miā, kap lí ê kiáⁿ cha-bó͘-kiáⁿ ê sìⁿ-miā, lí hiah ê bó͘ ê sìⁿ-miā, lí hiah ê sòe-î ê sìⁿ-miā;

6

in-ūi òan-hūn lí ê, lí thiàⁿ i, thiàⁿ lí ê, lí òan-hūn i. Lí kin-á-jı̍t í-keng hián-bêng lí bô iàu-kín hiah ê siú-léng kap jîn-sîn; góa kin-á-jı̍t khòaⁿ-chhut, nā Ap-sa-liông o̍ah-teh, góan kin-á-jı̍t lóng sí, lí chiū hoaⁿ-hí.

7

Taⁿ lí tio̍h khí-lâi chhut-khì, an-ùi lí ê lô͘-po̍k ê sim; góa kí Iâ-hô-hoa lâi chiù-chōa, lí nā bô chhut-khì, kim-mî bô chı̍t-lâng kap lí tī-teh; che chai-ē pí lí tùi siàu-liân kàu taⁿ só͘ tú-tio̍h-ê khah-chhám.

8

Ông chiū khí-lâi, chē tī siâⁿ-mn̂g--nih; ū lâng kā chèng peh-sìⁿ kóng, Khòaⁿ ah, ông chē tī siâⁿ-mn̂g--nih; peh-sìⁿ chiū lóng kàu ông ê bīn-chêng. Í-sek-lia̍t lâng í-keng tô-cháu, ta̍k-lâng tò-khì i ê pò͘-pîⁿ.

9

Í-sek-lia̍t chèng chi-phài ê lâng hun-hun gī-lūn, kóng, Ông bat kiù lán thoat-lī tùi-te̍k ê chhiú, koh kiù lán thoat-lī Hui-lī-sū lâng ê chhiú; taⁿ i siám-pī Ap-sa-liông cháu tī gōa-bīn.

10

Lán ēng iû boah Ap-sa-liông tī-lí lán, i í-keng tīn-bông. Lín taⁿ siáⁿ-sū m̄ chhut chı̍t-kù, chhiáⁿ ông tò-lâi ah?

11

Tāi-pı̍t ông chhe lâng khì kìⁿ chè-si Sat-tok kap A-pí-a-tha, kóng, Lín tio̍h kā Iû-tāi ê tióng-ló kóng, Í-sek-lia̍t chèng-lâng í-keng ū ōe kàu tī ông, chhiáⁿ ông tò-lâi i ê chhù; lín chhiáⁿ ông tò-lâi, siáⁿ-sū chòe lâng ê lō͘-bé ah?

12

Lín sī góa ê hiaⁿ-tī, sī góa ê kut-jio̍k; chhiáⁿ ông tò-lâi siáⁿ-sū chòe lâng ê lô͘-bé ah?

13

Iā kā A-má-sat kóng, Lí kiám m̄-sī góa ê kut-jio̍k mah? Góa nā bô siat-lı̍p lí thòe Iok-ap tn̂g-tn̂g tī góa ê bīn-chêng chòe kun-tiúⁿ, gōan Siōng-tè ka-pē chek-ho̍at góa.

14

Tùi án-ni, i chiū kám-kek Iû-tāi chèng-lâng ê sim, chhin-chhiūⁿ chı̍t-lâng ê sim; in chiū chhe lâng khì kìⁿ ông kóng, Gōan lí kap lí ê chèng jîn-sîn tò-lâi.

15

Ông chiū tò-lâi, kàu Iok-tàn; Iû-tāi lâng lâi kàu Kiat-kah, beh ngiâ-chih ông, chhōa ông kè Iok-tàn.

16

Pa-hō͘-lîm ê Piān-ngá-bín lâng, Ki-la̍h ê kiáⁿ Sī-múi kóaⁿ-kín kap Iû-tāi lâng lo̍h--lâi ngiâ-chih Tāi-pı̍t ông.

