A-mô-sū 第 6 章 - 巴克禮全羅

1

Tī Sek-an bô khòa-lū--ê, tī Sat-má-lī-a soaⁿ lia̍h-chòe ún-tàng--ê, tī bān-kok-tiong chòe tē-it kok ê siú-léng, chiū-sī Í-sek-lia̍t-ke só͘ kui-óa--ê, ū chai-ē ah.

2

Lín tio̍h khì Kah-nî lâi khòaⁿ, tùi hia khì kàu tōa-siâⁿ Hap-má; koh lo̍h-khì Hui-lī-sū ê Ka-te̍k; in kiám ū khah-iâⁿ chiah ê kok mah? in ê kéng-kài pí lín ê kéng-kài khah khoah mah?

3

lín ka-kī lia̍h-chòe kàng chai-ē ê jı̍t iáu-kú hn̄g, hō͘ pō-gio̍k ê chō-ūi kūn-óa.

4

Lín tó tī chhiūⁿ-gê ê bîn-chhn̂g, the tī khòng-chhn̂g, chia̍h iûⁿ-kûn-tiong ê iûⁿ-á, kap tiâu-lāi ê gû-á,

5

tôaⁿ-khîm tôaⁿ-sek, chhiùⁿ la-êng ê koa-khek, ūi ka-kī chòe ga̍k-khì, chhin-chhiūⁿ Tāi-pı̍t.

6

Ēng óaⁿ lim-chiú, ēng siōng-hó ê iû ka-kī boah; chóng-sī bô ūi Iok-sek ê pāi-hōai tam-iu.

7

Só͘-í in beh tī siū-lia̍h ê lâng ê tiong-kan tāi-seng siū-lia̍h; the tī khòng-chhn̂g ê lâng in ê iàn-lo̍k beh bô--khì.

8

Bān-kun ê Siōng-tè Iâ-hô-hoa kóng, Chú Iâ-hô-hoa kí ka-kī lâi chiù-chōa kóng, Góa iàm-chiān Ngá-kok ê êng-hôa, òan-hūn i ê kiong-tiān; in-ūi án-ni Góa beh chiong siâⁿ, kap kî-tiong só͘-ū--ê, lóng kau-hù tùi-te̍k.

9

Hit-sî nā chhun cha̍p-lâng tī chı̍t keng chhù, ia̍h lóng beh sí;

10

sí-lâng ê kai-chhin, chiū-sī sio i ê sin-si--ê, kā i hû--khí lâi, beh tòa i ê si-hâi chhut chhù-gōa, chiū mn̄g lāi-pâng ê lâng, kóng, Lí hia iáu ū lâng bô? i ìn kóng, Bô; i chiū kóng, M̄-thang chhut-siaⁿ; in-ūi lán m̄-thang kóng-khí Iâ-hô-hoa ê miâ.

11

Khòaⁿ ah, Iâ-hô-hoa chhut bēng-lēng, phah tōa-keng chhù hō͘ i chhùi-chhùi, phah sòe-keng chhù hō͘ i lı̍h-lı̍h--khui.

12

Bé kiám ōe pháu tī chio̍h-pôaⁿ-téng mah? Lâng kiám ōe ēng gû lôe tī-hia mah? Lín kéng-jiân hō͘ kong-pêng piàn-chòe khó͘-táⁿ, hō͘ kong-gī ê ké-chí piàn-chòe in-tîn.

13

Lín hoaⁿ-hí hu-ké ê sū, iā kóng, Góan kiám-m̄-sī ēng ka-kī ê khùi-la̍t chhú nn̄g-ki kak mah?

14

Iâ-hô-hoa bān-kun ê Siōng-tè kóng, Khòaⁿ ah, Í-sek-lia̍t-ke, Góa beh heng-khí chı̍t-kok kong-kek lín; in beh khó͘-chhó͘ lín, tùi jı̍p Hap-má ê lō͘ kàu A-la̍h-pa ê khoe.