Sù-tô͘ Hēng-tōan 第 2 章 - 巴克禮全羅

1

Gō͘-sûn-choeh ê kî í-keng kàu, in lóng chū-chı̍p tī chı̍t só͘-chāi.

2

Hut-jiân tùi thiⁿ ū siaⁿ, chhin-chhiūⁿ tōa hong teh chhe, chhiong-móa in só͘ chē kui-keng ê chhù.

3

Chiū ū teh hun-khui ê chı̍h, chhut-hiān hō͘ in khòaⁿ-kìⁿ, chhin-chhiūⁿ hé ê chı̍h, hioh tī ta̍k lâng ê téng-bīn.

4

In lóng siū Sèng Sîn chhiong-móa, chiah khui chhùi kóng pa̍t iūⁿ ê khiuⁿ-kháu, sī chiàu Sèng Sîn só͘ siúⁿ-sù in kóng ê.

5

Hit sî ū khiân-sêng ê Iû-thài lâng, tùi thiⁿ-ē ta̍k kok lâi ê, tòa tī Iâ-lō͘-sat-léng.

6

Chit ê siaⁿ chı̍t ē khí, chèng lâng chū-chı̍p hun-hun lōan-lōan, in-ūi ta̍k lâng thiaⁿ-kìⁿ in chiàu i ka-kī ê thó͘-khiuⁿ lâi kóng.

7

Chiū lóng gông-ngia̍h kî-kòai, kóng, Lí khòaⁿ, chiah ê teh kóng ê kiám bô it-khài sī Ka-lī-lī lâng mah?

8

Cháiⁿ-iūⁿ lán thiaⁿ in kóng chiàu lán ta̍k lâng só͘ chhut-sì ê thó͘-khiuⁿ ah?

9

Lán chiah ê Phàⁿ-thê-a lâng, Bí-thài lâng, Í-lân lâng, kap tiàm-tī Bí-só͘-pho-tāi-bí, Iû-thài kap Ka-phàⁿ-to-ka, Pún-to͘ kap A-se-a,

10

Hut-lū-ka kap Pông-hui-lī-a, Ai-kı̍p kūn-óa Kó͘-lī-nāi ê Lū-pí-a, chiah ê tōe-hng ê lâng, í-kı̍p tùi Lô-má lâi ê chhut-gōa lâng, ū-ê sī Iû-thài lâng, ū-ê sī jı̍p Iû-thài kàu ê lâng,

11

Kek-lí-tí lâng, A-lat-pek lâng, lóng thiaⁿ in ēng lán ê khiuⁿ-kháu lâi kóng Siōng-tè ê tōa sū.

12

Chiū lóng gông-ngia̍h tiû-tû, saⁿ-kap kóng, Che sím-mı̍h ì-sù?

13

Ia̍h ū pa̍t lâng thí-chhiò in kóng, In sī lim sin chiú teh chùi.

14

Chóng-sī Pí-tek kap cha̍p-it ê sù-tô͘ khiā-teh, tōa siaⁿ kā in kóng, Iû-thài lâng, kap lóng-chóng khiā-khí tī Iâ-lō͘-sat-léng ê peh-sìⁿ ah, lín tio̍h chai chit-ê, ia̍h tio̍h tì-ì thiaⁿ góa ê ōe.

15

Chiah ê lâng m̄ sī chiú-chùi, chhin-chhiūⁿ lín só͘ phah-sǹg; in-ūi chit tia̍p tú-chiah téng-po͘ káu tiám cheng:

16

che chiū-sī thok sian-ti Iok-jíⁿ só͘ kóng ê, kóng,

17

Siōng-tè kóng, Tī lō͘-bé ê sî-jı̍t, Góa beh ēng góa ê Sîn kàng-lo̍h tī hōan ū jio̍k-thé ê; Lín ê hāu-siⁿ lín ê cha-bó͘-kiáⁿ beh chòe sian-ti kóng ōe, Lín ê siàu-liân lâng beh khòaⁿ-kìⁿ īⁿ-siōng, Lín ê lāu-lâng beh tit-tio̍h bîn-bāng;

18

Tī hiah ê jı̍t góa iā beh ēng góa ê Sîn Kàng-lo̍h tī góa ê lô͘-po̍k lú-pī; in ia̍h beh chòe sian-ti lâi kóng.

19

Téng-bīn tī thiⁿ-nı̍h góa beh hián-chhut kî-sū, Ē-bīn tī tōe-nı̍h góa beh hián-chhut sîn-jiah, Chiū-sī huih, kap hé, kap ian-bū;

20

Jı̍t beh pìⁿ chòe àm, Ge̍h beh pìⁿ chòe huih, Tī Chú tōa koh êng-hián ê jı̍t, Bē kàu ê tāi-seng;

21

Koh hōan-nā kiû-kiò Chú ê miâ ê, ōe tit-tio̍h kiù.

22

Í-sek-lia̍t lâng ah, tio̍h thiaⁿ góa ê ōe: Ná-sat-le̍k lâng Iâ-so͘, Siōng-tè bat ēng I tī lín tiong-kan kiâⁿ koh-iūⁿ ê kôan-lêng, kî-sū, kap sîn-jiah, lâi tùi lín chèng-bêng I, che chiū-sī lín só͘ chai ê;

23

I chiàu Siōng-tè tiāⁿ-tio̍h ê chí-ì kap tāi-seng chai ê, í-keng siū ké-sàng, lín chiah-ê chioh put-hoat ê lâng ê chhiú tèng sı̍p-jī-kè hāi-sí I;

24

chóng-sī Siōng-tè tháu-pàng hiah ê sí ê khó͘-thàng, hō͘ I koh-o̍ah; sī I bōe-ōe hō͘ sí só͘ pé-pa̍k.