17

Kap i lâi ê, ū chı̍t-chheng ê Piān-ngá-bín lâng, iā ū Sò-lô ke ê lô͘-po̍k Sé-pa, kap i cha̍p-gō͘ ê kiáⁿ, jī-cha̍p ê lô͘-po̍k, in lóng tī ông ê bīn-chêng kè Iok-tàn.

18

U tō͘-chûn kè--khì, chài ông ê ke-kòan, chhut-chāi ông ēng. Ông kè Iok-tàn ê sî, Ki-la̍h ê kiáⁿ Sī-múi chiū phak tī ông ê bīn-chêng;

19

kā ông kóng, Góa ê chú góa ê ông chhut Iâ-lō͘-sat-léng ê jı̍t, lí ê lô͘-po̍k kiâⁿ pōe-ge̍k ê sū; taⁿ kiû góa ê chú bo̍h-tit chek-chōe góa, bo̍h-tit kì-tit, ông iā bo̍h-tit hē tī sim--nih.

20

Lí ê lô͘-po̍k bêng-bêng chai ka-kī ū chōe, só͘-í Iok-sek chôan-ke kin-á-jı̍t góa tē-it tāi-seng lo̍h-lâi ngiâ-chih góa ê chú góa ê ông.

21

Sé-ló͘-ngá ê kiáⁿ A-pí-su kóng, Sī-múi bat chiù-chó͘ Iâ-hô-hoa só͘ boah-iû--ê, kiám m̄-tio̍h in-ūi án-ni hō͘ i sí mah?

22

Tāi-pı̍t kóng, Sé-ló͘-ngá ê kiáⁿ ah, góa kap lín sím-mı̍h kan-sia̍p, hō͘ lín kin-á-jı̍t hóan-tùi góa ah? kin-á-jı̍t Í-sek-lia̍t tiong kiám thang hō͘ lâng sí mah? góa kiám m̄-chai góa kin-á-jı̍t chòe Í-sek-lia̍t ông mah?

23

Tùi án-ni ông kā Sī-múi kóng, Lí m̄-bián sí; ông chiū tùi i chiù-chōa.

24

Sò-lô ê sun, Bí-hui-pho-siat iā lo̍h-khì ngiâ-chih ông; i tùi ông khì ê jı̍t kàu ông pêng-an tò-lâi ê jı̍t, i bô siu-chéng kha, iā bô siu-chéng chhùi-chhiu, iā bô sóe-saⁿ.

25

I tī Iâ-lō͘-sat-léng ngiâ-chih ông ê sî, ông kā i kóng, Bí-hui-pho-siat, lí siáⁿ-sū bô kap góa lo̍h--khì?

26

I ìn kóng, Góa ê chú góa ê ông ah, tng-sî lí ê lô͘-po̍k siūⁿ kóng, góa beh pī-pān lû, khiâ i kap ông saⁿ-kap khì; in-ūi lí ê lô͘-po̍k sī pái-kha; chóng-sī góa ê lô͘-po̍k phiàn góa;

27

koh tī góa ê chú góa ê ông ê bīn-chêng húi-pòng lí ê lô͘-po̍k; to̍k-to̍k góa ê chú góa ê ông chhin-chhiūⁿ Siōng-tè ê sù-chiá, chiàu lí só͘ khòaⁿ-chòe hó-ê kiâⁿ i.

28

In-ūi góa ê chó͘ chôan-ke, tī góa ê chú góa ê ông ê bīn-chêng, lóng sī tio̍h sí ê lâng; chóng-sī lí hō͘ lí ê lô͘-po̍k kap lí chı̍t-toh ê lâng saⁿ-kap chia̍h, góa iáu ū sím-mı̍h lí-iû thang koh tùi ông kiû-kiò ah?

29

Ông tùi i kóng, Lí siáⁿ-sū koh kóng lí ê tāi-chì ah? Góa kóng, Lí kap Sé-pa tio̍h pîⁿ-pun hiah ê gia̍p-sán.

30

Bí-hui-pho-siat kā ông kóng, Góa ê chú góa ê ông í-keng pêng-an tò-lâi kiong-lāi, kù-chāi i lóng the̍h--khì, iā thang.

