Sù-tô͘ Hēng-tōan 第 24 章 - 巴克禮全羅

1

Gō͘ jı̍t āu chè-si-thâu A-ná-nî-a kap kúi-nā ê tiúⁿ-ló, kap chit ê piān-hō͘-sū Thiap-thó͘-lô, lo̍h-lâi; tùi chóng-tok kò Pó-lô.

2

Pó-lô siū tiàu, Thiap-thó͘-lô chiū kò i, kóng,

3

Hui-le̍k-sū tāi-jîn, góan tùi lí tit-tio̍h thài-pêng, koh tùi lí ê sian-kiàn, chit kok ê pē-pēng tit-tio̍h kái-chèng, ta̍k sî ta̍k só͘-chāi, góan sêng-siū i, lâi kám-siā bô soah.

4

Taⁿ m̄ káⁿ chhiân lí siuⁿ kú, kiû lí khoan-iông thiaⁿ góan kúi kù ōe.

5

In-ūi ū chhâ-chhut chit lâng chhin-chhiūⁿ un-e̍k, tī thiⁿ-ē siⁿ-khí jiáu-lōan, chòe Ná-sat-le̍k tóng ê thâu-ba̍k,

6

liân sèng-tiān i ia̍h beh phah lâ-sâm;

7

8

góan chiū lia̍h i; lí ka-kī sím-mn̄g i, chiū góan só͘ kò i ta̍k hāng ê in-toaⁿ, ōe khak-sı̍t chai.

9

Iû-thài lâng tâng siaⁿ kò i kóng, tāi-chì sı̍t-chāi sī án-ni.

10

Chóng-tok tìm thâu, kah Pó-lô kóng; i chiū ìn kóng, Góa chai lí chòe chit pang kok ê sím-phòaⁿ si chōe-chōe nî, só͘-í hoaⁿ-hí hun-sò͘ ka-kī ê tāi-chì;

11

lí ōe chai, góa chiūⁿ Iâ-lō͘-sat-léng kèng-pài kàu taⁿ put-kò cha̍p-jī jı̍t;

12

in bē bat tú-tio̍h góa tī tiān-lāi kap lâng piān-lūn, á-sī jiáu-tōng chèng lâng, chiū tī hōe-tn̂g ia̍h bô, siâⁿ-lāi ia̍h bô.

13

Koh hiān-chāi só͘ kò góa ê sū, in lóng bōe-ōe tùi lí hián-chhut chèng-kù.

14

To̍k-to̍k chı̍t hāng góa tùi lí jīn, chiū-sī in só͘ kiò chòe kiat-tóng ê Lō͘, góa chiàu án-ni lâi ho̍k-sāi lia̍t-chó͘ ê Siōng-tè, koh sìn lóng-chóng ha̍p tī lu̍t-hoat ê í-kı̍p kì-chài tī sian-ti ê chheh ê;

15

koh tùi Siōng-tè ū ǹg-bāng, chiū-sī bô lūn gī lâng kap put-gī ê lâng beh lóng koh-o̍ah, che ia̍h sī in ka-kī só͘ teh him-bō͘ ê.

16

Góa tī chit-ê ka-kī liān-sı̍p, chiū-sī tùi Siōng-tè, tùi lâng, siông-siông chûn bô khui-hū ê liông-sim.

17

Taⁿ kè kúi-nā nî, góa tò-lâi sī beh chín-chè pún kok, kap hiàn lé-mı̍h;

18

teh hiàn ê sî, in tú-tio̍h góa tī tiān-nı̍h í-keng chheng-khì, pēng bô kiat kui-kûn iā bô hán-hōa; chí-ū kúi ê Iû-thài lâng tùi A-se-a lâi ê,

19

in nā ū thang chek-chōe góa, chiū eng-kai lâi tī lí ê bīn-chêng kò góa.

20

Á-sī tī chia ê lâng, nā khòaⁿ-kìⁿ góa khiā tī kong-hōe ê bīn-chêng, ū sím-mı̍h put-gī, in ia̍h tio̍h ka-kī kóng;

21

siat-sú ū, ia̍h put-kò chí chı̍t kù nā-tiāⁿ, chiū-sī góa khiā tī in tiong-kan, kiò kóng, Ūi-tio̍h sí-lâng koh-o̍ah ê sū, góa kin-á-jı̍t tī lín ê bīn-chêng siū sím-phòaⁿ.

22

Hui-le̍k-sū pún siông-sè chai koan-sia̍p chit ê Lō͘ ê sū, chiū iân-chhiân in, kóng, Chhian-chóng Lū-se-a lo̍h-lâi ê sî, góa chiū beh sím-tòan lín ê tāi-chì.

23

Tùi án-ni bēng-lēng pé-chóng kò͘-siú Pó-lô, ia̍h pàng-khoan i; i ê lâng nā lâi kiong-kip i, lóng bo̍h-tit chó͘-tòng.

24

Kè kúi-nā jı̍t, Hui-le̍k-sū kap i ê bó͘, Thó͘-se-lah, sī Iû-thài lâng, saⁿ-kap lâi, chiū tiàu Pó-lô, ài thiaⁿ i lūn sìn Ki-tok Iâ-so͘ ê tō-lí.

25

Pó-lô gī-lūn kong-gī, cheng-chiat, kap chiong-lâi ê sím-phòaⁿ, Hui-le̍k-sū put-chí kiaⁿ, ìn kóng, Taⁿ chhiáⁿ thè-khì; ū lī-piān ê sî, chiah tiàu lí.

26

I ia̍h ǹg-bāng Pó-lô beh gûn hō͘ i; só͘-í ta̍uh-ta̍uh tiàu i lâi, kap i tâm-lūn.

27

Kè nn̄g nî, Pho-kiû Hui-sū-to͘ chiap Hui-le̍k-sū ê jīm; Hui-le̍k-sū ài chhú Iû-thài lâng hoaⁿ-hí, chiū lâu Pó-lô iû-gôan pa̍k-teh.