Sin-bēng-kì 第 11 章 - 巴克禮全羅

1

Só͘-í lí tio̍h thiàⁿ Iâ-hô-hoa lí ê Siōng-tè, siông-siông siú I só͘ hoan-hù lí siú ê, kap I ê lu̍t-lē, hoat-tō͘, kài-bēng.

2

Lín kin-á-jı̍t tio̍h chai, in-ūi góa m̄-sī kap lín ê kiáⁿ-jî kóng, in m̄-chai, iā bô khòaⁿ-kìⁿ Iâ-hô-hoa lín Siōng-tè ê kàu-tok, ui-giâm, tōa kôan-lêng ê chhiú, kap chhun-chhut ê chhiú-kut;

3

í-kı̍p I ê sîn-jiah, I ê só͘ chòe, kìⁿ-nā tī Ai-kı̍p tiong tùi Ai-kı̍p ông Hoat-ló, kap i ê chôan-tōe, só͘ kiâⁿ ê;

4

iā I cháiⁿ-iūⁿ khóan-thāi Ai-kı̍p ê kun-peng, kap in ê bé, in ê chhia; in tui-jip lín ê sî, Iâ-hô-hoa cháiⁿ-iūⁿ hō͘ Âng-hái ê chúi im-in, bia̍t-bô in kàu kin-á-jı̍t;

5

koh I tī khòng-iá cháiⁿ-iūⁿ khóan-thāi lín, kàu lín lâi chit ê só͘-chāi;

6

koh I cháiⁿ-iūⁿ khóan-thāi Liû-piān ê kiáⁿ-sun Í-lī-ap ê kiáⁿ, Tāi-tan, A-pí-lân; tōe cháiⁿ-iūⁿ tī Í-sek-lia̍t lâng ê tiong-kan khui-chhùi thun in, kap in ê ke-kòan, í-kı̍p in ê pò͘-pîⁿ, kap it-chhè kun-tè in ê o̍ah-mı̍h;

7

chí-ū lín chhin-ba̍k khòaⁿ-kìⁿ Iâ-hô-hoa só͘ chòe it-chhè ê tōa-sū.

8

Só͘-í lín tio̍h siú góa kin-á-jı̍t só͘ bēng-lēng it-chhè ê kài-bēng, hō͘ lín chòng-táⁿ, ōe jı̍p-khì sêng-chiap lín só͘ beh kè-khì sêng-chiap ê tōe;

9

iā hō͘ lín ê jı̍t-chí kú-tn̂g tī Iâ-hô-hoa só͘ kap lín ê lia̍t-chó͘ chiù-chōa siúⁿ-sù in kap in ê hō͘-è ê tōe, chiū-sī hit-hō lâu lin kap bı̍t ê tōe.

10

In-ūi lí beh jı̍p-khì sêng-chiap ê tōe, m̄-sī chhin-chhiūⁿ lín chhut-lâi ê Ai-kı̍p tōe, lí tī-hia iā-chéng, ēng kha ta̍h lâi kòan-ak, chhin-chhiūⁿ chhài-hn̂g;

11

to̍k-to̍k lín só͘ beh jı̍p-khì sêng-chiap ê tōe, chiū-sī ū soaⁿ, ū soaⁿ-kok, lâi sêng-siū thiⁿ ê hō͘-chúi ê tōe;

12

sī Iâ-hô-hoa lí Siōng-tè só͘ kòan-kò͘ ê tōe, tùi nî-thâu kàu nî-bé; Iâ-hô-hoa lí Siōng-tè ê ba̍k-chiu siông-siông khòaⁿ i.

13

Lín nā liû-sim thiaⁿ-thàn góa ê kài-bēng, chiū-sī góa kin-á-jı̍t só͘ bēng-lēng lín ê, thiàⁿ Iâ-hô-hoa lín ê Siōng-tè, chīn-sim chīn-sèng ho̍k-sāi I,

14

chiū Góa beh chiàu-sî lo̍h lí ê tōe só͘ khiàm-ēng ê hō͘, chiū-sī chêng ê hō͘, āu ê hō͘, hō͘ lí thang siu-sêng lí ê gō͘-kak, lí ê chiú, lí ê iû;

15

iā hō͘ lí ê chhân-iá hoat-chháu, chhī lí ê cheng-siⁿ, lí iā beh tit-tio̍h pá-chiok.