25

In-ūi Tāi-pı̍t ū chí I kóng, Góa khòaⁿ Chú siông-siông tī góa ê bīn-chêng; I tiàm tī góa ê chiàⁿ pêng, hō͘ góa bián iô-tāng;

26

Só͘-í góa ê sim hoaⁿ-hí, góa ê chı̍h khòai-lo̍k; Koh góa ê jio̍k-thé iā beh tiàm tī ǹg-bāng tiong;

27

In-ūi lí bô beh chiong góa ê lêng-hûn pàng-hē tī im-kan, Iā bô beh hō͘ lí ê Sèng-ê tú-tio̍h hiú-nōa.

28

Lí bat ēng o̍ah-miā ê lō͘ chí-sī góa; Beh hō͘ góa tī lí ê bīn-chêng móa-sim khòai-lo̍k.

29

Hiaⁿ-tī ah, sian-chó͘ Tāi-pı̍t ê sū góa thang hó-táⁿ tùi lín kóng, i í-keng sí koh bâi-chòng, i ê bōng kàu kin-á-jı̍t iáu tī lán tiong-kan.

30

I kì-jiân sī sian-ti, koh chai Siōng-tè bat kap i chiù-chōa, beh tī i hō͘-è tiong siat-lı̍p chı̍t lâng chē i ê chō-ūi.

31

I tāi-seng khòaⁿ-chhut án-ni, chiū lūn Ki-tok ê koh-o̍ah kóng, I bô pàng-hē tī im-kan, ia̍h I ê jio̍k-thé bô tú-tio̍h hiú-nōa.

32

Chit ê Iâ-so͘, Siōng-tè í-keng hō͘ I koh-o̍ah, góan chiah-ê lóng chòe I ê kan-chèng.

33

I kì-jiân hō͘ Siōng-tè ê chiàⁿ chhiú kú I kôaiⁿ-kôaiⁿ, koh tùi Pē siū só͘ èng-ún ê Sèng Sîn, chiū chiong chit ê kàng-lo̍h, chiū-sī lín só͘ khòaⁿ-kìⁿ, só͘ thiaⁿ-kìⁿ ê.

34

In-ūi Tāi-pı̍t bē bat chiūⁿ thiⁿ; to̍k-to̍k ka-kī kóng, Chú kā góa ê Chú kóng, Lí chē góa ê tōa pêng,

35

Thèng-hāu góa hō͘ lí ê tùi-te̍k chòe lí ê kha-ta̍h-í.

36

Án-ni Í-sek-lia̍t chôan-ke tio̍h khak-sı̍t chai, chit ê Iâ-so͘, Siōng-tè í-keng siat-lı̍p I chòe Chú, chòe Ki-tok, chiū-sī lín só͘ tèng tī sı̍p-jī-kè ê.

37

Chèng lâng thiaⁿ-liáu, sim-lāi chhì-chha̍k, tùi Pí-tek kap kî-û ê sù-tô͘ kóng, Hiaⁿ-tī ah, góan tio̍h cháiⁿ-iūⁿ chòe?

38

Pí-tek kā in kóng, Lín tio̍h hóan-hóe, ta̍k lâng tī Iâ-so͘ Ki-tok ê miâ siū sóe-lé, kàu hō͘ lín ê chōe sià-bián; koh beh siū Sèng Sîn ê siúⁿ-sù.

39

In-ūi só͘ èng-ún ê kui tī lín, kap lín ê kiáⁿ-sun, í-kı̍p lóng-chóng hn̄g-hn̄g ê lâng, chiū-sī kìⁿ-nā Chú, lán ê Siōng-tè, só͘ beh tiàu ê.

40

Koh lēng-gōa ēng chōe-chōe ōe kan-chèng, lâi khó͘-khǹg in, kóng, Lín tio̍h kiù ka-kī thoat-lī chit ê siâ ê sè-tāi.

41

Tùi án-ni chiap-la̍p in ê ōe ê lâng lóng siū sóe-lé; hit jı̍t iok-lio̍k ke-thiⁿ saⁿ chheng lâng.

42

Siông-siông choan-bū sù-tô͘ ê kà-sī, saⁿ-kap kau-pôe, peh-piáⁿ, kî-tó.

43

Chèng lâng lóng kiaⁿ-hiâⁿ; sù-tô͘ koh kiâⁿ chōe-chōe kî-sū sîn-jiah.

44

Sìn ê lâng lóng chū-chı̍p tī chı̍t só͘-chāi, só͘ ū ê mı̍h kong-ke ēng;

45

koh bōe bu̍t-sán ke-gia̍p, chiàu ta̍k lâng só͘ khiàm-ēng pun hō͘ in.

46

Jı̍t-jı̍t tâng-sim choan-bū tī tiān-lāi, iā tī jîn-ke peh piáⁿ, ēng hoaⁿ-hí sêng-sı̍t ê sim lâi chia̍h, o-ló Siōng-tè,

47

ia̍h tit-tio̍h chèng peh-sìⁿ hoaⁿ-hí in. Chú chiong tit kiù ê lâng jı̍t-jı̍t ke-thiⁿ hō͘ in.