Sin-bēng-kì 第 2 章 - 巴克禮全羅

1

Chit-tia̍p liáu-āu, lán o̍at-tò-tńg khí-sin, tùi Âng-hái ê lō͘ khì khòng-iá; sī chiàu Iâ-hô-hoa só͘ tùi góa kóng-ê; lán se̍h Se-jíⁿ soaⁿ chōe-chōe jı̍t.

2

Iâ-hô-hoa hoan-hù góa kóng,

3

Lín se̍h chit ê soaⁿ kú lah; tio̍h o̍at-tńg ǹg pak-sì khì.

4

Lí tio̍h hoan-hù peh-sìⁿ kóng, Í-sò ê kiáⁿ-sun lín ê hiaⁿ-tī tiàm tī Se-jíⁿ; lín beh keng-kè in ê kéng-kài, in beh kiaⁿ lín; só͘-í lín tio̍h put-chí kín-sīn;

5

m̄-thang kap in cheng-chiàn in ê tōe, chiū nā chı̍t kha-jiah-ūi, Góa lóng bô hō͘ lín, in-ūi Góa í-keng chiong Se-jíⁿ soaⁿ hō͘ Í-sò chòe-gia̍p.

6

Lín tio̍h ēng gûn tùi in bóe bí-niû lâi chia̍h, iā tio̍h ēng gûn tùi in bóe chúi lâi lim;

7

in-ūi Iâ-hô-hoa lí ê Siōng-tè, tī lí ê chhiú só͘ chòe it-chhè ê kang, sù-hok lí; lí kiâⁿ chit ê tōa ê khòng-iá, I lóng chai; chit sì-cha̍p nî, Iâ-hô-hoa lí ê Siōng-tè kap lí tī-teh, lí lóng bô khiàm-kheh chı̍t-hāng.

8

Tùi án-ni, lán lī-khui lán ê hiaⁿ-tī Í-sò ê kiáⁿ-sun, khiā-khí tī Se-jíⁿ ê; tùi A-la̍h-pa ê lō͘ keng-kè Í-la̍h-tha, Í-sûn-ka-pia̍t.

9

Lán chiū o̍at-tńg keng-kè Mô͘-ap khòng-iá ê lō͘ khì. Iâ-hô-hoa tùi góa kóng, M̄-thang kiáu-jiáu Mô͘-ap lâng, iā m̄-thang kap in kau-chiàn; in ê tōe Góa lóng bô beh hō͘ lí chòe-gia̍p; in-ūi Góa í-keng chiong A-jíⁿ hō͘ Lô-tek ê kiáⁿ-sun chòe-gia̍p.

10

(Chá-chêng ū Í-bí lâng khiā-khí tī-hia, peh-sìⁿ chōe, tōa koh lò, chhin-chhiūⁿ A-la̍p lâng chı̍t-iūⁿ.

11

In iā hō͘ lâng sǹg in chòe Lī-ho̍at-im lâng, chhin-chhiūⁿ A-la̍p lâng chı̍t-iūⁿ; chóng-sī Mô͘-ap lâng chheng i chòe Í-bí lâng.

12

Chá-chêng Hô-lī lâng iā khiā-khí tī Se-jíⁿ; chóng-sī Í-sò ê kiáⁿ-sun sòa-chiap i; in tī in ê bīn-chêng châu-bia̍t in, lâi tòa tī in ê só͘-chāi, chhin-chhiūⁿ Í-sek-lia̍t tī Iâ-hô-hoa siúⁿ-sù in chòe-gia̍p ê tōe só͘ kiâⁿ ê.)

13

Taⁿ lín tio̍h khí-lâi kè Sat-lia̍t khoe; tùi án-ni lán kè Sat-lia̍t khoe.

14

Tùi lán lī-khui Ka-te-su Pa-nî-a, kàu kè Sat-lia̍t khoe ê jı̍t, kiōng saⁿ-cha̍p-poeh nî; kàu hit-tāi ê bú-sū lóng sí-bô tī kun-iâⁿ-tiong, chiàu Iâ-hô-hoa tùi in só͘ chiù-chōa-ê.

15

Koh Iâ-hô-hoa ê chhiú kong-kek in, tùi kun-iâⁿ-tiong châu-bia̍t in, kàu in lóng sí-bô.

16

Bú-sū tùi peh-sìⁿ-tiong lóng châu-bia̍t sí-bô í-āu,

17

Iâ-hô-hoa hoan-hù góa kóng,

18

Lí kin-á-jı̍t tio̍h tùi Mô͘-ap ê kéng-kài A-jíⁿ keng-kè;

19

kiâⁿ kūn A-bûn lâng ê tùi-bīn, m̄-thang kiáu-jiáu in, iā m̄-thang kap in cheng-chiàn; in-ūi A-bûn lâng ê tōe Góa bô hō͘ lín chòe-gia̍p, in-ūi Góa í-keng siúⁿ-sù Lô-tek ê kiáⁿ-sun chòe-gia̍p.

