Ko-lô-se 第 4 章 - 巴克禮全羅

1

Chòe chú-lâng ê, lín tio̍h ēng gī kap kong-pêng khóan-thāi lín ê lô͘-po̍k, in-ūi chai lín iā ū Chú tī thiⁿ-nı̍h.

2

. Tio̍h siông-siông choan-bū kî-tó; kî-tó ê sî tio̍h kéng-séng lâi kám-siā,

3

. koh thòe góan kî-tó, kiû Siōng-tè kā góan khui thôan tō-lí ê mn̂g, thang kóng Ki-tok ê ò-biāu, góa ūi-tio̍h chit-ê iā siū pa̍k,

4

. hō͘ góa chhián-bêng i, chiàu góa só͘ eng-kai kóng ê.

5

. Ǹg hiah ê gōa-bīn lâng lín tio̍h tī tì-hūi lâi kiâⁿ, tio̍h pó-sioh ki-hōe.

6

. Lín ê só͘ kóng tio̍h siông-siông ēng un-sûn, chhin-chhiūⁿ ēng iâm tiau-hô, chiū ōe hiáu-tit cháiⁿ-iūⁿ lâi ìn ta̍k lâng.

7

. Góa lóng-chóng ê sū Chhui-ki-kó͘ beh kā lín kóng, i sī só͘ thiàⁿ ê hiaⁿ-tī, tī Chú chòe tiong-sìn ê chhe-ēng, iā tâng chòe lô͘-po̍k ê;

8

. ūi-tio̍h án-ni góa tiâu-tî chhe i chiū-kūn lín, hō͘ lín chai góan ê sū, iā hō͘ i an-ùi lín ê sim.

9

. Iā chhe O-nî-se-bó͘ kap i khì, i chiū-sī tiong-sìn thang thiàⁿ ê hiaⁿ-tī, iā sī lín hia ê lâng. In beh chiong chit só͘-chāi ê sū lóng kā lín kóng.

10

. Kap góa tâng koaiⁿ-kaⁿ ê A-lí-ta̍t-kó͘, kap Pa-ná-pa ê piáu sió-tī Má-khó, chhéng-an lín; (lūn Má-khó lín í-keng siū-tio̍h bēng-lēng; i nā lâi chiū-kūn lín, lín tio̍h chiap-la̍p i);

11

. kiò chòe Iû-su-to͘ ê Iâ-so͘ iā chhéng-an lín; chit kúi lâng sī sio̍k kat-lé ê, chí-ū in ūi-tio̍h Siōng-tè ê kok kap góa tâng tio̍h-bôa, iā sī hō͘ góa tit-tio̍h an-ùi ê,

12

. Ki-tok Iâ-so͘ ê lô͘-po̍k Í-pa-hut, chiū-sī lín hia ê lâng, chhéng-an lín; i tī kî-tó ê tiong-kan siông-siông ūi-tio̍h lín chhut-la̍t, hō͘ lín khiā-chāi ôan-chôan, móa sim sìn-ho̍k Siōng-tè it-chhè ê chí-ì.

13

. Góa kan-chèng I, ūi-tio̍h lín kap tī Ló-tí-ka í-kı̍p Hi-lah-pho-lı̍p ê lâng, ū chōe-chōe lô-khó͘.

14

. Lō͘-ka, chiū-sī só͘ thiàⁿ ê i-seng, kap Tí-má chhéng-an lín.

15

. Chhéng-an tiàm-tī Ló-tí-ka chiah ê hiaⁿ-tī, í-kı̍p Lêng-hoat, kap chū-chı̍p tī in ê ke ê kàu-hōe.

16

. Chit ê phoe í-keng tha̍k tī lín tiong-kan, tio̍h siat-hoat hō͘ Ló-tí-ka lâng ê kàu-hōe iā tha̍k i; koh lín tio̍h tha̍k tùi Ló-tí-ka lâi ê phoe.

17

. Koh tio̍h kā A-ki-pò͘ kóng, Tio̍h kín-sīn lâi chīn lí tī Chú só͘ siū ê chit-hūn.

18

. Góa Pó-lô chhin-pit chhéng-an lín. Lín tio̍h siàu-liām góa kòa thih liān. Gōan un-tián kap lín tī-teh.