16

Lín tio̍h ka-kī kín-sīn, bián-tit lín ê sim siū bê, tì-kàu lín oai-chho̍ah, khì ho̍k-sāi pa̍t ê siōng-tè, lâi kèng-pài i;

17

tì-kàu Iâ-hô-hoa tōa siū-khì lín, hō͘ thiⁿ koaiⁿ-ba̍t bô lo̍h hō͘, tōe iā bô chhut-sán; lín chiū tī Iâ-hô-hoa só͘ siúⁿ-sù lín ê súi tōe kín-kín bia̍t-bô.

18

Só͘-í lín tio̍h ēng góa chiah ê ōe kì tī lín ê sim, lín ê náu; iā tio̍h pa̍k tī lín ê chhiú chòe kì-hō, tì tī lín nn̄g lúi ba̍k-chiu ê tiong-ng chòe kì-liām;

19

iā tio̍h ēng che kà-sī lín ê kiáⁿ-jî, bô-lūn lí chē tī chhù-lāi, kiâⁿ tī lō͘-nı̍h, khùn á-sī khí-lâi, lóng tio̍h káng-lūn;

20

koh tio̍h siá tī lí ê chhù ê mn̂g-khiā, í-kı̍p lí ê mn̂g;

21

hō͘ lín ê jı̍t-chí, kap lín ê kiáⁿ-sun ê jı̍t-chí, tī Iâ-hô-hoa tùi lín ê lia̍t-chó͘ chiù-chōa siúⁿ-sù in ê tōe, tit-tio̍h ke-thiⁿ chōe-chōe, chhin-chhiūⁿ thiⁿ khàm-tōe ê jı̍t hiah kú.

22

Lín nā chù-ì chip-siú góa só͘ bēng-lēng lín it-chhè ê kài-bēng, lâi kiâⁿ i, thiàⁿ Iâ-hô-hoa lín ê Siōng-tè, kiâⁿ I it-chhè ê lō͘, kiat-liân tī I,

23

Iâ-hô-hoa chiū beh tùi lín bīn-chêng kóaⁿ-chhut che it-chhè ê kok, lín iā beh tit-tio̍h pí lín khah-tōa khah-kiông ê kok.

24

Kìⁿ-nā lín ê kha-chiúⁿ só͘ ta̍h ê tōe, lóng beh kui hō͘ lín, tùi khòng-iá kap Lī-pa-lùn, tùi hit ê hô, chiū-sī Pek-la̍h hô, kàu sai-pêng ê hái, lóng beh chòe lín ê kéng-kài;

25

beh bô chı̍t-lâng ōe khiā-tiâu tī lín ê bīn-chêng; Iâ-hô-hoa lín ê Siōng-tè beh hō͘ lín só͘ ta̍h ê chôan-tōe lóng kiaⁿ lín, lún lín, chiàu I só͘ tùi lín kóng ê.

26

Khòaⁿ ah, góa kin-á-jı̍t chiong chiok-hok kap chiù-chó͘ pâi tī lín ê bīn-chêng;

27

lín nā thàn Iâ-hô-hoa lín Siōng-tè ê kài-bēng, góa kin-á-jı̍t só͘ bēng-lēng lín ê, chiū-sī chiok-hok;

28

lín nā m̄-thàn Iâ-hô-hoa lín Siōng-tè ê kài-bēng, oai-chho̍ah góa kin-á-jı̍t só͘ bēng-lēng lín ê lō͘, khì thàn pa̍t ê siōng-tè, lín pêng-sò͘ só͘ m̄-bat ê, chiū-sī chiù-chó͘.

29

Chiong-lâi Iâ-hô-hoa lí ê Siōng-tè chhōa lí kàu lí só͘ beh jı̍p-khì sêng-chiap ê tōe, lí tio̍h hē hit ê chiok-hok tī Ki-lī-sim soaⁿ, hē hit ê chiù-chó͘ tī Í-pa-lō͘ soaⁿ.

30

Chit nn̄g ê soaⁿ kiám-m̄-sī tī Iok-tàn hô hit-pêng, jı̍t-lo̍h ê lō͘ ê āu-bīn, tī khiā-khí A-la̍h-pa ê Ka-lâm lâng ê tōe, kap Kiat-kah saⁿ-tùi, óa-kūn Mô͘-lī siōng-chhiū mah?

31

In-ūi lín beh kè Iok-tàn hô, jı̍p-khì sêng-chiap Iâ-hô-hoa lín Siōng-tè só͘ siúⁿ-sù lín chòe-gia̍p ê tōe, lín beh tī-hia khiā-khí.

32

Lín tio̍h chip-siú lâi kiâⁿ góa kin-á-jı̍t tī lín ê bīn-chêng só͘ pâi-lia̍t it-chhè ê lu̍t-lē hoat-tō͘.