20

(Hit ê tōe iā sǹg-chòe Lī-ho̍at-im lâng ê tōe; chá-chêng Lī-ho̍at-im lâng tiàm tī-hia, A-bûn lâng chheng in chòe Sàn-sòng-bêng;

21

hiah ê peh-sìⁿ chōe, tōa koh lò, chhin-chhiūⁿ A-la̍p lâng chı̍t-iūⁿ; chóng-sī Iâ-hô-hoa tī A-bûn lâng ê bīn-chêng châu-bia̍t in, in chiū tit-tio̍h in ê tōe, sòa-chiap khiā-khí;

22

chhin-chhiūⁿ I ūi Í-sò ê kiáⁿ-sun, khiā-khí tī Se-jíⁿ ê, bia̍t Hô-lī lâng tī in ê bīn-chêng, in chiū sòa-chiap khiā-khí in ê tōe kàu kin-á-jı̍t;

23

koh ū A-ōe lâng khiā-khí tī hiuⁿ-siā, sòa kàu Ka-sat ê; tùi Ka-húi-thok chhut-lâi ê Ka-húi-thok lâng bia̍t in, lâi khiā-khí tī in ê ūi.)

24

Taⁿ lín tio̍h khí-lâi, khí-sin kè A-lùn ê soaⁿ-kok; khòaⁿ ah, Góa í-keng chiong A-mô͘-lī lâng Hi-sı̍t-pún ông Se-hông, kap i ê tōe, kau tī lí ê chhiú-thâu; lí tio̍h khí-chhiú tit-tio̍h i ê tōe, khì kap i kau-chiàn.

25

Tùi kin-á-jı̍t khí, Góa beh hō͘ thiⁿ-ē bān peh-sìⁿ, thiaⁿ-kìⁿ lí ê miâ-siaⁿ ê, kiaⁿ lín, lún lín; koh in-ūi lí ngia̍uh-ngia̍uh-chhoah, thòng-khó͘.

26

Góa chiū tùi Ki-tí-bo̍k ê khòng-iá, chhe sù-chiá khì kìⁿ Hi-sı̍t-pún ông Se-hông, ēng hô-pêng ê ōe kóng,

27

Kiû lí iông-ún góa tùi lí ê tōe keng-kè; góa beh kiâⁿ tōa-lō͘, bô phian-chó, bô phian-iū;

28

lí the̍h góa ê gûn, bōe bí-niû hō͘ góa chia̍h, the̍h góa ê gûn, ēng chúi bōe góa lim; to̍k-to̍k chún góa pō͘-kiâⁿ kè-khì;

29

chhin-chhiūⁿ tiàm tī Se-jíⁿ ê Í-sò ê kiáⁿ-sun, kap tiàm tī A-jíⁿ ê Mô͘-ap lâng khóan-thāi góa chı̍t-iūⁿ; thèng-hāu góa kè Iok-tàn hô, jı̍p Iâ-hô-hoa góan ê Siōng-tè só͘ siúⁿ-sù góan ê tōe.

30

Chóng-sī Hi-sı̍t-pún ông Se-hông m̄-khéng hō͘ lán tùi i hia keng-kè, in-ūi Iâ-hô-hoa lí ê Siōng-tè hō͘ i ê sèng-chêng kò͘-chip, sim ngī, ūi-tio̍h beh chiong i kau-hù tī lí ê chhiú; chhin-chhiūⁿ kin-á-jı̍t chı̍t-iūⁿ.

31

Iâ-hô-hoa kā góa kóng, Khòaⁿ ah, tùi chit-tia̍p khí, Góa beh chiong Se-hông kap i ê tōe, kau-hù tī lí ê bīn-chêng, lí taⁿ tio̍h tit-tio̍h i ê tōe chòe-gia̍p.

32

Hit-sî Se-hông kap i ê chèng peh-sìⁿ chhut-lâi tí-te̍k lán, kau-chiàn tī Ngá-cha̍p.

33

Iâ-hô-hoa lán ê Siōng-tè chiong i kau-hù lán, lán chiū phah-sí i, kap i ê kiáⁿ, í-kı̍p i ê chèng peh-sìⁿ.

34

Tng hit-sî lán chhú i lóng-chóng ê siâⁿ, châu-bia̍t ū lâng khiā-khí ê siâⁿ, liân hū-jîn-lâng kap gín-ná, bô lâu chı̍t-ê;

35

to̍k-to̍k cheng-siⁿ kap só͘ chhiúⁿ ta̍k ê siâⁿ ê chong-bu̍t, lóng chhú lâi chòe ka-kī ê lō͘-ēng.

36

Tùi A-lùn soaⁿ-kok-piⁿ ê A-lô-jíⁿ, í-kı̍p soaⁿ-kok tiong ê siâⁿ, kàu tī Ki-lia̍t, bô chı̍t ê siâⁿ kian-kò͘, hō͘ lán chhú i bô tio̍h; in-ūi Iâ-hô-hoa lán ê Siōng-tè lóng kau-hù lán;

37

chí-ū A-bûn lâng ê tōe, Ngá-phok hô-piⁿ ê tōe, kap soaⁿ-tōe chiah ê siâⁿ, kap Iâ-hô-hoa lán ê Siōng-tè só͘ kìm lán khì ê tōe, lí lóng bô óa-kūn i.