31

Ki-lia̍t lâng Pa-se-lâi tùi Lô-ki-lîm lo̍h-lâi, beh sàng ông kè Iok-tàn, chiū kap ông kè Iok-tàn.

32

Pa-se-lâi chin-lāu, í-keng poeh-cha̍p hè; ông tòa tī Má-hap-liām ê sî, i ēng chia̍h-mı̍h kiong-kip ông; in-ūi i sī tōa hó-gia̍h lâng.

33

Ông kā Pa-se-lâi kóng, Lí kap góa kè--khì, kap góa tòa Iâ-lō͘-sat-léng, góa beh kiong-kip lí.

34

Pa-se-lâi kā ông kóng, Góa ê sìⁿ-miā iáu ū kúi nî, kúi jı̍t, hō͘ góa kap ông saⁿ-kap chiūⁿ Iâ-lō͘-sat-léng ah?

35

Góa hiān-kim í-keng poeh-cha̍p hè lah, iáu ōe hun-piat hó-pháiⁿ mah? Lí ê lô͘-po̍k iáu ōe chhì lim-chia̍h ê chu-bī mah? chhiùⁿ-koa ê lâm-lú góa ōe hiáu thiaⁿ i ê siaⁿ-im mah? Lô͘-po̍k siáⁿ-sū thoa-lūi góa ê chú góa ê ông ah?

36

Lí ê lô͘-po̍k chí-ū sī beh kap ông kè Iok-tàn chı̍t-chām-á; ông siáⁿ-sū tio̍h ēng chit ê pò-siúⁿ pò-siúⁿ góa ah?

37

Kiû lí chún lí ê lô͘-po̍k tò-khì, hō͘ góa thang sí tī góa ê pún siâⁿ, góa ê pē-bú ê bōng hia. Khòaⁿ ah, lí ê lô͘-po̍k Kim-hán tī-chia; hō͘ i kap góa ê chú góa ê ông kè-khì; chiàu lí só͘ khòaⁿ-chòe hó-ê khóan-thāi i.

38

Ông kóng, Kim-hán thang kap góa khì; góa beh chiàu lí só͘ khòaⁿ-chòe hó-ê lâi khóan-thāi i; lí kìⁿ-ū tùi góa kiû--ê, góa beh kā lí chiâⁿ.

39

Tùi án-ni chèng peh-sìⁿ kè Iok-tàn, ông iā kè--khì; ông chiū kap Pa-se-lâi chim-chhùi, kā i chiok-hok; i chiū tò-khì i pún só͘-chāi.

40

Tùi án-ni ông kè-khì, kàu Kiat-kah; Kim-hán iā kap i kè-khì; Iû-tāi chèng peh-sìⁿ, kap Í-sek-lia̍t peh-sìⁿ ê chı̍t-pòaⁿ, iā lóng sàng ông kè-khì.

41

Í-sek-lia̍t chèng-lâng lâi kìⁿ ông, kā i kóng, Góan ê hiaⁿ-tī Iû-tāi lâng siáⁿ-sū thau lí khì, lâi chhōa ông kap i ê ke-kòan, kap kun-tè Tāi-pı̍t ê lâng, lóng saⁿ-kap kè Iok-tàn?

42

Iû-tāi chèng-lâng ìn Í-sek-lia̍t lâng, kóng, In-ūi ông kap góan sī tâng-chong, lín siáⁿ-sū in-ūi chit ê sū siū-khì ah? Góan bat chia̍h-tio̍h ông sím-mı̍h ah? ông bat ēng sím-mı̍h sàng góan mah?

43

Í-sek-lia̍t lâng ìn Iû-tāi lâng kóng, Chiàu chi-phài, chit ê ông góan ū cha̍p-hūn, góan tùi-tī Tāi-pı̍t pí lín khah ū koan-hē; lín siáⁿ-sū khòaⁿ-khin góan, chhōa góan ê ông tò-lâi, bô tāi-seng kap góan chham-siông ah? To̍k-to̍k Iû-tāi lâng ê ōe, pí Í-sek-lia̍t lâng ê ōe, khah-ngī.