A-mô-sū 第 8 章 - 巴克禮全羅

1

Chú Iâ-hô-hoa hō͘ góa khòaⁿ-kìⁿ chı̍t-hāng; góa khòaⁿ-kìⁿ chı̍t-kheng hē-thiⁿ ê ké-chí.

2

I kóng, A-mô͘-sū ah, lí khòaⁿ-kìⁿ sím-mı̍h? góa kóng, Khòaⁿ-kìⁿ chı̍t-kheng hē-thiⁿ ê ké-chí. Iâ-hô-hoa chiū tùi góa kóng, Góa ê peh-sìⁿ Í-sek-lia̍t ê bo̍at-kî kàu--lah; Góa tek-khak bô koh khoan-sù in.

3

Chú Iâ-hô-hoa kóng, Hit-jı̍t kiong-tiān ê chhiùⁿ-koa beh piàn-chòe thî-khàu; beh ū chōe-chōe sin-si tī ta̍k só͘-chāi hiat-ka̍k, lâng lóng chēng-chēng.

4

Lín chiah-ê ài thun-chia̍h sòng-hiong lâng, hō͘ chit só͘-chāi ê khùn-khó͘ lâng soe-pāi--ê, tio̍h thiaⁿ chit ê ōe.

5

Lín kóng, Ge̍h ê chhoe-it sím-mı̍h sî kè-khì, hō͘ góan thang thiò gō͘-kak? an-hioh-jı̍t sím-mı̍h sî kè-khì, hō͘ góan thang bōe be̍h, ēng sòe ê i-hoat, ēng tāng ê sià-khek-le̍k, ēng khúi-chà ê thian-pêng lâi phiàn lâng;

6

thang ēng gûn bóe sòng-hiong lâng, ēng chı̍t-siang ôe ōaⁿ kêng-chhiah ê lâng, chiong pháiⁿ ê be̍h bōe hō͘ lâng?

7

Iâ-hô-hoa kí Ngá-kok ê êng-hôa lâi chiù-chōa kóng, In lóng-chóng ê só͘-chòe, Góa éng-óan bô bōe-kì-tit.

8

Chit ê tōe kiám bô beh in-ūi án-ni lâi iô-choah, khiā-khí hit tiong-kan--ê, kiám bô beh pi-ai mah? Chit ê tōe beh chhin-chhiūⁿ Tōa-hô tiòng--khí-lâi; iā beh tín-tāng, thè-kē chhin-chhiūⁿ Ai-kı̍p hô.

9

Chú Iâ-hô-hoa kóng, Kàu hit-jı̍t, Góa beh hō͘ jı̍t-thâu tī jı̍t-tiong-tàu chiū lo̍h--khì, hō͘ tōe tī tng-thâu-pe̍h-jı̍t piàn o͘-àm.

10

Góa beh hō͘ lín ê choeh-kî piàn-chòe pi-ai, koa-khek lóng piàn-chòe ai-ko, beh hō͘ chèng-lâng io hâ môa-pò͘, thâu-khak bô pòaⁿ ki mn̂g; koh hō͘ i pi-ai chhin-chhiūⁿ sí ko͘-siⁿ ê kiáⁿ, kàu-bé chhin-chhiūⁿ thòng-khó͘ ê jı̍t chı̍t-iūⁿ.

11

Chú Iâ-hô-hoa kóng, Khòaⁿ ah, jı̍t-chí beh kàu, Góa beh hō͘ ki-hng kàu tī chit só͘-chāi, ki-hng m̄-sī in-ūi bô piáⁿ, chhùi-ta m̄-sī ūi-tio̍h bô chúi, chiū-sī in-ūi bô thang thiaⁿ Iâ-hô-hoa ê ōe.

12

In beh sì-kòe khì, tùi chit ê hái kàu hit ê hái, tùi pak kàu tang; cháu-lâi cháu-khì, chhē-kiû Iâ-hô-hoa ê ōe, ia̍h chhē-bô.

13

Tng hit-jı̍t, súi ê chāi-sek-lú kap siàu-liân ê ta-po͘-lâng beh in-ūi chhùi-ta lâi hūn-khì.

14

Hiah ê kí Sat-má-lī-a ê chōe lâi chiù-chōa, koh kí Tàn o̍ah ê Siōng-tè lâi chiù-chōa; koh kí Pia̍t-sī-pa ê o̍ah-lō͘ lâi chiù-chōa--ê, in tek-khak po̍ah-tó, éng bōe koh khí--lâi.